ពន្ធគយសំខាន់ៗរួមមាន ចំណូលពីទំនិញចម្រុះមានប្រហែល ៣៩% នៃចំនួនទឹកប្រាក់ពន្ធគយសរុប, យានយន្តនិងគ្រឿងចក្រ ៣៥%, ប្រេងឥន្ធនៈនិងថាមពល ១៨,៥%, និងសម្ភារសំណង់និងកម្រៃផ្សេងៗ ៧,៥%។
ច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ បានកំណត់ឱ្យអគ្គនាយកដ្ឋានគយ និងរដ្ឋាកកម្ពុជា ប្រមូលចំណូលពន្ធឱ្យបាន ១២ ១៥៨ ពាន់លានរៀល(៣ ០០២ លានដុល្លារ)។
ក្នុងកិច្ចប្រជុំបូកសរុបការងារគយ និងរដ្ឋាករកម្ពុជា ប្រចាំឆមាសទី១ ឆ្នាំ២០២៦ ទិសដៅអនុវត្តបន្ត ក្នុងថ្ងៃទី២១ ខែកក្កដា នេះ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានលើកឡើងថា ទន្ទឹមនឹងចំណូលពន្ធគយក្នុងឆមាសទី១ បានកើនលើសផែនការបន្តិចបន្តួច កម្ពុជាក៏កំពុងប្រឈមមុខនឹងការផ្លាស់ប្តូរស្ថានភាពនៃប្រភពចំណូលពន្ធគយផងដែរ ជាពិសេសគឺការថយចុះចំណូលពន្ធពីប្រេងឥន្ធនៈ និងឧស្ម័ន ដែលបណ្តាលមកពីការដាក់ពន្ធនិងអាករជាបន្ទុករបស់រដ្ឋដែលបានអនុវត្តចាប់ពីថ្ងៃទី២០ ខែមីនា ឆ្នាំ២០២៦ មក(វិបត្តិការកើនឡើងនៃតម្លៃប្រេងឥន្ធនៈសកល)។
លោកថ្លែងថា៖«ការកើនឡើងនៃចំណូលពីក្រុមទំនិញចម្រុះនាពេលនេះ គឺជាលទ្ធផលនៃការអនុវត្តវិធានការមុតស្រួចស្តីពីការបង្ការនិងបង្ក្រាបអំពើរត់គេចពន្ធ និងការពង្រឹងអភិបាលកិច្ចរបស់អគ្គនាយកដ្ឋានគយនិងរដ្ឋាករកម្ពុជា»។
បើតាម លោក គុណ ញឹម ក្រៅពីការងារប្រមូលចំណូល អគ្គនាយកដ្ឋានគយនិងរដ្ឋាករកម្ពុជា ក៏សម្រេចបាននូវលទ្ធផលល្អប្រសើរលើការងារផ្សេងទៀត ជាពិសេសពាក់ព័ន្ធកិច្ចសម្រួលពាណិជ្ជកម្ម រួមមានដូចជា ការបន្តពង្រីកមុខងារប្រព័ន្ធស្វ័យប្រវត្តិកម្ម, ការធ្វើសាមញ្ញកម្មនីតិវិធីគយដើម្បីសម្រួលដល់វិស័យបញ្ញើឆាប់រហ័ស និង SMEs, ការបង្កើនចំនួនប្រតិបត្តិករសេដ្ឋកិច្ចបានទទួលការអនុញ្ញាត(AEO), ការបង្កើនកិច្ចសហការជាមួយរដ្ឋបាលគយនៃបណ្តាប្រទេសជាដៃគូ និងកិច្ចសហការជាមួយវិស័យឯកជន ព្រមទាំងការកាត់បន្ថយចំណាយក្នុងការបំពេញបែបបទគយ ជាដើម។ ជាមួយគ្នានេះ អគ្គនាយកដ្ឋានគយនិងរដ្ឋាករកម្ពុជាក៏បានធ្វើជាម្ចាស់ផ្ទះរៀបចំកិច្ចប្រជុំអគ្គនាយកគយអាស៊ានលើកទី៣៥ និងកិច្ចប្រជុំពាក់ព័ន្ធនៃក្រុមការងារបច្ចេកទេសអាស៊ាន ផងដែរ។
ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន ដែលបានអញ្ជើញចូលរួមក្នុងកិច្ចប្រជុំខាងលើ បានបង្ហាញនូវការកោតសរសើរនិងវាយតម្លៃខ្ពស់ចំពោះលទ្ធផលការងារដែលអគ្គនាយកដ្ឋានគយសម្រេចបាន ជាពិសេសក្នុងកាលៈទេសៈនៃបញ្ហាប្រឈមធំៗមួយចំនួនដែលប៉ះពាល់ដល់ការប្រមូលចំណូលគយ ដូចជា ការដាក់ពន្ធនិងអាករជាបន្ទុករដ្ឋលើការនាំចូលប្រេងឥន្ធនៈនិងឧស្ម័ន, ការបញ្ចុះអត្រាពន្ធនិងអាករលើរថយន្តអគ្គិសនីនិងឧបករណ៍ថាមពលសូឡា, ការថមថយនៃតម្រូវការប្រើប្រាស់ក្នុងប្រទេស, និងការកើនឡើងនៃផលិតកម្មក្នុងស្រុកជំនួសការនាំចូល។
បន្ថែមលើនេះ លោកក៏បានលើកទឹកចិត្តដល់ថ្នាក់ដឹកនាំ និងមន្ត្រីគយនិងរដ្ឋាករគ្រប់ជាន់ថ្នាក់ ឱ្យបន្តយកចិត្តទុកដាក់ខិតខំប្រឹងប្រែងអនុវត្តតួនាទី ភារកិច្ចរបស់ខ្លួនប្រកបដោយស្មារតីទទួលខុសត្រូវ ក្នុងការអនុវត្តវិធានការនានាពាក់ព័ន្ធនឹងការងារគយ ដែលក្រសួងសេដ្ឋកិច្ចនិងហិរញ្ញវត្ថុ ក៏ដូចជារាជរដ្ឋាភិបាលបានដាក់ចេញ ជាពិសេសវិធានការមុតស្រួចក្នុងការបង្ការនិងបង្ក្រាបអំពើរត់គេចពន្ធ និងការពង្រឹងអភិបាលកិច្ច ដើម្បីឈានទៅសម្រេចបានលទ្ធផលល្អប្រសើរទាំងលើការងារប្រមូលចំណូល ក៏ដូចជាការងារគាំទ្រផ្សេងទៀត សំដៅកែលម្អបរិយាកាសធុរកិច្ច និងវិនិយោគឱ្យកាន់តែប្រសើរ។
កាលពីឆ្នាំ២០២៥ ចំណូលដែល GDCE ប្រមូលបានមានសរុប ១២ ៧៦០,៥ ពាន់លានរៀល(ប្រហែល ៣ ១៨១,៣ លានដុល្លារ) ដែលស្មើនឹង ១២៤,៥% នៃផែនការឆ្នាំ២០២៤។ ចំណូលពន្ធគយ ឆ្នាំ២០២៥ គឺខ្ពស់ប្រហាក់ប្រហែលឆ្នាំ២០១៩ (មុនពេលសេដ្ឋកិច្ចពិភពលោកជួបនឹងវិបត្តិបណ្តាលមកពីការរីករាលដាលជំងឺកូវីដ១៩ បញ្ហាជម្លោះភូមិសាស្ត្រនយោបាយ និងសង្គ្រាមនៅប្រទេសមួយចំនួនដែលកំពុងបន្តដល់ពេលនេះ)៕
