ពិព័រណ៍អាស៊ាន​-កូរ៉េ​​បើកឱកាសទីផ្សារថ្មីសម្រាប់អាជីវកម្មកម្ពុជា

 ក្រុ​ងសេអ៊ូល៖ អាជីវកម្មកម្ពុជានឹងមានឱកាសផ្សព្វផ្សាយផលិតផល និងពង្រីកទំនាក់ទំនងពាណិជ្ជកម្មជាមួយអ្នកទិញកូរ៉េខាងត្បូង តាមរយៈពិព័រណ៍ «2026 ASEAN Panorama» ដែលត្រូវបានសម្ពោធក្នុងសប្ដាហ៍នេះនៅទីក្រុងសេអ៊ូល ដោយមជ្ឈមណ្ឌលអាស៊ាន-កូរ៉េ (ASEAN-Korea Centre – AKC)។

ពិព័រណ៍ប្ដូរវេនរយៈពេលប្រាំខែនេះ ត្រូវបានបើកជាផ្លូវការនៅថ្ងៃទី៧ ខែឧសភា នៅសាល ASEAN Hall ស្ថិតក្នុងអគារ Korea Press Center ក្នុងទីក្រុងសេអ៊ូល ដោយមានគោលបំណងពង្រឹងកិច្ចសហប្រតិបត្តិការពាណិជ្ជកម្ម និងធុរកិច្ចរវាងប្រទេសសមាជិកអាស៊ាន និងកូរ៉េខាងត្បូង តាមរយៈការតាំងបង្ហាញផលិតផល កម្មវិធីបណ្ដាញធុរកិច្ច និងការគាំទ្រការចូលទីផ្សារ។

កម្ពុជាគ្រោងនឹងចូលរួមក្នុងខែមិថុនា រួមជាមួយម៉ាឡេស៊ី ដោយក្រុមហ៊ុនក្នុងស្រុកត្រូវបានរំពឹងថានឹងដាក់តាំងបង្ហាញផលិតផលចាប់ពីម្ហូបអាហារ និងភេសជ្ជៈ រហូតដល់ម៉ូដ សិប្បកម្ម និងផលិតផលឧស្សាហកម្មច្នៃប្រឌិត។

ពិព័រណ៍នេះធ្វើឡើងក្រោមប្រធានបទ «Bigger, Bolder, Broader: The New ASEAN in Every Detail» និងត្រូវបានចាត់ទុកថាជាការពង្រីកទ្រង់ទ្រាយនៃស៊េរីពិព័រណ៍ពាណិជ្ជកម្មអាស៊ាន ដែល AKC បានរៀបចំជារៀងរាល់ឆ្នាំចាប់តាំងពីឆ្នាំ២០១៤មក។

កម្មវិធីនេះប្រមូលផ្តុំប្រទេសសមាជិកអាស៊ានទាំង១០ តាមរយៈការតាំងពិព័រណ៍ប្ដូរវេនប្រចាំខែ ដែលនឹងបន្តរហូតដល់ថ្ងៃទី៣០ ខែកញ្ញា។

យោងតាម AKC បានឱ្យដឹងថា​៖ «​ប្រទេសប្រ៊ុយណេ និងឥណ្ឌូណេស៊ី ចូលរួមក្នុងខែឧសភា បន្ទាប់មកកម្ពុជា និងម៉ាឡេស៊ី ក្នុងខែមិថុនា ឡាវ និងហ្វីលីពីន ក្នុងខែកក្កដា មីយ៉ាន់ម៉ា និងថៃ ក្នុងខែសីហា ហើយសិង្ហបុរី និងវៀតណាម ក្នុងខែកញ្ញា»។

AKC បានបញ្ជាក់ថា គំនិតផ្តួចផ្តើមនេះមិនត្រឹមតែមានគោលបំណងផ្សព្វផ្សាយផលិតផលអាស៊ានទៅកាន់អ្នកប្រើប្រាស់កូរ៉េប៉ុណ្ណោះទេ ប៉ុន្តែថែមទាំងបង្កើតឱកាសធុរកិច្ចជាក់ស្ដែងសម្រាប់ក្រុមហ៊ុនអាស៊ាន ដែលចង់ចូល ឬពង្រីកខ្លួនក្នុងទីផ្សារកូរ៉េខាងត្បូងផងដែរ។

អាជីវកម្មដែលចូលរួមនឹងត្រូវបានអញ្ជើញឱ្យចូលរួមកម្មវិធីធុរកិច្ចរវាងក្រុមហ៊ុន និងក្រុមហ៊ុន (B2B) នៅកូរ៉េ ដែលរៀបចំស្របតាមតម្រូវការ រួមមានសិក្ខាសាលា កិច្ចពិគ្រោះយោបល់ផ្ទាល់ជាមួយអ្នកទិញ និងទស្សនកិច្ចទៅកាន់តំបន់ឧស្សាហកម្ម និងស្ថាប័នពាក់ព័ន្ធ។

