ភ្នំពេញ÷ ជនជាតិចិន៤នាក់ ត្រូវបានកម្លាំងសមត្ថកិច្ច ព្រហ្មទណ្ឌខណ្ឌសែនសុខ សហការជាមួយនគរបាលព្រហ្មទណ្ឌកំរិតធ្ងន់ នៃស្នងការនគរបាលរាជធានីភ្នំពេញ ស្រាវជ្រាវឃាត់ខ្លួនបន្ទាប់ពីធ្វើសកម្មភាពចាប់បង្ខាំងជនជាតិចិន ដែលជាបុគ្គលិកក្រុមហ៊ុនលក់រថយន្ត Hydra ហើយភ្ជង់ជំរាមបាញ់សម្លាប់ ជំរិតទារប្រាក់ចំនួន០១លាន $ មិនបានសម្រច រួចដឹកជនរងគ្រោះយកទៅទម្លាក់ចោល ។
ហេតុការណ៍ចាប់បង្ខាំងមនុស្សដោយខុសច្បាប់ និងជំរិតទារប្រាក់នេះ កើតឡើងកាលពីយប់ថ្ងៃទី ២៦ ខែកក្កដា ឆ្នាំ ២០២៦ នៅចំណុចផ្ទះលេខ៨ ផ្លូវបេតុង បុរីវ៉ារីណា ភូមិជាងទង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
ជនសង្ស័យ ដែលត្រូវឃាត់ខ្លួន រួមមាន :
១- ឈ្មោះ YE SHENGJIANG ភេទប្រុស អាយុ ៣៦ឆ្នាំ ជនជាតិចិន មុខរបរមិនពិតប្រាកដគ្មានលិខិត ឆ្លងដែន ស្នាក់នៅផ្ទះជួល ផ្លូវបេតុង ភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ (ឃាត់ខ្លួន គ្មានសារធាតុញៀន) ។
២- ឈ្មោះ QIAO GEZI ភេទប្រុស អាយុ ៤៤ឆ្នាំ ជនជាតិចិន មុខរបរ មិនពិតប្រាកដ ស្នាក់នៅអគារ ហ្វូលី ផ្លូវ៥០ម៉ែត្រ សង្កាត់ដង្កោ ខណ្ឌដង្កោ រាជធានីភ្នំពេញ ។
៣- ឈ្មោះ ZHANG WEI ភេទប្រុស អាយុ ៣៦ឆ្នាំ ជនជាតិចិន មុខរបរ មិនពិតប្រាកដ ស្នាក់នៅមិន ប្រាកដ ។
៤- ឈ្មោះ LI MING ភេទប្រុស អាយុ ៤០ឆ្នាំ ជនជាតិចិន មុខរបរ មិនពិតប្រាកដ ស្នាក់នៅផ្ទះ(មិនពិតប្រាកដ) ។
ចំណែកឯជនរងគ្រោះ ឈ្មោះ LI MINGJIE ភេទប្រុស អាយុ ៤៦ឆ្នាំ ជនជាតិចិន មុខរបរ បុគ្គលិកក្រុមហ៊ុនលក់រថយន្ត Hydra ផ្ទះលេខ៤៦០ ផ្លូវបេតុង ភូមិព្រៃសាលា សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចខណ្ឌសែនសុខឲ្យដឹងថា ជនសង្ស័យជាជន ជាតិចិនទាំង៤នាក់ ត្រូវបានកម្លាំងជំនាញព្រហ្មទណ្ឌខណ្ឌសែនសុខ ដឹកនាំដោយ លោក វរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ សហការជាមួយនគរបាលប៉ុស្តិ៍ក្រាំងធ្នង់ និងកម្លាំងនគរបាលព្រហ្មទណ្ឌកំរិតធ្ងន់ នៃស្នងការនគរបាលរាជធានីភ្នំពេញ បានធ្វើការស្រាវជ្រាវ ហើយឃាត់ខ្លួនជាបន្តបន្ទាប់កាលពីវេលាថ្ងៃត្រង់ ទី២៩ ខែកក្កដា ឆ្នាំ២០២៦ នៅក្នុង(បុរីយាមបញ្ញា) ភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
សមត្ថកិច្ចខណ្ឌសែនសុខ បានបន្តអោយដឹងទៀតថា កាលពីថ្ងៃទី ២៦ ខែកក្កដា ឆ្នាំ ២០២៦ វេលាម៉ោងប្រហែល២១:៣០នាទី ជនសង្ស័យ ០១នាក់ បានឆាតតាម Tiktok ចង់ជួបជនរងគ្រោះ LI MINGJIE ដែលស្គាល់គ្នា តាម Tiktok កាលពីអំឡុងឆ្នាំ ២០២៤ ដោយនិយាយគ្នារឿងរកស៊ី រួចជនសង្ស័យបានសុំតេឡេក្រាមរបស់ជនរងគ្រោះ ឆាតនិយាយចង់ទិញសំបុកត្រចៀកកាំ ដោយជនរងគ្រោះស្គាល់កន្លែងលក់បោះដុំសំបុត្រត្រចៀកកាំ និងបានណាត់ជួបគ្នា នៅផ្ទះលេខ៨ ផ្លូវបេតុង បុរីវ៉ារីណា ភូមិជាងទង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
