លោកស្រី Caroline Vik ប្រធានមន្ត្រីគោលនយោបាយនៃសាជីវកម្មហិរញ្ញវត្ថុអភិវឌ្ឍន៍អន្តរជាតិសហរដ្ឋអាមេរិក (DFC) បានស្ងើចសរសើរយ៉ាងខ្លាំងចំពោះការរចនានៃព្រលានយន្តហោះអន្តរជាតិតេជោ (TIA) នៅពេលលោកស្រីបានមកបំពេញទស្សនកិច្ចនៅព្រះរាជាណាចក្រកម្ពុជាកាលពីខែមិថុនាកន្លងទៅ។
លោកស្រីបានថ្លែងក្នុងសន្និសីទសារព័ត៌មានតាមប្រព័ន្ធវីដេអូនៅថ្ងៃនេះ ទី៨ ខែកក្កដា ថា៖ «វាគឺជាព្រលានយន្តហោះដ៏ស្រស់ស្អាតបំផុតមួយដែលខ្ញុំមិនធ្លាប់បានឃើញពីមុនមក ហើយស្ថាប័ន DFC មានមោទនភាពក្នុងការគាំទ្រកម្ពុជាលើគម្រោងនេះ»។
ក្នុងអំឡុងពេលទស្សនកិច្ចក្នុងខែមិថុនា លោកស្រី Vik បានចុះហត្ថលេខាលើលិខិតបង្ហាញឆន្ទៈ ឬ Letter of Intent ដែលនិយាយអំពីការផ្តល់ហិរញ្ញប្បទានយុទ្ធសាស្ត្រចំនួន ១០០ លានដុល្លារ សម្រាប់ព្រលានយន្តហោះអន្តរជាតិតេជោ ជាមួយក្រុមហ៊ុនវិនិយោគទុនអាណិកជនកម្ពុជា (OCIC)។
លោកស្រីបានកត់សម្គាល់ថា៖ «ខ្ញុំក៏មានកិត្តិយសផងដែរដែលបានចូលរួមក្នុងពិធីចុះហត្ថលេខាក្នុងនាមជានាយកប្រតិបត្តិរបស់យើងគឺលោក Benjamin Black សម្រាប់ការផ្តល់ហិរញ្ញប្បទានរបស់ DFC ដល់ព្រលានយន្តហោះអន្តរជាតិថ្មីស្រឡាងរបស់ភ្នំពេញ»។
បើតាមលោកស្រី Vik ស្ថាប័ន DFC របស់អ្នកស្រីកំពុងធ្វើការជាមួយវិស័យឯកជនដើម្បីជំរុញផលប្រយោជន៍ការទូត និងសេដ្ឋកិច្ចរបស់សហរដ្ឋអាមេរិក និងជំរុញកំណើនសេដ្ឋកិច្ចសម្រាប់សម្ព័ន្ធមិត្ត និងដៃគូរបស់អាមេរិក ដោយមានកញ្ចប់ថវិកាចំនួន ២០៥ ពាន់លានដុល្លារ សម្រាប់ផ្ដល់ទៅប្រទេសនានា នៅជុំវិញពិភពលោក។ មូលនិធិនេះនឹងត្រូវបានផ្តល់ជូនក្នុងទម្រង់ជាកម្ចី មូលធន ការធានារ៉ាប់រងហានិភ័យនយោបាយ ការធានាកម្ចី និងការអភិវឌ្ឍគម្រោងដែលប្រើប្រាស់សម្រាប់ដំណាក់កាលដំបូងនៃគម្រោង ដូចជាការសិក្សាលទ្ធភាព និងការងារស្រដៀងគ្នាផ្សេងទៀត។
លោកស្រី Caroline បានបញ្ជាក់ថា សហរដ្ឋអាមេរិកចង់ក្លាយជាដៃគូដ៏ល្អបំផុតរបស់តំបន់ និងជា «ជម្រើសដំបូងគេ» (First call) ដោយថ្លែងថា៖ «ប្រសិនបើមានគម្រោងអាទិភាពខ្ពស់ដែលរដ្ឋាភិបាលចង់ធ្វើ យើងចង់ដឹងឮអំពីគម្រោងទាំងនោះ ហើយនឹងព្យាយាមគាំទ្រតាមដែលអាចធ្វើទៅបាន»។
ក្នុងអំឡុងពេលទស្សនកិច្ចនៅកម្ពុជា កាលពីខែមិថុនា លោកស្រីបានជួបជាមួយលោក ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា (CDC) ក៏ដូចជាលោក កែវ រតនៈ រដ្ឋមន្ត្រីក្រសួងរ៉ែ និងថាមពល ដោយលោករដ្ឋមន្ត្រីបានចែករំលែកជាមួយលោកស្រីនូវផែនការហេដ្ឋារចនាសម្ព័ន្ធជាតិដ៏មហិច្ឆតាសម្រាប់កំពង់ផែ ការតភ្ជាប់ផ្លូវសមុទ្រ ការផលិតថាមពល និងការតភ្ជាប់ក្នុងតំបន់។
លោកស្រីបានកត់សម្គាល់ថា ភាគីទាំងពីរក៏បានពិភាក្សាអំពីឱកាសនានាលើប្រធានបទមួយចំនួន រួមមាន ឧស្ម័ន ប្រភពថាមពលផ្សេងទៀត បណ្តាញទូរស័ព្ទចល័ត ខ្សែកាបអុបទិក និងមជ្ឈមណ្ឌលផ្ទុកទិន្នន័យ (Data centers)។
នៅក្នុងសន្និសីទតាមវីដេអូនាថ្ងៃនេះ លោកស្រីត្រូវបានសួរ ថាតើមានការវិនិយោគសក្តានុពលផ្សេងទៀតរបស់សហរដ្ឋអាមេរិកនៅក្នុងប្រទេសកម្ពុជាដែលស្ថិតក្នុងផែនការដែរឬទេ។
លោកស្រីបានប្រាប់ភ្នំពេញប៉ុស្តិ៍ថា៖ «ពិតប្រាកដណាស់។ យើងមានកិច្ចប្រជុំដ៏ល្អ និងមានផលិតភាពខ្ពស់ជាមួយរដ្ឋាភិបាលកម្ពុជា។ យើងមានក្តីរំភើបក្នុងការរឹតចំណងភាពជាដៃគូលើការវិនិយោគឱ្យកាន់តែស៊ីជម្រៅ។ ពួកគាត់បានស្នើនូវឱកាសគួរឱ្យចាប់អារម្មណ៍ជាច្រើនដែលស្របទៅនឹងគោលដៅរបស់យើង ហើយយើងទន្ទឹងរង់ចាំធ្វើការងារយ៉ាងជិតស្និទ្ធជាមួយពួកគេដើម្បីជំរុញគម្រោងទាំងនេះ»។
លោកស្រីបានបន្ថែមថា៖ «ស្រដៀងគ្នានេះដែរ កិច្ចប្រជុំជាមួយវិស័យឯកជននៅកម្ពុជាគឺមានភាពទាក់ទាញយ៉ាងខ្លាំង ដោយមានគម្រោងល្អៗជាច្រើនក្នុងវិស័យភស្តុភារកម្ម ផ្លូវល្បឿនលឿន និងវិស័យផ្សេងៗទៀតដែលយើងសង្ឃឹមថានឹងជំរុញឱ្យមានការរីកចម្រើន»៕
