លោកឧបនាយករដ្ឋមន្រ្តី ស សុខា រដ្ឋមន្រ្តីក្រសួងមហាផ្ទៃ បានអះអាងថា ការផ្អាកការរឹតបន្តឹងអនុវត្តច្បាប់ ស្តីពីចរាចរណ៍ផ្លូវគោក ក្នុងឆមាសទី១ ឆ្នាំ២០២៦នេះ បានធ្វើគ្រោះថ្នាក់ចរាចរណ៍ផ្លូវគោកទូទាំងប្រទេស បានកើនឡើងគួរឱ្យកត់សម្គាល់ ហើយលោកបានស្នើទៅលោកនាយករដ្ឋមន្រ្តី ហ៊ុន ម៉ាណែត សុំឱ្យអនុវត្តការរឹតបន្តឹងច្បាប់ចរាចរណ៍ផ្លូវគោកឡើងវិញ ចាប់ពីថ្ងៃទី១ ខែកញ្ញា ឆ្នាំ២០២៦តទៅ។
តាមរបាយការណ៍ស្តីពីកំណើនគ្រោះថ្នាក់ចរាចរណ៍ផ្លូវគោក ក្នុងឆមាសទី១ ឆ្នាំ២០២៦ ដែលបានជម្រាបជូនលោក ហ៊ុន ម៉ាណែត កាលពីថ្ងៃទី ៣០ ខែកក្កដា លោក ស សុខា បានឱ្យដឹងថា គណៈកម្មាធិការជាតិសុវត្ថិភាពចរាចរណ៍ផ្លូវគោក (គសចគ) បានខិតខំបំពេញភារកិច្ចរក្សាសុវត្ថិភាពចរាចរណ៍ផ្លូវគោក ទទួលបានលទ្ធផលល្អប្រសើរ ដោយសម្រេចបានកាត់បន្ថយអត្រាស្លាប់
ដោយគ្រោះថ្នាក់ចរាចរណ៍ផ្លូវគោកចំនួន៥% ជារៀងរាល់ឆ្នាំក្នុងរយៈពេល៣ឆ្នាំបន្តបន្ទាប់ គិតពីឆ្នាំ ២០២៣ ដល់ឆ្នាំ ២០២៥។
អត្រានេះ គឺស្របតាមផែនការទសវត្សសុវត្ថិភាពចរាចរណ៍ឆ្នាំ ២០២១-២០៣០ របស់អង្គការសហប្រជាជាតិ។ ប៉ុន្តែក្នុងឱកាសផ្អាកការរឹតបន្តឹងអនុវត្តច្បាប់ ស្តីពីចរាចរណ៍ផ្លូវគោកក្នុងឆមាសទី១ ឆ្នាំ២០២៦ គ្រោះថ្នាក់ចរាចរណ៍ផ្លូវគោកទូទាំងប្រទេសបានកើនឡើងគួរឱ្យកត់សម្គាល់ បើទោះបីជា គសចគ បានបន្តអនុវត្តផែនការសកម្មភាពយ៉ាងសកម្ម ដូចជាជំរុញការអប់រំផ្សព្វផ្សាយច្បាប់ និងបទដ្ឋានសុវត្ថិភាពចរាចរណ៍ ការកែលម្អ បរិស្ថានផ្លូវថ្នល់ ការគ្រប់គ្រងលក្ខណៈបច្ចេកទេសយានយន្ត ការចាប់ផ្តើមអនុវត្ដកែប្រែរថយន្តដឹកកម្មករពីឈរមកអង្គុយ និងការសាងសង់សួនសុវត្ថិភាពចរាចរណ៍តាមសាលារៀន ជាដើម។
លោក ស សុខា បញ្ជាក់ថា៖ «ធៀបនឹងរយៈពេលដូចគ្នានៃឆ្នាំ២០២៥ គ្រោះថ្នាក់ចរាចរណ៍ផ្លូវគោក (ក្នុងឆមាសទី១ ឆ្នាំ២០២៦) មានកំណើន ២១៣លើក ស្មើ២០% (១ ២៧៩លើក លើ ១០៦៦លើក) ចំនួនអ្នកស្លាប់មានកំណើន ៧៩នាក់ ស្មើ១១% (៧៧៣នាក់ លើ ៦៩៤នាក់) និងចំនួនអ្នករបួសមានកំណើន ៤៦៨ នាក់ ស្មើ៣២% (១ ៩៤៤នាក់ លើ ១ ៤៧៦នាក់)»។
