ស្ថានទូតអូទ្រីសប្រចាំកម្ពុជា និងធុរជនពីប្រទេសអូទ្រីស បានបង្ហាញការចាប់អារម្មណ៍លើសក្តានុពលទេសចរណ៍ និងកាលានុវត្តភាពវិនិយោគក្នុងវិស័យទេសចរណ៍កម្ពុជា ដោយបានចាត់ទុកថា «ជាតារាទើបនឹងរះ» ដែលកើតចេញពីកត្តាសុខសន្តិភាព ហើយប្រទេសនេះ ក៏ចង់មានជើងហោះហើរត្រង់ពីទីក្រុង Vienna មកកាន់រាជធានីភ្នំពេញ ឬខេត្តសៀមរាបរបស់ប្រទេសកម្ពុជាផងដែរ។
ដំណឹងដ៏គួរឱ្យចាប់អារម្មណ៍នេះ ត្រូវបានបង្ហើបឱ្យដឹង នៅក្នុងកិច្ចពិភាក្សាការងារស្តីពីកិច្ចសហប្រតិបត្តិការលើវិស័យទេសចរណ៍រវាងលោក ហួត ហាក់ រដ្ឋមន្រ្តីក្រសួងទេសចរណ៍ ជាមួយលោក Andreas Sumper អនុប្រធានបេសកកម្មស្ថានទូតអូទ្រីសប្រចាំកម្ពុជា ព្រមទាំងលោក Max Gridling កុងស៊ុលកិត្តិយសអូទ្រីស និងលោក Christian-Petru Ciochirca នាយកប្រតិបត្តិនៃក្រុមហ៊ុន M8 M8imize GmbH នៅទីស្នាក់ការក្រសួងទេសចរណ៍ កាលពីថ្ងៃទី ១៧ ខែមីនា។
នៅក្នុងការពិភាក្សាការងារនោះ លោក Andreas Sumper បានប្រាប់លោក ហួត ហាក់ ពីបេសកកម្មពាណិជ្ជកម្មរបស់ស្ថានទូត ដែលបានដឹកនាំក្រុមហ៊ុនធំៗ ពីប្រទេសអូទ្រីសជាច្រើនក្រុមហ៊ុនពីអាជីវកម្មផ្សេងៗគ្នា មកសិក្សាស្វែងយល់ពីសភាពការណ៍នយោបាយ សេដ្ឋកិច្ច សង្គម និងកាលានុវត្តភាពវិនិយោគ ជាពិសេសលើវិស័យទេសចរណ៍។
ជាមួយគ្នានោះ តំណាងក្រុមហ៊ុនមកពីប្រទេសអូទ្រីស បានណែនាំអំពីសកម្មភាព និងបទពិសោធរបស់ក្រុមហ៊ុនរបស់លោក លើការរៀបចំព្រឹត្តិការណ៍កីឡាកន្លងមក ដែលអាចរួមចំណែកជំរុញការផ្សព្វផ្សាយទេសចរណ៍កម្ពុជាទៅកាន់ទីផ្សារអន្តរជាតិ។
ជាការឆ្លើយតប លោក ហួត ហាក់ បានកោតសរសើរ វាយតម្លៃខ្ពស់ និងថ្លែងអំណរគុណដល់ស្ថានទូតអូទ្រីសប្រចាំកម្ពុជា និងធុរជនអូទ្រីសជាប្រតិភូ ដែលបានមកសិក្សាស្វែងយល់ពីសភាពការណ៍នយោបាយ សេដ្ឋកិច្ច សង្គមពិតជាក់ស្តែង ដែលកំពុងមានសុខសន្តិភាព និងការរីកចម្រើនលើគ្រប់វិស័យក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា។
លោករដ្ឋមន្រ្តីក្រសួងទេសចរណ៍ ហួត ហាក់ បានបញ្ជាក់ថា៖ «តាមរយៈកត្តាសុខសុវត្តិភាព និងស្ថិរភាពនយោបាយ បានផ្តល់នូវកាលានុវភាពវិនិយោគ និងសក្តានុពលទេសចរណ៍ដ៏ល្អប្រៀបដូចជាតារាទើបនឹងរះ បង្ហាញដល់អ្នកវិនិយោគ និងភ្ញៀវទេសចរអន្តរជាតិ»។
តាមរយៈកិច្ចពិភាក្សាការងារ ស្តីពីកិច្ចសហប្រតិបត្តិការលើវិស័យទេសចរណ៍ កាលពីថ្ងៃអង្គារនេះ ប្រតិភូរបស់ប្រទេសអូទ្រីស បានបង្ហាញការចាប់អារម្មណ៍លើសក្តានុពលទេសចរណ៍ និងកាលានុវត្តភាពវិនិយោគក្នុងវិស័យទេសចរណ៍នៅកម្ពុជា ហើយភាគីទាំង២ ក៏កំពុងពិនិត្យលទ្ធភាពជំរុញឱ្យមានជើងហោះហើរត្រង់មកកាន់ប្រទេសកម្ពុជា។
ជុំវិញការងារនេះ ក្រសួងទេសចរណ៍ បានបញ្ជាក់ថា៖ «ក្នុងជំនួបប្រកបដោយផ្លែផ្កា គូភាគីបានបញ្ជាក់ពីការប្តេជ្ញាចិត្តក្នុងការបន្តពង្រឹង និងពង្រីកកិច្ចសហប្រតិបត្តិការក្នុងវិស័យទេសចរណ៍ឱ្យកាន់តែល្អ ដើម្បីអភិវឌ្ឍវិស័យទេសចរណ៍ និងឧស្សាហកម្មបដិសណ្ឋារកិច្ចឱ្យកាន់តែរីកចម្រើន ព្រមទាំងការពិនិត្យលទ្ធភាពជំរុញឱ្យមានជើងហោះហើរត្រង់ពីទីក្រុង Vienna មកកាន់រាជធានីភ្នំពេញ ឬខេត្តសៀមរាប»។
គួរបញ្ជាក់ថា កម្ពុជា និងអូទ្រីស មានទំនាក់ទំនងការទូតដ៏ល្អជាមួយគ្នា តាំងពីឆ្នាំ១៩៥៦ ដោយមានរយៈពេលប្រមាណ៧០ឆ្នាំមកហើយ ដែលមានកិច្ចសហប្រតិបត្តិការលើវិស័យនានា រួមទាំងវិស័យវិនិយោគទេសចរណ៍ផងដែរ។ ក្នុងដើមឆ្នាំ២០២៦នេះ មានភ្ញៀវទេសចរអូទ្រីសច្រើនជាង២ ០០០នាក់ បានធ្វើដំណើរទេសចរណ៍មកលេងគ្រប់គោលដៅទេសចរណ៍កម្ពុជាទាំងអស់ប្រកបដោយសុខសុវត្តិភាព និងសោមនស្សរីករាយ៕
