ភ្នំពេញ៖ រាជរដ្ឋាភិបាលកម្ពុជា កំពុងជំរុញពង្រីកយន្តការដោះស្រាយវិវាទក្រៅប្រព័ន្ធតុលាការ ដើម្បីផ្តល់សេវាយុត្តិធម៌ឱ្យបានលឿន ងាយស្រួល និងនៅជិតប្រជាពលរដ្ឋ ខណៈក៏ជួយបន្ថយបន្ទុកលើប្រព័ន្ធតុលាការផងដែរ។
ថ្លែងក្នុងពិធីបើកសិក្ខាសាលាថ្នាក់ជាតិ ស្តីពី «ការធ្វើឱ្យប្រសើរឡើងនៃយន្តការដោះស្រាយវិវាទក្រៅប្រព័ន្ធតុលាការ» លោក សុខ សូកេន រដ្ឋមន្ត្រីក្រសួងអធិការកិច្ច និងជាអនុប្រធានអាជ្ញាធរដោះស្រាយវិវាទក្រៅប្រព័ន្ធតុលាការ (អ.ដ.ក.) បានបញ្ជាក់ថា រាជរដ្ឋាភិបាលកំពុងផ្តោតសំខាន់លើការសម្រុះសម្រួល និងផ្សះផ្សាវិវាទក្រៅតុលាការ ជាផ្នែកមួយនៃការកែទម្រង់វិស័យយុត្តិធម៌។
លោកបានថ្លែងកាលពីថ្ងៃទី៣០ ខែមេសាថា៖ «យន្តការដោះស្រាយវិវាទក្រៅប្រព័ន្ធតុលាការ គឺជាយន្តការសំខាន់មួយបំពេញបន្ថែមឱ្យប្រព័ន្ធយុត្តិធម៌ ដែលជួយលើកកម្ពស់គុណភាព ប្រសិទ្ធភាព និងភាពឆាប់រហ័សនៃការដោះស្រាយវិវាទ»។
សិក្ខាសាលានេះ មានការចូលរួមពីអ្នកចូលរួមជាង ៣០០ នាក់ ពីក្រសួង ស្ថាប័ន តុលាការ អង្គការសង្គមស៊ីវិល និងដៃគូអភិវឌ្ឍន៍។
លោក កើត រិទ្ធ ប្រធានអាជ្ញាធរដោះស្រាយវិវាទក្រៅប្រព័ន្ធតុលាការ (អ.ដ.ក.) ផ្ដល់ប័ណ្ណសរសើរដល់លោក លី តៃសេង ជាសមាជិក (អ.ដ.ក.)។ រូបថត សហការី
ចំនួនសំណុំរឿងកើនឡើង
លោក សុខ សូកេន បានបញ្ជាក់ថា អាជ្ញាធរជាតិដោះស្រាយវិវាទក្រៅប្រព័ន្ធតុលាការ ដែលត្រូវបានបង្កើតនៅឆ្នាំ២០២៣ បានទទួលសំណុំរឿងកើនឡើងយ៉ាងឆាប់រហ័ស។
គិតត្រឹមថ្ងៃទី៣១ ខែមីនា ឆ្នាំ២០២៦ មានសំណុំរឿងសរុប ២,៩៤១ ករណី ក្នុងនោះបានចាត់ការរួច ១,៣៤០ ករណី ហើយ ៧៤៩ ករណី ត្រូវបានដោះស្រាយដោយជោគជ័យតាមរយៈការសម្រុះសម្រួល ខណៈជាង ១,៦០០ ករណី កំពុងដំណើរការ។
លោក យ៉ម ផារ៉ូត ប្រតិភូរាជរដ្ឋាភិបាល និងជាអគ្គលេខាធិការនៃ អគ្គលេខាធិការដ្ឋាននៃ អ.ជ.ក. បានឱ្យដឹងថា៖ «លទ្ធផលនេះ បង្ហាញពីការកើនឡើងនៃទំនុកចិត្តរបស់ប្រជាពលរដ្ឋចំពោះយន្តការនេះ»។