សេចក្តីប្រកាសព័ត៌មានបានឱ្យដឹងថា៖ «ពិព័រណ៍នេះក៏នឹងមានវគ្គប្រឹក្សាផ្នែកហិរញ្ញវត្ថុ ដែលរៀបចំដោយសហការជាមួយមជ្ឈមណ្ឌលកិច្ចសហប្រតិបត្តិការហិរញ្ញវត្ថុអាស៊ាន-កូរ៉េ នៅទីក្រុងហ្សាការតា ដោយផ្តល់ការណែនាំលើប្រព័ន្ធទូទាត់ សេវាផ្ទេរប្រាក់ ការចុះបញ្ជីក្រុមហ៊ុន ការទាក់ទាញវិនិយោគ និងយុទ្ធសាស្ត្រពង្រីកទីផ្សារ»។

អ្នកជំនាញមកពីស្ថាប័ននានា រួមមាន Shinhan Bank, Korea Technology Finance Corporation (KOTEC), BlissVine Ventures និងក្រុមហ៊ុនពន្ធដារក្នុងស្រុក ត្រូវបានរំពឹងថានឹងផ្តល់ការពិគ្រោះយោបល់ដល់ក្រុមហ៊ុនដែលចូលរួម។

សម្រាប់អាជីវកម្មកម្ពុជា ពិព័រណ៍នេះអាចផ្តល់ឱកាសបន្ថែមក្នុងការចូលទៅកាន់ទីផ្សារអ្នកប្រើប្រាស់ដ៏ធំមួយក្នុងតំបន់អាស៊ី ខណៈដែលកម្ពុជាកំពុងស្វែងរកការធ្វើពិពិធកម្មការនាំចេញ និងពង្រឹងទំនាក់ទំនងពាណិជ្ជកម្មជាមួយដៃគូក្នុងតំបន់។

កូរ៉េខាងត្បូងកំពុងក្លាយជាដៃគូសេដ្ឋកិច្ចដ៏សំខាន់កាន់តែខ្លាំងសម្រាប់កម្ពុជា តាមរយៈការវិនិយោគ ពាណិជ្ជកម្ម និងកិច្ចសហប្រតិបត្តិការអភិវឌ្ឍន៍ ខណៈដែលចំណាប់អារម្មណ៍លើផលិតផលអាស៊ាន និងទីផ្សារអ្នកប្រើប្រាស់នៅអាស៊ីអាគ្នេយ៍ ក៏កំពុងកើនឡើងក្នុងចំណោមអាជីវកម្ម និងអ្នកប្រើប្រាស់កូរ៉េផងដែរ។

ផលិតផលដែលនឹងដាក់តាំងបង្ហាញក្នុងពិព័រណ៍នេះ រួមមានម្ហូបអាហារ និងភេសជ្ជៈ ផលិតផលបែប halal ម៉ូដ និងគ្រឿងតុបតែង សៀវភៅ និងផលិតផលឧស្សាហកម្មច្នៃប្រឌិត។

AKC ក៏បានប្រកាសថា នឹងមានកម្មវិធីផ្សព្វផ្សាយពិសេសសម្រាប់ទីម័រខាងកើត (Timor-Leste) ដែលបានចូលជាសមាជិកទី១១ របស់អាស៊ានជាផ្លូវការកាលពីឆ្នាំមុន ក្នុងអំឡុងពេលពិព័រណ៍នេះផងដែរ។

បន្ថែមពីលើកម្មវិធីធុរកិច្ច ពិព័រណ៍នេះក៏នឹងរៀបចំព្រឹត្តិការណ៍សាធារណៈជាច្រើន ដើម្បីលើកកម្ពស់ការចូលរួមរបស់ប្រជាពលរដ្ឋជាមួយផលិតផល និងវិស័យទេសចរណ៍អាស៊ាន។

ភ្ញៀវដែលចូលរួមក្នុងកម្មវិធី «ASEAN Panorama Completion Event» នឹងមានឱកាសឈ្នះរង្វាន់ រួមមានប័ណ្ណធ្វើដំណើរទៅកាន់ប្រទេសអាស៊ានតម្លៃ១លានវ៉ុនកូរ៉េ។ ក្រុមហ៊ុនអាកាសចរណ៍ T’way Air របស់កូរ៉េខាងត្បូង ក៏បានចូលរួមជាដៃគូ ដោយផ្តល់ប័ណ្ណបញ្ចុះតម្លៃសំបុត្រយន្តហោះទៅកាន់គោលដៅនានានៅអាស៊ីអាគ្នេយ៍ផងដែរ។

ផ្សារបើកចំហមួយដែលបានរៀបចំក្នុងថ្ងៃសម្ពោធនៅថ្ងៃទី៧ ខែឧសភា បានអនុញ្ញាតឱ្យភ្ញៀវទេសចរទិញផលិតផលអាស៊ានដែលដាក់តាំងបង្ហាញដោយផ្ទាល់។

ពិព័រណ៍ ASEAN Panorama នឹងបន្តរហូតដល់ថ្ងៃទី៣០ ខែកញ្ញា នៅសាល Seoul ASEAN Hall កណ្ដាលទីក្រុងសេអ៊ូល៕