លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានដាក់បទបញ្ជាយ៉ាងម៉ឺងម៉ាត់ដល់មន្ត្រីជំនាញនៃអគ្គនាយកដ្ឋានព័ត៌មាន និងសោតទស្សន៍ ឱ្យចាត់វិធានការជាបន្ទាន់ ដោយត្រូវហៅក្រុមផលិតមាតិកាវីដេអូបែបកំប្លែករបស់ «គ្រូតឿ» មកធ្វើកិច្ចសន្យាណែនាំ និងអប់រំ បន្ទាប់ពីក្រុមនេះបានផលិតមាតិកាវីដេអូ «ពាក់អាវពេទ្យ និងរុញគ្រែពេទ្យ» ដែលមានខ្លឹមសាររើសអើងយ៉ាងធ្ងន់ធ្ងរចំពោះអ្នកជំងឺអេដស៍។
ការដាក់បញ្ជារបស់រដ្ឋមន្ត្រីក្រសួងព័ត៌មានរូបនេះ បានធ្វើឡើង នៅថ្ងៃទី៣១ ខែកក្កដា ឆ្នាំ២០២៦នេះ ក្នុងឱកាសលោក នេត្រ ភក្ត្រា បានអញ្ជើញជាអធិបតីភាព នៅក្នុងពិធីបើកសិក្ខាសាលា «ផ្សព្វផ្សាយលិខិតបទដ្ឋានគតិយុត្ត ក្នុងវិស័យព័ត៌មាន និងសោតទស្សន៍»។
រដ្ឋមន្ត្រីក្រសួងព័ត៌មាន បានគូសបញ្ជាក់ថា៖ «ការសម្តែង គឺចង់បានអ្នកមើលច្រើន ក៏ប៉ុន្តែ សីលធម៌នៃការសម្តែងបានបង្កការប៉ះពាល់ និងរើសអើងអ្នកផ្ទុកជំងឺអេដស៍ និងអ្នកជំងឺអេដស៍ ដូច្នេះ ត្រូវតែហៅមកអប់រំ ណែនាំឱ្យគោរពនូវក្រមសីលធម៌ជាចាំបាច់»។ លោករដ្ឋមន្រ្តី បន្ថែមថា ក្រសួងព័ត៌មាន ប្តេជ្ញារក្សាសុវត្ថិភាពវប្បធម៌ និងសីលធម៌សង្គមតាមរយៈការគ្រប់គ្រងមាតិកាឌីជីថលប្រកបដោយប្រសិទ្ធភាព។
តាមរយៈវីដេអូខ្លីនៃការកំប្លែងរបស់ «ក្រុមគ្រូតឿ» គឺគ្រូតឿ បានពាក់ឯកសណ្ឋានជាគ្រូពេទ្យវះកាត់ ដោយបានរុញគ្រែពេទ្យទៅយកអ្នកជំងឺជាមួយតួអង្គក្នុងក្រុមជាមួយគ្នា ដែលពាក់ឯកសណ្ឋានជាគិលានុបដ្ឋាក ហើយសាច់រឿងនៃការកំប្លែងនេះ គឺគ្រូពេទ្យបានរុញគ្រែពេទ្យទៅយកអ្នកជំងឺកើតអេដស៍នៅម្តុំវេងស្រេង។
ប៉ុន្តែសកម្មភាពនៃការកំប្លែងរបស់ក្រុមគ្រូតឿ លើកនេះ ទទួលបានការរិះគន់ខ្លាំងពីក្រុមគ្រូពេទ្យ។លោកវេជ្ជបណ្ឌិត សេង ថាវុធា (Dr.Thavuthea) ឯកទេសកាត់ឆ្នឹងមុខ និងកែសម្ផស្សមកពីបារាំង បានចាត់ទុកការកំប្លែករបស់ក្រុមគ្រូតឿលើកនេះ ជាការមើលងាយទៅដល់អ្នកជំងឺអេដស៍ និងក្រុមគ្រូពេទ្យ។