សមត្ថកិច្ចបានឲ្យដឹងទៀតថា ខណៈនោះ ជនរងគ្រោះបានបើករថយន្ត ម៉ាក Pursh ពណ៌ទឹកប្រាក់ ស៊េរី២០០៦ ស្លាកលេខភ្នំពេញ 2T-3727 តែម្នាក់ឯង ទៅដល់ទីតាំងផ្ទះរបស់ជនសង្ស័យ ដែលមានបក្សពួកចំនួន០៣នាក់ទៀត នៅចាំរួចជាស្រេច ។ បន្ទប់ពីអង្គុយផឹកតែ និយាយគ្នា ស្រាប់តែជនសង្ស័យបានធ្វើសកម្មភាព ព្រួតគ្នាចាប់ជនរងគ្រោះ យកខ្សែជ័រមកចងដៃទាំងពីរ របស់ជនរងគ្រោះ ព័ទ្ធមកក្រោយជាប់។
រួចក្រុមជនសង្ស័យបានធ្វើសកម្មភាព វាយតប់លើជនរងគ្រោះ នឹងដៃជើង បណ្តាលឲ្យជនរងគ្រោះ របួសជាំដៃជើងសងខាង និងជាំក្រហមភ្នែកខាងស្តាំហើយជនសង្ស័យ០១នាក់ បានយកអាវុធខ្លី០១ដើមភ្ជង់ ចាក់បុកចំភ្លៅជើងខាងស្ដាំ និងភ្ជង់ចង្កេះគំរាមបាញ់ និងជំរិតទារប្រាក់ចំនួន០១លានដុល្លារ ពេលនោះជនរងគ្រោះថា អត់មានប្រាក់ទេ! ក្រុមជនសង្ស័យពុំជឿ ក៏បានចាប់យកទូរសព្ទដៃរបស់ជនរងគ្រោះ ឆែកមើល ពុំឃើញមានប្រាក់នៅក្នុងកុងធនាគារ ក៏ប្រគល់ទូរសព្ទដៃ ឲ្យជនរងគ្រោះវិញហើយក្រុមជនសង្ស័យ បានបើករថយន្តម៉ាក LUXIS ពណ៌ខ្មៅ ដឹកយកជន រងគ្រោះទៅទម្លាក់ចោល នៅដីវាលស្ងាត់មួយកន្លែង ។ ចំណែករថយន្តម៉ាក Pursh របស់ជនរងគ្រោះ ត្រូវបានក្រុមជនសង្ស័យ បើកយកទៅប្លុងចោល នៅក្បែរៗនោះដែរ ។
តាមព័ត៌មានបានឲ្យដឹងទៀតថា ក្រោយមក ជនរងគ្រោះទៅយករថយន្ត ជិះត្រឡប់មកផ្ទះវិញ ហើយត្រួតពិនិត្យ បាត់លិខិតឆ្លងដែនជនជាតិចិន០១ក្បាល, កាតការងារជនបរទេស០១សន្លឹក, កាតគ្រីរថយន្ត (ម៉ាកសឺដេស) ចំនួន០២សន្លឹក (របស់ថៅកែជនរងគ្រោះ) ។
សមត្ថកិច្ចបានឲ្យដឹងទៀតថា ដោយសារតែបាត់បង់សម្ភារនៅក្នុងរថយន្ត នៅព្រឹកថ្ងៃទី ២៧ ខែកក្កដា ឆ្នាំ ២០២៦ ជនរងគ្រោះ ក៏បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលក្រាំងធ្នង់ ឲ្យជួយស្រាវជ្រាវ ហើយឈានទៅឆែកឆេរតាមកាមេរ៉ាសុវត្ថិភាព ឃើញរថយន្តម៉ាក LUXIS ពណ៌ខ្មៅ ស្លាកលេខ កម្ពុជា V.B.8898 ជារថយន្ត ដែលក្រុមជនសង្ស័យបើកធ្វើសកម្មភាពដឹកជនរងគ្រោះ យកទៅទម្លាក់ទុកចោល ហើយបន្តស្រាវជ្រាវតាមជំនាញរបស់សមត្ថកិច្ច រហូតឈានទៅឃាត់បានជនសង្ស័យជាបន្តបន្ទាប់ ចំនួន០៤នាក់ និងដកហូតសម្ភារៈ រួមមាន :
– ខ្សែជ័ររិត ចំនួន០១ថង់
– កាំបិតចុងស្រួច ចំនួន០២ដើម ផ្លាស្ទិចបកបិទ
– ស្លាកលេខរថយន្ត សរុបចំនួន០៨សន្លឹក (លេខភ្នំពេញ 2BF-6759 ចំនួន០២សន្លឹក ភ្នំពេញ 2BD-3356 ភ្នំពេញ 2BY-8875, ភ្នំពេញ 2BK-2358 ចំនួន០២សន្លឹក, ភ្នំពេញ 2BL-5578 ចំនួន០២សន្លឹក)
– អាវុធខ្លី០១ដើមម៉ាកស៊ូរ៉ាគី បង់០១ និងគ្រាប់ចំនួន០៦
– រថយន្តម៉ាក LUXIS ពណ៌ខ្មៅ ស្លាកលេខ កម្ពុជា V.B.8898 មួយគ្រឿង ។
ជនសង្ស័យ ឈ្មោះ YE SHENGJIANG បានសារភាពថា ខ្លួន និងបក្ខពួក០៣នាក់ទៀត ពិតជាបានធ្វើសកម្មភាពចាប់ជនរងគ្រោះ វាយដំ និងប្រើអាវុធខ្លី ភ្ជង់ជំរិតទារប្រាក់ពិតប្រាកដមែន ៕
