ផ្នែកឯកជនកម្ពុជា និងសាធារណរដ្ឋកូរ៉េ បានសន្យានឹងខិតខំពង្រឹងភាពជាដៃគូយុទ្ធសាស្ត្រទ្វេភាគីឱ្យកាន់តែរឹងមាំថែមទៀតតាមរយៈការជំរុញធ្វើពាណិជ្ជកម្ម និងការវិនិយោគថ្មីៗ ខណៈទឹកប្រាក់ពីការនាំទំនិញទៅវិញទៅមករវាងប្រទេសទាំង ២ ក្នុងឆមាសទី១ ឆ្នាំ២០២៦ មានជិត ៦០០ លានដុល្លារ។
ការសន្យានេះធ្វើឡើងក្នុងជំនួបរវាង លោក គិត ម៉េង ប្រធានសភាពាណិជ្ជកម្មកម្ពុជា(CCC) និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា ជាមួយនឹង លោក Kim Seong-su ប្រធានសភាពាណិជ្ជកម្មកូរ៉េប្រចាំកម្ពុជា (KOCHAM) នារាជធានីភ្នំពេញ កាលពីថ្ងៃទី១៩ ខែកក្កដា ឆ្នាំ២០២៦។ ជំនួបនេះមានគោលបំណងពិភាក្សាពីការពង្រឹង និងពង្រីកកិច្ចសហប្រតិបត្តិការសេដ្ឋកិច្ចរវាងសភាពាណិជ្ជកម្មនៃប្រទេសទាំង ២ ឱ្យកាន់តែរឹងមាំបន្ថែមទៀត។
តាមរយៈជំនួបនេះ ភាគីទាំង ២ ក៏បានផ្លាស់ប្តូរទស្សនៈ និងពិភាក្សាលើយុទ្ធសាស្ត្រសំខាន់ៗដើម្បីជំរុញការតភ្ជាប់ធុរកិច្ចរវាងក្រុមហ៊ុនកម្ពុជា និងសាធារណរដ្ឋកូរ៉េ ព្រមទាំងបានឯកភាពបង្កើតយន្តការសហប្រតិបត្តិការប្រកបដោយនិរន្តរភាពសំដៅគាំទ្រដល់ការអភិវឌ្ឍផ្នែកឯកជននៃប្រទេសទាំង ២។
ប្រធានសភាពាណិជ្ជកម្មកម្ពុជា លោកគិត ម៉េង បាននិយាយថា៖«ជំនួបនេះបានបង្ហាញពីការប្តេជ្ញាចិត្តរួមរបស់សភាពាណិជ្ជកម្មកម្ពុជា និងសភាពាណិជ្ជកម្មកូរ៉េប្រចាំកម្ពុជា ក្នុងការពង្រឹងភាពជាដៃគូយុទ្ធសាស្ត្រ ជំរុញការវិនិយោគ និងពាណិជ្ជកម្មទ្វេភាគី ព្រមទាំងបង្កើតឱកាសថ្មីៗសម្រាប់សហគមន៍ធុរកិច្ចនៃប្រទេសទាំង ២ សំដៅរួមចំណែកដល់ការអភិវឌ្ឍសេដ្ឋកិច្ចប្រកបដោយបរិយាបន្ន និងចីរភាពរបស់កម្ពុជា»។
នៅក្នុងជំនួបនេះ សភាពាណិជ្ជកម្មកូរ៉េប្រចាំកម្ពុជា(KOCHAM) ក៏បានបញ្ជាក់ថានឹងចូលរួមយ៉ាងសកម្មក្នុងក្រុមការងារទាំង ១៦ នៃវេទិការាជរដ្ឋាភិបាល-ផ្នែកឯកជន(Government-Private Sector Forum: G-PSF) ដែលស្ថិតក្រោមការសម្របសម្រួលរបស់សភាពាណិជ្ជកម្មកម្ពុជា ដើម្បីរួមចំណែកពិភាក្សាលើគោលនយោបាយ និងរបៀបវារៈសេដ្ឋកិច្ចសំខាន់ៗរួមមាន ការវិនិយោគ ពាណិជ្ជកម្ម ឧស្សាហកម្ម និងការអភិវឌ្ឍធនធានមនុស្ស។