លោកបានបន្ថែមថា កិច្ចព្រមព្រៀងដែលសម្រេចបានអាចមានអានុភាពអនុវត្តដូចសាលក្រមស្ថាពររបស់តុលាការ។
ពង្រីកដល់មូលដ្ឋាន
ការពង្រីកសេវាទៅកាន់តំបន់មូលដ្ឋាន គឺជាអាទិភាពសំខាន់មួយ ជាពិសេសសម្រាប់តំបន់ដាច់ស្រយាល និងជនជាតិដើមភាគតិច។
បច្ចុប្បន្ន អាជ្ញាធរ (អ.ដ.ក.) បានបង្កើតការិយាល័យតំណាងនៅខេត្តរតនគិរី មណ្ឌលគិរី ក្រចេះ និងស្ទឹងត្រែង។
លោក ផារ៉ូត បានបញ្ជាក់ថា៖ «នេះជាជំហានថ្មីក្នុងការនាំយកសេវាដោះស្រាយវិវាទទៅជិតប្រជាពលរដ្ឋនៅមូលដ្ឋានឆ្ងាយៗ»។
ផ្នែកមួយនៃកំណែទម្រង់ធំ
យន្តការនេះ ជាផ្នែកមួយនៃយុទ្ធសាស្ត្របញ្ចកោណ ដែលផ្តោតលើការពង្រឹងនីតិរដ្ឋ និងធ្វើទំនើបកម្មរដ្ឋបាលសាធារណៈ។
លោក សុខ សូកេន បានលើកឡើងថា កំណែទម្រង់វិស័យយុត្តិធម៌បានឈានដល់ដំណាក់កាលថ្មី ដែលផ្តោតលើ «ប្រសិទ្ធភាពនៃលទ្ធផលជាក់ស្តែង»។
លោកថ្លែងថា៖ «ការកែទម្រង់មិនត្រឹមតែបង្កើតស្ថាប័នទេ ប៉ុន្តែត្រូវធានាថាអាចឆ្លើយតបទៅនឹងតម្រូវការរបស់ប្រជាពលរដ្ឋបានពិតប្រាកដ»។
បញ្ហាប្រឈម និងទិសដៅបន្ត
លោក សុខ សូកេន ក៏ទទួលស្គាល់ថា នៅមានបញ្ហាប្រឈមមួយចំនួន ដូចជា ការពង្រឹងក្របខណ្ឌច្បាប់ ការកសាងសមត្ថភាពមន្ត្រី និងការបង្កើនការយល់ដឹងសាធារណៈ។
រដ្ឋាភិបាលក៏កំពុងពិចារណាប្រើប្រាស់បច្ចេកវិទ្យាឌីជីថល ដើម្បីធ្វើឱ្យដំណើរការដោះស្រាយវិវាទកាន់តែងាយស្រួល និងឆាប់រហ័ស។
ក្នុងពិធីបិទសិក្ខាសាលា លោក កើត រិទ្ធ បានអំពាវនាវឱ្យមន្ត្រីសម្រុះសម្រួលគោរពក្រមសីលធម៌វិជ្ជាជីវៈយ៉ាងតឹងរឹង។
លោកបានថ្លែងថា៖ «ទំនុកចិត្តរបស់ប្រជាពលរដ្ឋ គឺជាគន្លឹះសំខាន់សម្រាប់ភាពជោគជ័យរបស់យន្តការនេះ»។
លោកក៏បានអំពាវនាវឱ្យពង្រីកសេវានេះបន្ថែម និងពង្រឹងកិច្ចសហការជាមួយអាជ្ញាធរមូលដ្ឋាន ដើម្បីធានាថាវិវាទអាចដោះស្រាយបានយ៉ាងឆាប់រហ័ស និងមានប្រសិទ្ធភាព៕
