អាទិភាពលើស្ថានការណ៍នៅតាមព្រំដែនជាមួយថៃ និងការយកចិត្តទុកដាក់លើការដោះស្រាយបញ្ហានានាជូនដល់ពលរដ្ឋភៀសសឹក បង្ខំឲ្យរាជរដ្ឋាភិបាលសម្រេចផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមដងទន្លេសាបនៅមុខព្រះបរមរាជវាំង រាជធានីភ្នំពេញ ដែលគ្រោងនឹងប្រព្រឹត្តទៅនៅថ្ងៃ ទី២៣ ទី២៤ និងទី២៥ ខែវិច្ឆិកា ឆ្នាំ២០២៦។
ការសម្រេចនេះត្រូវបានប្រកាសជាផ្លូវការ តាមសារាចររបស់រាជរដ្ឋាភិបាល ដែលលោកនាយករដ្ឋមន្ត្រី ហ៊ុន ម៉ាណែត បានសម្រេចកាលពីថ្ងៃទី២៥ ខែមិថុនាកន្លងទៅ។ យ៉ាងណាក៏ដោយ ការរៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមបណ្តាខេត្តនានា អាចប្រព្រឹត្តទៅជាធម្មតាតាមទំនៀមទម្លាប់ប្រពៃណី និងតាមលទ្ធភាពជាក់ស្តែងរបស់អាជ្ញាធរ និងប្រជាពលរដ្ឋ។
ទោះបីមិនមានពិធីនេះនៅភ្នំពេញក៏ដោយ ការឈប់សម្រាករបស់មន្ត្រីរាជការ និយោជិត កម្មករ ចំនួន៣ថ្ងៃ ក្នុងឱកាសព្រះរាជពិធីនេះ នៅរក្សាដដែល ដូចខ្លឹមសារដែលមានចែងក្នុងអនុក្រឹត្យស្តីពីប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ២០២៦។
បើតាមសារាចរដដែល លោក ហ៊ុន ម៉ាណែតបានណែនាំឲ្យក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត និងរដ្ឋបាលរាជធានី ខេត្ត «ត្រូវបន្តយកចិត្ត ទុកដាក់ខ្ពស់ចំពោះសុខទុក្ខ និងសហការដោះស្រាយបញ្ហានានាជូនប្រជាពលរដ្ឋភៀសសឹក យុទ្ធជននិងគ្រួសារយុទ្ធជន ដែលរងរបួស ពលី និងកំពុងឈរជើងការពារទឹកដី ព្រមទាំងអតីត យុទ្ធជន នៅតាមមូលដ្ឋានរៀងៗខ្លួន»។
សារាចរដដែលនេះក៏តម្រូវឲ្យក្រសួងការងារនិងបណ្តុះបណ្តាលវិជ្ជាជីវៈ បន្តយកចិត្តទុកដាក់ សម្របសម្រួល និងបង្កលក្ខណៈងាយស្រួលដល់ការស្វែងរកការងាររបស់ពលករខ្មែរដែលបានវិលត្រឡប់មកពីប្រទេសថៃវិញ។
លោក ហ៊ុន ម៉ាណែត ក៏ណែនាំឲ្យក្រុមការងារយកចិត្តទុកដាក់ចំពោះជីវភាពរស់នៅប្រចាំថ្ងៃ របស់ប្រជាពលរដ្ឋ និងត្រូវបន្តខិតខំពង្រឹងនិងជំរុញសេដ្ឋកិច្ចមូលដ្ឋាន ធានាស្ថិរភាពថ្លៃ ខ្សែច្រវាក់ ផលិតកម្មនិងការផ្គត់ផ្គង់ គាំទ្រការផលិតក្នុងស្រុកនិងធានាការប្រកួតប្រជែង ព្រមទាំងដោះស្រាយ នូវបញ្ហាជារចនាសម្ព័ន្ធរ៉ាំរ៉ៃនានាដែលរាំងស្ទះដល់សកម្មភាពផលិតកម្ម អាជីវកម្ម ធុរកិច្ច និង វិនិយោគ។
យោងតាមក្រសួងធនធានទឹកនឹងឧតុនិយម ឆ្នាំ២០២៦នេះ កម្ពុជានឹងប្រទេសនៅក្នុងតំបន់នឹងជួបការកើនឡើងកម្ដៅនៅរដូវប្រាំងដោយសារបាតុភូតអែលនីញ៉ូ (El Niño) បណ្តាលឱ្យរដូវប្រាំងឆ្នាំ២០២៧ ខាងមុខអាចនឹងអូសបន្លាយរយៈពេលយូរ។ ដើម្បីត្រៀមឆ្លើយតបនឹងបញ្ហានេះ លោកនាយករដ្ឋមន្ត្រីបានប្រាប់ដល់អាជ្ញាធរយកចិត្តទុកដាក់ចាត់វិធានការរក្សាទឹកឱ្យបានច្រើននៅពាក់កណ្តាលនិងចុងរដូវវស្សានេះ ដើម្បីត្រៀមបង្ការការខ្វះខាតទឹកនាពេលខាងមុខ។
អាជ្ញាធរមូលដ្ឋាន ត្រូវថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម និងបន្តអនុវត្តយ៉ាងម៉ឺងម៉ាត់នូវគោលនយោបាយ ភូមិ-ឃុំ-សង្កាត់មានសុវត្ថិភាព។ នេះបើតាមសារចរដដែល។
គិតត្រឹមថ្ងៃទី៣០ ខែមិថុនា ប្រជាពលរដ្ឋកម្ពុជាដែលជាជនភៀសសឹកចំនួន ២១ ៤២៥នាក់នៅមិនទាន់អាចត្រឡប់ទៅផ្ទះសម្បែងវិញបានដោយសារតែយោធាថៃកាន់កាប់តំបន់ដែលជាភូមិកររបស់ពួកគ ដូចជានៅភូមិព្រៃចាន់ ភូមិជោគជ័យ តំបន់បឹងត្រកួនជាដើម ឬ ដោយកត្តាសំណាល់ជាតិផ្ទុះសល់ពីសង្គ្រាម។ នេះបើតាមក្រសួងមហាផ្ទៃ៕
