ទំហំទីផ្សារធានារ៉ាប់រងកម្ពុជា ក្នុងឆ្នាំ២០២៥ បានកើនឡើងដល់ប្រមាណ ៣៦៧ លានដុល្លារ ដោយបានចូលរួមចំណែកក្នុងសេដ្ឋកិច្ចជាតិប្រមាណ ១,១១% នៃផលិតផលក្នុងស្រុកសរុប(ផ.ស.ស.) និងមានដង់ស៊ីតេធានារ៉ាប់រងចំនួន ២០,៩៥ ដុល្លារអាមេរិកក្នុងមនុស្សម្នាក់។
នេះបើតាមលោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា ក្នុង«ទិវាធានារ៉ាប់រងកម្ពុជា ២០២៦» ដែលរៀបចំឡើងចាប់ពីថ្ងៃទី២៥-២៦ ខែមេសា ឆ្នាំ២០២៦ ដោយនិយ័តករធានារ៉ាប់រងកម្ពុជា ក្រោមកិច្ចសហការជាមួយសមាគមធានារ៉ាប់រងកម្ពុជាសមាគមជើងសាធានារ៉ាប់រងកម្ពុជា និងគ្រឹះស្ថានធានារ៉ាប់រង នៅនៅខេត្តសៀមរាប។ ពិធីនេះក៏មានការចូលរួមពីលោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ ព្រមទាំងអ្នកពាក់ព័ន្ធជាច្រើនទៀត។
យោងតាមសេចក្តីប្រកាសព័ត៌មានរបស់និយ័តករធានារ៉ាប់រងកម្ពុជា ទិវាធានារ៉ាប់រងកម្ពុជា ២០២៦ រៀបចំឡើងក្នុងគោលបំណងសំខាន់ៗចំនួន ៣ គឺ ១.លើកកម្ពស់ការយល់ ដឹងនិងជំរុញការផ្សព្វផ្សាយអំពីសេវាធានារ៉ាប់រងជូនសាធារណជន, ២.បង្ហាញពីការគាំទ្ររបស់រាជរដ្ឋាភិបាលក្នុងការជំរុញឱ្យមានពិពិធកម្មផលិតផលហិរញ្ញវត្ថុនៅក្នុងវិស័យហិរញ្ញវត្ថុ ដូចមានចែងនៅក្នុងយុទ្ធសាស្ត្របញ្ច កោណដំណាក់កាលទី១ នីតិកាលទី៧ របស់រាជរដ្ឋាភិបាល, និង៣.បង្ហាញដល់សាធារណជនឱ្យបានជ្រាបថា វិស័យធានារ៉ាប់រងជាផ្នែកដ៏សំខាន់មួយដែលមានតួនាទីសកម្ម និងចាំបាច់ក្នុងការចូលរួមចំណែកកសាងសំណាញ់សុវត្ថិភាពសង្គម និងជំរុញកំណើនសេដ្ឋកិច្ចជាតិ។
លោក ប៊ូ ច័ន្ទភីរូ បាននិយាយថា វិស័យធានារ៉ាប់រងកម្ពុជាបានបង្ហាញពីវឌ្ឍនភាពគួរឱ្យកត់សម្គាល់ក្នុងរយៈពេលប៉ុន្មាន ៥ ឆ្នាំចុងក្រោយនេះ។ ជាក់ស្តែង ក្នុងឆ្នាំ២០២៥ ទីផ្សារធានារ៉ាប់រងកម្ពុជាមានគ្រឹះស្ថានធានារ៉ាប់រងសរុបចំនួន ១១២ ដែលក្នុងនោះរួមមាន ក្រុមហ៊ុនធានារ៉ាប់រងទូទៅចំនួន ១៨, ក្រុមហ៊ុនធានារ៉ាប់រងអាយុជីវិត ១៣, ក្រុមហ៊ុនធានារ៉ាប់រងខ្នាតតូច ៧, ក្រុមហ៊ុនធានារ៉ាប់រងបន្ត ១, ក្រុមហ៊ុនជើងសាធានារ៉ាប់រង ២០, ក្រុមហ៊ុនភ្នាក់ងារធានារ៉ាប់រង ៤៤, ក្រុមហ៊ុនវាយតម្លៃហានិភ័យធានារ៉ាប់រង ៥, ក្រុមហ៊ុនគ្រប់គ្រងសំណងធានារ៉ាប់រង ២, និងក្រុមហ៊ុនគណនាបុព្វលាភធានារ៉ាប់រងចំនួន ២ ដែលកំពុងធ្វើប្រតិបត្តិការអាជីវកម្មធានារ៉ាប់រង។
លោកបានបន្តថា ជាមួយនឹងកំណើនគ្រឹះស្ថានធានារ៉ាប់រងនេះ ទំហំទីផ្សារធានារ៉ាប់រងកម្ពុជាបានកើនឡើងដល់ប្រមាណ ៣៦៧ លានដុល្លារ ក្នុងឆ្នាំ២០២៥ និងបានចូលរួមចំណែកក្នុងសេដ្ឋកិច្ចកម្ពុជាជាអត្រាភាគទានធានារ៉ាប់រងប្រមាណ ១,១១% នៃ ផ.ស.ស. និងដង់ស៊ីតេធានារ៉ាប់រងចំនួន ២០,៩៥ ដុល្លារក្នុងមនុស្សម្នាក់។
លោកបានបញ្ជាក់ថា៖«សូចនាករគន្លឹះទាំងពីរនេះបញ្ជាក់ថា ទីផ្សារធានារ៉ាប់រងកម្ពុជានៅមានសក្តានុពលធំធេងសម្រាប់ការរីកចម្រើននាពេលខាងមុខ ហើយក៏បញ្ជាក់ផងដែរថាកង្វះការយល់ដឹងរបស់សាធារណជនអំពីអត្ថប្រយោជន៍នៃការធានារ៉ាប់រង និងជំនឿទុកចិត្តរបស់អតិថិជនលើក្រុមហ៊ុនធានារ៉ាប់រង គឺជាបញ្ហាប្រឈមមួយដែលទាមទារឱ្យមានការផ្សព្វផ្សាយ និងអប់រំបន្ថែមទៀតអំពីខ្លឹមសារនិងអត្ថប្រយោជន៍នៃការធានារ៉ាប់រង»។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក រស់ សីលវ៉ា បាននិយាយថា វិស័យធានារ៉ាប់រង គឺពិតជាមានសារៈសំខាន់ណាស់ក្នុងការទ្រទ្រង់ប្រព័ន្ធសន្តិសុខសង្គ និងរួមចំណែកយ៉ាងខ្លាំងក្លាដល់ការអភិវឌ្ឍន៍សេដ្ឋកិច្ចជាតិ។ កម្ពុជាពិតជាមានភាពចាំបាច់ក្នុងការជំរុញទីផ្សារធានារ៉ាប់រងរបស់ខ្លួនរីកចម្រើនទៅមុខបន្ថែមទៀត៕
