ភ្នំពេញ៖ កម្ពុជាបានដាក់ឱ្យដំណើរការមូលនិធិហិរញ្ញប្បទានទំហំ ២០លានដុល្លារអាមេរិក ដើម្បីជួយសហគ្រាសធុនតូច និងមធ្យម (SMEs) វិនិយោគលើបច្ចេកវិទ្យាប្រើប្រាស់ថាមពលប្រកបដោយប្រសិទ្ធភាព ខណៈរាជរដ្ឋាភិបាល និងដៃគូអភិវឌ្ឍន៍រំពឹងថា គម្រោងនេះនឹងជួយកាត់បន្ថយថ្លៃដើមផលិតកម្ម ពង្រឹងសន្តិសុខថាមពល និងជំរុញការផ្លាស់ប្តូរទៅកាន់សេដ្ឋកិច្ចបៃតងរបស់កម្ពុជា។
មូលនិធិបង្វិលសម្រាប់ប្រសិទ្ធភាពថាមពល (Energy Efficiency Revolving Fund – EERF) ដែលត្រូវបានប្រកាសដាក់ឱ្យដំណើរការជាផ្លូវការនៅថ្ងៃទី២ ខែកក្កដា ត្រូវបានគាំទ្រដោយធនាគារអភិវឌ្ឍន៍អាស៊ី (ADB) សហការជាមួយក្រសួងរ៉ែ និងថាមពល ក្រសួងសេដ្ឋកិច្ច និងហិរញ្ញវត្ថុ ធនាគារ SME នៃកម្ពុជា សាជីវកម្មធានាឥណទានកម្ពុជា (CGCC) ធនាគារ CIMB Bank PLC និងធនាគារ Foreign Trade Bank (FTB)។
នេះជាយន្តការហិរញ្ញប្បទានដំបូងបង្អស់របស់កម្ពុជា ដែលផ្តោតជាពិសេសលើការវិនិយោគសម្រាប់ការប្រើប្រាស់ថាមពលប្រកបដោយប្រសិទ្ធភាពក្នុងវិស័យឯកជន។
មូលនិធិនេះមានគោលបំណងជំរុញការអនុវត្តគោលនយោបាយជាតិស្តីពីប្រសិទ្ធភាពថាមពល តាមរយៈការជួយឱ្យសហគ្រាសអាចកាត់បន្ថយការប្រើប្រាស់អគ្គិសនី និងបង្កើនសមត្ថភាពប្រកួតប្រជែង។
បច្ចុប្បន្ន សហគ្រាសធុនតូច និងមធ្យមមានចំនួនជាង ៩០ភាគរយ នៃសហគ្រាសទាំងអស់ដែលកំពុងប្រតិបត្តិការនៅកម្ពុជា។
លោកស្រី យ៉ាសមីន ស៊ីឌីគី (Yasmin Siddiqi) នាយិកា ADB ប្រចាំកម្ពុជា បានថ្លែងថា ការបង្កើតមូលនិធិនេះស្របពេលដែលពិភពលោកកំពុងប្រឈមនឹងភាពមិនច្បាស់លាស់ផ្នែកថាមពល ដោយសារជម្លោះនៅមជ្ឈិមបូព៌ា ដែលបានបង្ហាញពីសារៈសំខាន់នៃការពង្រឹងសន្តិសុខថាមពល និងភាពធន់នៃសេដ្ឋកិច្ច។
លោកស្រីឱ្យដឹងថា៖ «មូលនិធិបង្វិលសម្រាប់ប្រសិទ្ធភាពថាមពល គឺជាយន្តការប្រកបដោយនវានុវត្តន៍ ដែលបំពេញបន្ថែមដល់កំណែទម្រង់ដែល ADB កំពុងគាំទ្រ ដើម្បីពន្លឿនការផ្លាស់ប្តូរទៅកាន់ថាមពលស្អាត និងលើកកម្ពស់ហិរញ្ញវត្ថុប្រកបដោយបរិយាបន្ន និងចីរភាព»។
លោកស្រីបន្តថា៖ «តាមរយៈការនាំយកភាគីរដ្ឋាភិបាល និងឯកជនមកធ្វើការរួមគ្នា គំនិតផ្តួចផ្តើមនេះមានគោលបំណងកៀរគរវិនិយោគបន្ថែមពីវិស័យឯកជនទៅលើប្រសិទ្ធភាពថាមពល ពង្រីកលទ្ធភាពទទួលបានហិរញ្ញប្បទានសម្រាប់សហគ្រាស និងត្រួសត្រាយផ្លូវឆ្ពោះទៅរកសេដ្ឋកិច្ចដែលមានភាពប្រកួតប្រជែង កាបោនទាប និងមានភាពធន់»។
លោកស្រីបានបន្ថែមថា ជម្លោះដែលកំពុងបន្តនៅមជ្ឈិមបូព៌ាបានបង្ហាញថា ប្រទេសនានាចាំបាច់ត្រូវកាត់បន្ថយការពឹងផ្អែកលើការនាំចូលថាមពល ដើម្បីធានាសន្តិសុខថាមពលរយៈពេលវែង។