នៅក្នុងគ្រោះថ្នាក់ទាំងនេះ បានកើតឡើងដោយមូលហេតុ ការបើកបរក្នុងល្បឿនលឿន ៤៦% ការមិនគោរពសិទ្ធិអាទិភាព ២២% ការមិនប្រកាន់ស្តាំ ១២% ការវ៉ាជែង ៧% ការបត់មិនប្រយ័ត្នចំនួន ៦% ការបើកបរក្នុងស្ថានភាពស្រវឹង ៤% ការមិនគោរពសញ្ញាចរាចរណ៍ ២% និងកត្តាយាន ១%។
នៅក្នុងនោះគ្រោះថ្នាក់កើតឡើងច្រើន នៅរាជធានីភ្នំពេញចំនួន ៤៦១លើក ខេត្តព្រះសីហនុ ៩២លើក ខេត្តកណ្តាល ៧៥លើក ខេត្តកំពង់ស្ពឺចំនួន ៥៧លើក និងខេត្តស្វាយរៀងចំនួន ៥៥លើក។ លោក ស សុខា សង្កត់ធ្ងន់ថា៖ «ភាគច្រើន លើសលប់នៃការបង្កគ្រោះថ្នាក់ គឺបណ្ដាលពីកត្តាអ្នកបើកបរយានយន្តមិនគោរពច្បាប់ ឬធ្វេសប្រហែស ដែលអាចបញ្ជាក់បានថា ស្មារតីអ្នកបើកបរ ខ្លាចនគរបាល ជាងខ្លាចច្បាប់»។
ជាមួយគ្នានេះ ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍ អត្រាស្លាប់ របួស និងការខូចខាតទ្រព្យសម្បត្តិ រួមចំណែក ជំរុញការអនុវត្តគោលនយោបាយកាត់បន្ថយភាពក្រីក្ររបស់រាជរដ្ឋាភិបាល លោក ស សុខា បានស្នើសុំគោលការណ៍អនុញ្ញាតចាត់វិធានការ ទី១ ស្នើសុំអនុវត្តវិធានការរឹតបន្តឹងច្បាប់ស្តីពីចរាចរណ៍ផ្លូវគោកឡើងវិញ ចាប់ពីថ្ងៃទី១ ខែកញ្ញា ឆ្នាំ២០២៦តទៅ បន្ទាប់ពីបានផ្អាកដោយសារស្ថានការណ៍សង្គ្រាមតាមព្រំដែន និងវិបត្តិសេដ្ឋកិច្ចសកលដោយសង្គ្រាមនៅមជ្ឈឹមបូព៌ា។
ទី២ ការរឹតបន្តឹងអនុវត្តច្បាប់ស្ដីពីចរាចរណ៍ផ្លូវគោក នឹងអនុវត្តតែនៅភូមិសាស្ត្រដែលមានគ្រោះថ្នាក់ច្រើន រួមមានរាជធានីភ្នំពេញ ខេត្តព្រះសីហនុ ខេត្តកណ្តាល ខេត្តកំពង់ស្ពឺ និងខេត្តស្វាយរៀង ផ្តោតលើអំពើល្មើសដែលបង្កគ្រោះថ្នាក់ រួមមានការបើកបរលើសល្បឿនកំណត់ ការបើកបរក្នុងស្ថានភាពស្រវឹង ការមិនគោរពសញ្ញាសិទ្ធិអាទិភាព និងភ្លើងស្ដុប និងការដឹកជញ្ជូនទំនិញសំពីងសំពោង។
យ៉ាងណាក៏ដោយ ចំពោះការស្នើឱ្យមានការរឹតបន្តឹងអនុវត្តច្បាប់ ស្ដីពីចរាចរណ៍ផ្លូវគោកឡើងវិញ ចាប់ពីថ្ងៃទី១ ខែកញ្ញា ឆ្នាំ២០២៦ខាងមុខនេះ ត្រូវរង់ចាំការសម្រេចរបស់លោកនាយករដ្ឋមន្ត្រី ហ៊ុន ម៉ាណែត សិន៕
