ខេត្តបាត់ដំបង: អាជ្ញាធរកំពុងបង្កើនការបង្ក្រាបបទល្មើសលួចនាំចូលទំនិញឆ្លងដែន និងការគេចពន្ធគយ បន្ទាប់ពីអយ្យការអមសាលាដំបូងខេត្តបាត់ដំបង បានចោទប្រកាន់ស្ត្រី២នាក់ ពាក់ព័ន្ធនឹងការលួចនាំចូលផ្លែទុរេនពីប្រទេសថៃចូលកម្ពុជា។
យោងតាមសេចក្តីប្រកាសព័ត៌មានរបស់អ្នកនាំពាក្យអយ្យការអមសាលាដំបូងខេត្តបាត់ដំបង ចេញផ្សាយនៅថ្ងៃទី៧ ខែឧសភា ឆ្នាំ២០២៦ អយ្យការបានចាត់ការលើសំណុំរឿងព្រហ្មទណ្ឌមួយ ពាក់ព័ន្ធនឹងការលួចនាំចូលផ្លែទុរេនគេចពន្ធ ចំនួន៣លើក កាលពីថ្ងៃទី១៧ ១៩ និង២១ ខែមេសា ឆ្នាំ២០២៦។
សេចក្តីប្រកាសព័ត៌មានបញ្ជាក់ថា: “ការលួចនាំចូលទំនិញទាំងនេះ បានប្រព្រឹត្តតាមច្រកទ្វារតំបន់អូររំដួល ឬហៅថា «កាប៊ីន» ស្ថិតក្នុងឃុំអូររំដួល ស្រុកភ្នំព្រឹក ខេត្តបាត់ដំបង ជាប់ព្រំដែនកម្ពុជា-ថៃ”។
អយ្យការបានឱ្យដឹងថា: “ស្ត្រីឈ្មោះ ព្រំ សុខណយ ហៅយ៉ាដា អាយុ២៦ឆ្នាំ ដែលកំពុងរត់គេចខ្លួន ត្រូវបានចោទថាជាអ្នកបញ្ជាទិញផ្លែទុរេន តាមរយៈស្ត្រីម្នាក់ទៀតឈ្មោះ គ្រឿន សាក់ឡែន អាយុ៣១ឆ្នាំ ដែលត្រូវបានសង្ស័យថា ជាអ្នកសម្របសម្រួលក្នុងការនាំទំនិញចូលមកកម្ពុជា ដោយមិនមានការអនុញ្ញាតពីគយ និងមិនបានបង់ពន្ធត្រឹមត្រូវ”។
តាមការបញ្ជាក់របស់អយ្យការ ទំនិញដែលនាំចូលទាំង៣លើក ត្រូវបានលាក់បំបាំងពីសមត្ថកិច្ចគយ និងនាំចូលដោយខុសច្បាប់។
នៅថ្ងៃទី៤ ខែឧសភា ឆ្នាំ២០២៦ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបាត់ដំបង បានស្រាវជ្រាវ និងឃាត់ខ្លួនឈ្មោះ គ្រឿន សាក់ឡែន ដើម្បីសាកសួរ។
ក្រោយពិនិត្យភស្តុតាង និងស្តាប់ចម្លើយ តំណាងអយ្យការបានសម្រេចចោទប្រកាន់ឈ្មោះ ព្រំ សុខណយ ពីបទ «ផ្តើមគំនិតក្នុងអំពើលួចនាំចូលទំនិញគេចពន្ធ» តាមមាត្រា២៨ នៃក្រមព្រហ្មទណ្ឌ និងមាត្រា៧៥ នៃច្បាប់ស្តីពីគយ។
ដោយឡែក ឈ្មោះ គ្រឿន សាក់ឡែន និងបក្ខពួក ត្រូវបានចោទប្រកាន់ពីបទ «លួចនាំចូលទំនិញគេចពន្ធ» តាមមាត្រា៧៥ នៃច្បាប់ស្តីពីគយ។
សំណុំរឿងនេះ ត្រូវបានបញ្ជូនទៅចៅក្រមស៊ើបសួរ នៃសាលាដំបូងខេត្តបាត់ដំបង ដើម្បីបន្តនីតិវិធីតាមផ្លូវច្បាប់។
ករណីនេះ កើតឡើងស្របពេលដែលអាជ្ញាធរកម្ពុជា កំពុងពង្រឹងការអនុវត្តច្បាប់ប្រឆាំងការលួចនាំចូលទំនិញឆ្លងដែន ជាពិសេសផលិតផលកសិកម្ម ដែលនាំចូលតាមច្រកក្រៅផ្លូវការ ឬច្រកដែលមានការត្រួតពិនិត្យធូររលុង។
មន្ត្រីជំនាញបានព្រមានជាញឹកញាប់ថា សកម្មភាពលួចនាំចូលទំនិញ មិនត្រឹមតែធ្វើឱ្យរដ្ឋបាត់បង់ចំណូលពន្ធគយប៉ុណ្ណោះទេ ប៉ុន្តែថែមទាំងប៉ះពាល់ដល់ការប្រកួតប្រជែងដោយស្មើភាពរបស់អាជីវកម្ម និងអ្នកនាំចូលស្របច្បាប់ផងដែរ។