លោកបានបញ្ជាក់តាមរយៈការឡាយវីដេអូថា៖ «ខ្ញុំឧស្សាហ៍មើលកំប្លែងរបស់ក្រុមគាត់ដែរ ប៉ុន្តែការកំប្លែកលើកនេះ មិនមែនជាការកំប្លែកមែនទែននោះទេ តែជាការមើលងាយទៅលើការងាររបស់គ្រូពេទ្យវះកាត់។ លើកពីនេះ នៅពីខាងក្រោយគាត់ហ្នឹង គឺការមើលងាយទៅលើគិលានុបដ្ឋាកទាំងអស់នៅក្នុងស្រុកខ្មែរ»។
លោកបានបន្ថែមថា ឯកសណ្ឋានដែលគ្រូតឿពាក់យកមកកំប្លែកនេះ ជាឯកសណ្ឋានសម្រាប់ការវះកាត់ ដែលគេត្រូវការចម្អិនត្រឹមត្រូវ មិនអាចឱ្យចេញពីបន្ទប់វះកាត់ទេ ត្រូវការផ្លាស់វាសិន ដើម្បីចូលបន្ទប់វះកាត់ ហើយស្លៀកគ្រងឈុតផ្សេងទៀត ដើម្បីវះ។
លោកវេជ្ជបណ្ឌិត សេង ថាវុធា បានសង្កត់ធ្ងន់ថា៖ «នេះជាការមើលងាយមួយទៅលើវិជ្ជាជីវៈរបស់គ្រូពេទ្យមួយ ដូច្នេះការកំប្លែក ដែលមើលងាយទៅលើការងារណាមួយ វាជាការមួយ ដែលអត់សមរម្យទេ ហើយអ្វីដែលលើស គឺការប្រើប្រាសសំឡេងមើលងាយទៅលើអ្នកជំងឺអេដស៍»។
«ការមើលងាយតែមួយម៉ាត់ គឺការរើសអើង និងសំដៅទៅលើក្រុមប្រជាជន ដែលរស់នៅតំបន់ណាមួយ ដែលគិតថា គាត់កើតអេដស៍ទាំងអស់…ចុះបើបងប្អូនស្រីរបស់អ្នកទាំងអស់គ្នា ដែលរស់នៅវេងស្រេង ឬតំបន់ដែលគាត់បាននិយាយហ្នឹង តើអ្នកទាំងអស់គ្នាគិតយ៉ាងម៉េច? ដូច្នេះការមើលងាយទៅលើអ្នកជំងឺអេដស៍ គឺត្រូវហាមឃាត់ជាដាច់ខាត ទោះបីជាជំងឺណាក៏ដោយ»។ លោក ថាវុធា បានបន្ថែម។
ដោយឡែកក្រៅពីប្រធានបទក្រុមកំប្លែកគ្រូតឿ លោក នេត្រ ភក្ត្រា ក៏បានណែនាំឱ្យចាត់វិធានការដូចគ្នា ទៅលើក្រុមអ្នកលក់ផលិតផលតាមប្រព័ន្ធអនឡាញ ដែលចូលចិត្តស្លៀកពាក់លេចលើខ្វះក្រោម បញ្ចេញសាច់ដើមទ្រូងធំៗ ដើម្បីទាក់ទាញការចាប់អារម្មណ៍ ដោយត្រូវហៅបុគ្គលទាំងនោះ មកធ្វើកិច្ចសន្យាបញ្ឈប់សកម្មភាព ដែលប៉ះពាល់ដល់សីលធម៌សង្គមផងដែរ។
ការបញ្ជាបែបនេះរបស់រដ្ឋមន្ត្រីក្រសួងព័ត៌មាន គឺធ្វើឡើងនៅក្នុងគោលបំណងពង្រឹងតម្លៃសីលធម៌សង្គម វប្បធម៌ និងការពារកិត្តិយសសេចក្តីថ្លៃថ្នូររបស់មនុស្សជាតិ ក៏ដូចជាទប់ស្កាត់ការផ្សព្វផ្សាយមាតិកាអនឡាញទាំងឡាយណាដែលខ្វះការទទួលខុសត្រូវ និងធ្វើឱ្យប៉ះពាល់ដល់សណ្តាប់ធ្នាប់វប្បធម៌ប្រពៃណីដ៏ល្អផូរផង់របស់ជាតិ៕