ជាលទ្ធផលនៃជំនួបខាងលើ ភាគីទាំង ២ ក៏បានឯកភាពគ្នានឹងចុះហត្ថលេខាលើអនុស្សរណៈនៃការយោគយល់(MOU)នាពេលខាងមុខ ដើម្បីពង្រឹងកិច្ចសហប្រតិបត្តិការជាក់ស្តែងលើវិស័យអាទិភាព មួយចំនួនដូចជា ការវិនិយោគ ពាណិជ្ជកម្ម ការគាំទ្រធុរកិច្ច ការផ្លាស់ប្តូរព័ត៌មាន និងការជំរុញឱកាសវិនិយោគរវាងសហគមន៍ធុរកិច្ចនៃប្រទេសទាំង ២។
ទិន្នន័យអគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ប្រទេសកូរ៉េ គឺជាដៃគូពាណិជ្ជកម្មធំជាងគេទី១១ របស់កម្ពុជា ដោយចន្លោះពីខែមករា-មិថុនា ឆ្នាំ២០២៦ លំហូរទំនិញឆ្លងព្រំដែនរវាងប្រទេសទាំង ២ មានទឹកប្រាក់សរុប ៥៩៩,៧៣ លានដុល្លារ កើនឡើង ៣៦,៨% បើធៀបនឹងឆមាសទី១ ឆ្នាំ២០២៥។ ក្នុងចំនួននេះ គឺកម្ពុជានាំទៅប្រទេសកូរ៉េ ២០៩,៨១ លានដុល្លារ កើនឡើង ៣៨,២% ចំណែកទំនិញកូរ៉េនាំមកវិញ ៣៨៩,៩២ លានដុល្លារ កើនឡើង ៣៦,១%។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២០ ខែកក្កដាថា ការកើនឡើងព្រមគ្នានៃចំនួនទឹកប្រាក់នាំចេញ នាំចូលទំនិញរវាងប្រទេសកម្ពុជា-កូរ៉េ បានឆ្លុះបញ្ចាំងពីប្រសិទ្ធភាពនៃការអនុវត្តកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់(RCEP) ដែលប្រទេសទាំង ២ គឺជាសមាជិក ។ លោកបន្តថា រដ្ឋាភិបាលកម្ពុជាតែងតែធ្វើយុទ្ធនាការផ្សព្វផ្សាយ និងលើកទឹកចិត្តឱ្យវិនិយោគិនកូរ៉េចូលមកបណ្តាក់ទុនផ្ទាល់ ឬបង្កើតនូវដៃគូពាណិជ្ជកម្មជាមួយម្ចាស់អាជីវកម្មនៅកម្ពុជា។
លោកបញ្ជាក់ថា៖«ភាពវិជ្ជមាននៃកំណើនទឹកប្រាក់ផ្លាស់ប្តូរពាណិជ្ជកម្មទំនិញរវាងប្រទេសទាំង ២ បានឆ្លុះបញ្ចាំងពីប្រសិទ្ធភាពនៃការអនុវត្តកិច្ចព្រមព្រៀងពាណិជ្ជកម្មសេរី និងការកើនឡើងនៃសមត្ថភាពផលិតកម្មនៅកម្ពុជា»។
បើតាមលោក វណ្ណៈ រដ្ឋាភិបាលកម្ពុជាតែងលើកទឹកចិត្តឱ្យវិនិយោគិនកូរ៉េចូលមកបណ្តាក់ទុន និងបើកអាជីវកម្មផ្ទាល់នៅកម្ពុជា ជាពិសេសក្នុងវិស័យសក្តានុពលដូចជា កសិកម្មទំនើប ឧស្សាហកម្មកែច្នៃចំណីអាហារ វិស័យយានយន្ត អេឡិចត្រូនិក និងបច្ចេកវិទ្យាឌីជីថល ជាដើម។
កាលពីឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា កូរ៉េសម្រេចបានប្រមាណ ៩២៣,០៥ លានដុល្លារ កើនឡើង ៩,៨% ធៀបនឹងឆ្នាំ២០២៤ ដោយក្នុងនោះកម្ពុជានាំទំនិញទៅកូរ៉េ ៣២៦,៧៨ លានដុល្លារ កើនឡើង ២,៣% ចំណែកកូរ៉េនាំទំនិញមកកម្ពុជាមានតម្លៃ ៥៩៦,២៧ លានដុល្លារ កើន ១៤,៤%៕ នេះបើតាម GDCE៕