មូលនិធិនេះមានទុនដំបូងចំនួន ២០លានដុល្លារ ក្នុងនោះ ១២លានដុល្លារបានមកពីចក្រភពអង់គ្លេស តាមរយៈមូលនិធិ ASEAN Catalytic Green Finance Facility និង ៨លានដុល្លារពីមូលនិធិ Green Climate Fund ក្រោមកម្មវិធី ACGF Green Recovery Programme។ មូលនិធិនេះជាផ្នែកមួយនៃកម្មវិធីអភិវឌ្ឍន៍វិស័យការផ្លាស់ប្តូរថាមពលរបស់កម្ពុជា ដែលទទួលបានការគាំទ្រពី ADB។
តាមរយៈធនាគារពាណិជ្ជជាដៃគូ សហគ្រាសដែលមានសិទ្ធិអាចស្នើសុំឥណទានអនុគ្រោះ ដើម្បីជំនួសម៉ាស៊ីន និងបរិក្ខារចាស់ៗ ដោយបច្ចេកវិទ្យាប្រើប្រាស់ថាមពលប្រកបដោយប្រសិទ្ធភាព ដែលអាចកាត់បន្ថយវិក្កយបត្រអគ្គិសនី បង្កើនផលិតភាព និងកាត់បន្ថយការពឹងផ្អែកលើការនាំចូលថាមពល។
លោក ទី នរិន្ទ រដ្ឋលេខាធិការប្រចាំការ ក្រសួងរ៉ែ និងថាមពល បានឱ្យដឹងថា ការប្រើប្រាស់ថាមពលប្រកបដោយប្រសិទ្ធភាព គឺជាសសរស្តម្ភសំខាន់នៃយុទ្ធសាស្ត្រថាមពលរយៈពេលវែងរបស់កម្ពុជា។
លោកបានចាត់ទុកប្រសិទ្ធភាពថាមពលថាជា «ឥន្ធនៈទីមួយ» (First Fuel) របស់កម្ពុជា ដោយលើកឡើងថា ការកាត់បន្ថយតម្រូវការប្រើប្រាស់អគ្គិសនី គឺជាវិធីដែលមានប្រសិទ្ធភាព និងចំណាយតិចបំផុតក្នុងការពង្រឹងសន្តិសុខថាមពល និងជំរុញកំណើនសេដ្ឋកិច្ច។
លោកបានថ្លែងថា៖ «កម្ពុជាបានកំណត់គោលដៅមហិច្ឆតា ដោយមានបំណងឱ្យសមត្ថភាពផលិតថាមពលកកើតឡើងវិញឈានដល់ ៧០ភាគរយ នៅឆ្នាំ២០៣០ និងកាត់បន្ថយការប្រើប្រាស់ថាមពលសរុបឱ្យបាន ១៩ភាគរយ បើធៀបនឹងស្ថានភាពធម្មតា»។
លោកបន្តថា៖ «គោលដៅទាំងនេះឆ្លុះបញ្ចាំងពីការប្តេជ្ញាចិត្តរបស់កម្ពុជា មិនត្រឹមតែចំពោះការប្រែប្រួលអាកាសធាតុប៉ុណ្ណោះទេ ប៉ុន្តែថែមទាំងសន្តិសុខថាមពល ការប្រកួតប្រជែងផ្នែកសេដ្ឋកិច្ច និងការអភិវឌ្ឍប្រកបដោយចីរភាពផងដែរ»។
លោកបានបន្ថែមថា កម្ពុជាមិនអាចផ្តោតតែទៅលើការបង្កើនការផលិតថាមពលស្អាតនោះទេ ប៉ុន្តែត្រូវធ្វើឱ្យការប្រើប្រាស់ថាមពលកាន់តែមានប្រសិទ្ធភាពនៅក្នុងវិស័យឧស្សាហកម្ម អគារពាណិជ្ជកម្ម និងវិស័យផ្សេងៗទៀត។
មូលនិធិនេះនឹងត្រូវអនុវត្តដោយធនាគារ SME នៃកម្ពុជា ខណៈសាជីវកម្មធានាឥណទានកម្ពុជា នឹងផ្តល់ការធានាឥណទានដោយស្ម័គ្រចិត្តដល់ធនាគារពាណិជ្ជជាដៃគូ ដើម្បីលើកទឹកចិត្តឱ្យមានការផ្តល់ឥណទានដល់សហគ្រាសដែលខ្វះទ្រព្យបញ្ចាំ។
