កាស៊ីណូមួយកន្លែងឈ្មោះ កាស៊ីណូ ឡឺ ហ្សឹង (ROXY HOTEL & CASINO) របស់ក្រុមហ៊ុន រេន ភើល អ៊ិនវសមន លីមីធីត (Radiant Pearl Investment Limited) ស្ថិតនៅភូមិថ្នល់កែង សង្កាត់បាទី ក្រុងបាវិត ខេត្តស្វាយរៀង ត្រូវបានអគ្គលេខាធិការដ្ឋាន នៃគណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក.) សម្រេចដកហូតអាជ្ញាបណ្ណជាផ្លូវការហើយ។
តាមសេចក្តីប្រកាសព័ត៌មានរបស់គណៈកម្មការគ្រប់គ្រងល្បែងពាណិជ្ជកម្មកម្ពុជា បានឱ្យដឹងថា ការដកហូតអាជ្ញាបណ្ណ «កាស៊ីណូ ឡឺ ហ្សឹង» នេះ ត្រូវបានធ្វើឡើងតាមរយៈសេចក្ដីសម្រេចលេខ ០៤៨.គ.ល.ក.សសរ ចុះថ្ងៃទី១១ ខែមិថុនា ឆ្នាំ ២០២៦ ដោយសារកាស៊ីណូនេះ មានជាប់ពាក់ព័ន្ធនឹងការលបលួចប្រព្រឹត្តសកម្មភាពឆបោកតាមប្រព័ន្ធបច្ចេកវិទ្យា (Online Scams)។
គួររំឭកថា កាលពីថ្ងៃទី ២១ ខែឧសភា ឆ្នាំ២០២៦ ដោយមានការសម្របសម្រួលនីតិវិធីពីតំណាងអយ្យការអមសាលាដំបូងខេត្តស្វាយរៀង, ក្រុមការងារទី ១ នៃក្រុមការងារចម្រុះចំណុះលេខាធិការដ្ឋាន នៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) បានសហការជាមួយអគ្គលេខាធិការដ្ឋាន នៃ គ.ល.ក., អគ្គស្នងការដ្ឋាននគរបាលជាតិ, គណៈបញ្ជាការឯកភាពរដ្ឋបាលខេត្តស្វាយរៀង, និងគណៈបញ្ជាការឯកភាពរដ្ឋបាលក្រុងបាវិត បានធ្វើការត្រួតពិនិត្យជាក់ស្តែងលើទីតាំង កាស៊ីណូ ឡឺ ហ្សឹង នេះ។
នៅក្នុងអំឡុងពេល ប្រតិបត្តិការនេះ ក្រុមការងារចម្រុះ បានឃាត់ខ្លួនជនសង្ស័យជាជនជាតិចិន ចំនួន ២៥ នាក់ និងបានដកហូតវត្ថុតាងមួយចំនួន ដូចជា ទូរសព្ទដៃចម្រុះ, Tablets, កុំព្យូទ័រយួរដៃ, រថយន្ត និងឧបករណ៍ស្តុកទិន្នន័យកាមរ៉ាសុវត្ថិភាព (DVR) ជាដើម។ លទ្ធផលនៃការពិនិត្យលើឧបករណ៍អេឡិចត្រូនិកប្រមូលបាននេះ បង្ហាញថា កាស៊ីណូនេះ ពិតជាមានពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា ប្រាកដមែន។
ជាចំណាត់ការរបស់ គ.ល.ក. នៅក្នុងការដកហូតអាជ្ញាបណ្ណ កាស៊ីណូ ឡឺ ហ្នឹង របស់ ក្រុមហ៊ុន រេឌាន ភើល អ៊ិនវេសមេន លីមីធីត ត្រូវបានធ្វើឡើងដោយផ្អែកលើលទ្ធផល នៃប្រតិបត្តិការខាងលើ និងយោងតាមច្បាប់ស្ដីពីការគ្រប់គ្រងល្បែងពាណិជ្ជកម្ម។
បន្ថែមពីនេះ គណៈកម្មការគ្រប់គ្រងល្បែងពាណិជ្ជកម្មកម្ពុជា បានរៀបចំលិខិតជូនទៅអង្គភាពស៊ើបការណ៍ហិរញ្ញវត្ថុកម្ពុជា ស្នើសុំព័ត៌មានគណនីធនាគាររបស់ម្ចាស់របស់ក្រុមហ៊ុន និងជាអ្នកឈរឈ្មោះអាជ្ញាបណ្ណកាស៊ីណូ ដើម្បីផ្ដល់ជូនស្ថាប័នអយ្យការ អមសាលាដំបូងខេត្តស្វាយរៀង បន្តនីតិវិធីស្របតាមច្បាប់ ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ផងដែរ។
ជាថ្មីម្ដងទៀត អគ្គលេខាធិការដ្ឋាន នៃ គ.ល.ក. បានក្រើនរំលឹកដល់កម្មសិទ្ធិករ និង/ឬ ប្រតិបត្តិករ មណ្ឌល ល្បែងពាណិជ្ជកម្មសមាហរ័ណ និងល្បែងពាណិជ្ជកម្មទាំងអស់ «ត្រូវបន្តអាជីវកម្ម ស្របតាមច្បាប់ និងបទដ្ឋានគតិយុត្ត ជាធរមាន ព្រមទាំងត្រូវចៀសវាងដាច់ខាតនូវរាល់សកម្មភាពពាក់ព័ន្ធ នឹងការឆបោកតាមប្រព័ន្ធបច្ចេកវិទ្យា និងអំពើ ល្មើសច្បាប់ផ្សេងៗ»។
ជាមួយគ្នានេះ ស្របតាមបទបញ្ជារាជរដ្ឋាភិបាល លេខ ០១ បប ចុះថ្ងៃទី១៤ ខែកក្កដា ឆ្នាំ២០២៥ អគ្គលេខាធិការដ្ឋាននៃ គ.ល.ក. បានបញ្ជាក់ពីការបន្តសហការជាមួយអង្គភាព និងស្ថាប័នពាក់ព័ន្ធ ដើម្បីបន្តចុះត្រួតពិនិត្យ និងឆែកឆេរទីតាំងក្រុមហ៊ុនកាស៊ីណូ តាមផែនការដែលបានកំណត់៕

