ទាហានថៃបានបាញ់កាំភ្លើងចំនួន ៩ គ្រាប់ ប្រភេទអាវុធ M79 និង M16 នៅក្នុងអំឡុងពេលដែលកម្ពុជា ដឹកនាំក្រុមអនុព័ន្ធយោធាបរទេសចុះត្រួតពិនិត្យចំណុចព្រំដែនអន្តរជាតិអូរស្មាច់ ក្នុងខេត្តឧត្តរមានជ័យ នៅព្រឹកថ្ងៃទី ២៩ ខែមេសានេះ។ នេះបើតាមលោកស្រី ម៉ាលី សុជាតា អ្នកនាំពាក្យក្រសួងការពារជាតិ
លោកស្រី ម៉ាលី សុជាតា បានឱ្យដឹងថា នៅវេលាម៉ោង ១០:២០នាទីព្រឹក ថ្ងៃពុធ ទី២៩ ខែមេសានេះ ក្រសួងការពារជាតិបានសម្របសម្រួលដំណើរទស្សនកិច្ចលើកទី២ ប្រចាំឆ្នាំ២០២៦ របស់ក្រុមអនុព័ន្ធយោធាបរទេស (MACPP) ប្រចាំកម្ពុជា ចុះសង្កេតការណ៍នៅច្រកអូរស្មាច់ ខេត្តឧត្តរមានជ័យ ក្រោយបទឈប់បាញ់ចូលជាធរមាន។
លោកស្រីបញ្ជាក់ថា មុនការចេញដំណើរទស្សនកិច្ចនេះ ក្រុមលេខាធិការដ្ឋាន នៃគណៈកម្មាធិការព្រំដែនថ្នាក់យោធភូមិភាគ (RBC) នៃយោធភូមិភាគទី៤ កម្ពុជា បានចេញលិខិតជូនដំណឹងជាផ្លូវការជូនទៅកាន់ក្រុមលេខាធិការដ្ឋាន នៃគណៈកម្មាធិការព្រំដែនថ្នាក់យោធភូមិភាគ (RBC) នៃកងទ័ពភូមិភាគទី២ ថៃ រួចរាល់ហើយ។
បើតាមអ្នកនាំពាក្យក្រសួងការពារជាតិដដែល ក្នុងអំឡុងពេលកំពុងសង្កេតការណ៍ និងត្រួតពិនិត្យនៅទីតាំងជាក់ស្តែង មានករណីផ្ទុះអាវុធបង្កឡើងដោយកម្លាំងយោធាថៃចំនួន ៥លើក ចន្លោះពីម៉ោង ១០:៣៥នាទីព្រឹក ដល់ម៉ោង ១១:០៩នាទី ដោយបានបាញ់កាំភ្លើងប្រភេទ M79 និងប្រភេទ M16 សរុបចំនួន ៩គ្រាប់។
ចំពោះការផ្ទុះអាវុធនេះ កងកម្លាំងរបស់កម្ពុជាបាននឹងកំពុងបន្តតាមដានយ៉ាងយកចិត្តទុកដាក់ និងប្រុងប្រយ័ត្នខ្ពស់។
គួរបញ្ជាក់ផងដែរថា ហេតុការណ៍នេះគឺផ្ទុយទៅនឹងស្មារតីនៃបទឈប់បាញ់ និងកិច្ចព្រមព្រៀងទាំងឡាយដែលភាគីទាំងពីរបានឯកភាពគ្នា ដើម្បីកាត់បន្ថយភាពតានតឹង និងលើកកម្ពស់សន្តិភាព សន្តិសុខ និងភាពស្ងប់ស្ងាត់នៅតាមបណ្តោយព្រំដែន។
ក្រសួងការពារជាតិបញ្ជាក់ពីជំហររបស់កម្ពុជា ក្នុងការគោរពបទឈប់បាញ់ និង ជំហរដោះស្រាយជម្លោះដោយសន្តិវិធី៕