លោក ផាន ផល្លា រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលធនាគារ SME នៃកម្ពុជា បានលើកឡើងថា មូលនិធិនេះជាលទ្ធផលនៃកិច្ចសហការជាច្រើនឆ្នាំ រវាងរាជរដ្ឋាភិបាល និងដៃគូអភិវឌ្ឍន៍ ក្នុងការប្រែក្លាយគោលនយោបាយប្រសិទ្ធភាពថាមពលទៅជាយន្តការហិរញ្ញប្បទានជាក់ស្តែង។
លោកបានថ្លែងថា៖ «នៅពេលយើងរៀបចំយុទ្ធសាស្ត្រប្រសិទ្ធភាពថាមពលកាលពីប៉ុន្មានឆ្នាំមុន យើងមានយុទ្ធសាស្ត្ររួចហើយ ប៉ុន្តែមិនទាន់មានយន្តការហិរញ្ញប្បទានសម្រាប់អនុវត្តនៅឡើយទេ»។
លោកបន្តថា៖ «មូលនិធិបង្វិលនេះ គឺជាយន្តការជាក់ស្តែង ដែលជួយប្រែក្លាយយុទ្ធសាស្ត្រទៅជាការអនុវត្ត»។
គម្រោងនេះនឹងគាំទ្រដល់ការវិនិយោគលើបរិក្ខារសន្សំសំចៃថាមពល បច្ចេកវិទ្យាថាមពលកកើតឡើងវិញ និងដំណោះស្រាយនវានុវត្តន៍ផ្សេងៗ ដែលជួយបង្កើនផលិតភាព និងកាត់បន្ថយថ្លៃដើមអាជីវកម្ម។
ធនាគារ CIMB Bank PLC និងធនាគារ Foreign Trade Bank (FTB) គឺជាធនាគារពាណិជ្ជដំបូង ដែលចូលរួមផ្តល់ឥណទានក្រោមមូលនិធិនេះ។
លោក ហេង វុទ្ធី អគ្គនាយកប្រតិបត្តិស្តីទីរបស់ CIMB Bank បានលើកឡើងថា សហគ្រាសកំពុងប្រឈមនឹងសម្ពាធកាន់តែខ្លាំងក្នុងការកាត់បន្ថយថ្លៃដើមផលិតកម្ម និងអនុវត្តអាជីវកម្មប្រកបដោយចីរភាព។
លោកបាននិយាយថា៖ «ដំណោះស្រាយហិរញ្ញប្បទាននេះ នឹងជួយសហគ្រាស ជាពិសេសសហគ្រាសធុនតូច និងមធ្យម ឱ្យទទួលបានហិរញ្ញប្បទានក្នុងលក្ខខណ្ឌអនុគ្រោះ ដើម្បីវិនិយោគលើប្រសិទ្ធភាពថាមពល បច្ចេកវិទ្យាទំនើប និងគម្រោងផ្លាស់ប្តូរថាមពល»។
ចំណែកលោក ឌិត សុចល អគ្គនាយកប្រតិបត្តិធនាគារ FTB បានលើកឡើងថា ការកាត់បន្ថយចំណាយលើថាមពល គឺជាគន្លឹះមួយសម្រាប់បង្កើនសមត្ថភាពប្រកួតប្រជែងរបស់សហគ្រាសកម្ពុជា និងគាំទ្រគោលដៅថាមពលស្អាតរបស់ប្រទេស។
យោងតាមការវាយតម្លៃទីផ្សាររបស់ ADB កម្ពុជា ត្រូវការវិនិយោគយ៉ាងហោចណាស់ ២៣៥លានដុល្លារ សម្រាប់គម្រោងប្រសិទ្ធភាពថាមពលក្នុងវិស័យឧស្សាហកម្ម និងប្រមាណ ១,២ពាន់លានដុល្លារ សម្រាប់អគារពាណិជ្ជកម្ម ដើម្បីសម្រេចគោលដៅកាត់បន្ថយការប្រើប្រាស់ថាមពលនៅឆ្នាំ២០៣០។
មន្ត្រីបានបញ្ជាក់ថា មូលនិធិថ្មីនេះ មានគោលបំណងជំរុញការវិនិយោគពីវិស័យឯកជនឱ្យកាន់តែច្រើន តាមរយៈការបង្ហាញថា ការវិនិយោគលើប្រសិទ្ធភាពថាមពលអាចផ្តល់ផលចំណេញផ្នែកពាណិជ្ជកម្ម និងជំរុញឱ្យស្ថាប័នហិរញ្ញវត្ថុបន្ថែមចូលរួមក្នុងទីផ្សារនេះ។
ក្រៅពីជួយកាត់បន្ថយថ្លៃអគ្គិសនី គម្រោងនេះក៏ត្រូវបានរំពឹងថា នឹងរួមចំណែកដល់ការកាត់បន្ថយការបញ្ចេញឧស្ម័នផ្ទះកញ្ចក់ កាត់បន្ថយការពឹងផ្អែកលើការនាំចូលថាមពល និងជំរុញការប្រើប្រាស់បច្ចេកវិទ្យាស្អាតកាន់តែទូលំទូលាយក្នុងវិស័យឯកជន។
