លោកឧបនាយករដ្ឋមន្រ្តី ស សុខា រដ្ឋមន្រ្តីក្រសួងមហាផ្ទៃ មានការក្រៀមក្រំខ្លាំង ជុំវិញករណីបង្ក្រាបមុខសញ្ញាប្រើប្រាស់គ្រឿងញៀន និងប្រើអំពើហិង្សាក្នុងគ្រួសារមួយ នៅអូសោម ដោយជនសង្ស័យបានបោកគ្រាប់បែកបណ្តាលឱ្យមន្រ្តីនគរបាល និងប្រជាការពារចំនួន ៥រូប បានពលីជីវិត ជនបង្កម្នាក់ស្លាប់ និងប្រជាការពារម្នាក់ទៀតរងរបួសធ្ងន់។
ចំពោះហេតុការណ៍ដ៏រន្ធត់ ដែលបានកើតឡើង នៅចំណុចអូរបាយក្រៀម ស្ថិតក្នុងភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ កាលពីល្ងាចថ្ងៃទី ៥ ខែសីហានេះ លោក ស សុខា បានណែនាំ និងដាក់បញ្ជាឱ្យអគ្គស្នងការដ្ឋាននគរបាលជាតិ និងភាគីពាក់ព័ន្ធ ត្រូវស្វែងរកមុខសញ្ញាចែកចាយគ្រឿងញៀន និងប្រភពគ្រាប់បែកដែលជនបង្កបានប្រើប្រាស់។
តាមរយៈការបង្ហោះសារ កាលពីយប់ម៉ោង ៨:២៩ លោក ស សុខា បានបញ្ជាក់ថា៖ «ខ្ញុំបានណែនាំអគ្គស្នងការដ្ឋាននគរបាលជាតិ រដ្ឋបាលខេត្ត រួមទាំងស្នងការដ្ឋាននគរបាលខេត្តពោធិ៍សាត់ យកចិត្តទុកដាក់ឱ្យបានខ្ពស់បំផុត ក្នុងដំណើរការរៀបចំពិធីបុណ្យសពមន្ត្រីនគរបាលជាតិ និងកម្លាំងប្រជាការពារ ហើយត្រូវបន្តខិតខំស្រាវជ្រាវទាំងមុខសញ្ញាចែកចាយគ្រឿងញៀនក្នុងមូលដ្ឋាននោះ និងប្រភពគ្រាប់បែកដែលជនបង្កបានប្រើប្រាស់»។
តាងនាមឱ្យក្រសួងមហាផ្ទៃ និងក្នុងនាមខ្លួនឯងផ្ទាល់ ព្រមទាំងក្រុមគ្រួសារ លោក ស សុខា បានចូលរួមរំលែកមរណទុក្ខដ៏សែនក្រៀមក្រំនេះ ជាមួយក្រុមគ្រួសារសព។ លោកបន្ថែមថា៖ «ពលិកម្មមន្ត្រីនគរបាលជាតិ និងប្រជាការពារយើង រួមទាំងសោកនាដកម្មក្នុងករណីនេះទាំងមូល បានដាស់តឿនយើងថា គ្រឿងញៀន គឺជាឃាតករ និងជាសត្រូវដ៏អាក្រក់របស់យើងទាំងអស់គ្នា»។
យោងតាមសេចក្តីប្រកាសព័ត៌មានបឋមរបស់ស្នងការដ្ឋាននគរបាលខេត្តពោធិ៍សាត់ កាលពីយប់ថ្ងៃពុធនោះ បានឲ្យដឹងថា ហេតុការណ៍ដ៏រន្ធត់ខាងលើកនេះ បានកើតឡើងបន្ទាប់ពីប្រពន្ធរបស់ជនសង្ស័យឈ្មោះ អែម ដុំ បានទៅប្ដឹងលោកមេប៉ុស្តិ៍អូរសោម អំពីប្ដីរបស់ខ្លួនបានប្រើអំពើហិង្សាវាយដំមកលើខ្លួន។
ក្រោយពីទទួលបានពាក្យបណ្ដឹងភ្លាម លោកអនុសេនីយ៍ឯក សោម រ៉ា នាយប៉ុស្តិ៍ បានដឹកនាំកម្លាំងនគរបាលប៉ុស្តិ៍ និងកម្លាំងប្រជាការពារសរុបចំនួន ៧នាក់ ចុះទៅអន្តរាគមន៍ភ្លាមៗ។
នៅពេលកម្លាំងសមត្ថកិច្ចចូលទៅបង្ក្រាបនាំខ្លួនជនសង្ស័យ ជនសង្ស័យបានគំរាមកំហែងមិនឲ្យចូលទេ។
តែពេលនោះ លោកមេប៉ុស្តិ៍ និងប្រជាការពារបានស្ទុះចូលទៅឱបជនសង្ស័យ ស្រាប់តែជនសង្ស័យដែលមានគ្រាប់បែកនៅនឹងដៃ បានប្រលែងគ្រាប់បែកផ្ទុះឡើង បណ្ដាលឲ្យមានការបាត់បង់ជីវិត លោកអនុសេនីយ៍ឯក សោម រ៉ា លោកអនុសេនីយ៍ត្រី សូ សុវណ្ណារិទ្ធ ជាមន្ត្រីប៉ុស្តិ៍ រួមទាំងលោក ជន ប្រិម លោក សុខ អាន និងលោក ចិន្តា ជាប្រជាការពារ ចំណែកជនបង្កឈ្មោះ អែម ដុំ បានស្លាប់បាត់បង់ជីវិត ហើយលោក វ៉ី វឿន ប្រជាការពារ បានរងរបួសធ្ងន់។
ចំណែកលោក ខូយ រីដា អភិបាលខេត្តពោធិ៍សាត់ បានប្រាប់ប្រព័ន្ធផ្សព្វផ្សាយក្នុងស្រុក កាលពីយប់ថ្ងៃពុធ ម្សិលមិញថា លោក និងក្រុមការងាររបស់ខេត្ត នឹងចុះទៅចូលរួមធ្វើពិធីបុណ្យសពរបស់មន្រ្តីជាប៉ូលិស និងប្រជាការពារទាំង៥នាក់ នៅថ្ងៃព្រហស្បតិ៍នេះ ដើម្បីជួយពិនិត្យ និងរ៉ាប់រងជាមួយក្រុមគ្រួសារ ហើយលោកបានបញ្ជាក់ថា «គ្រាប់បែក ដែលជនបង្កបានប្រើនោះ ជាគ្រាប់បែកច្នៃ»។
លោក ខូយ រីដា មានការសោកស្តាយខ្លាំងចំពោះហេតុការណ៍ ដែលបានសម្លាប់មន្រ្តីប៉ូលិស និងប្រជាការពារអស់៥នាក់នេះ។ លោកថ្លែងថា៖ «បើយើងនិយាយពីការសោកស្តាយវិញ យើងពិបាកនឹងនិយាយណាស់ ព្រោះមនុស្សដែលយើងឃើញមុខគ្នារាល់ថ្ងៃ ហើយមនុស្សដែលមានសមត្ថភាព គាត់ធ្វើការងារល្អ ដូចមេប៉ុស្តិ៍អីហ្នឹង គាត់ល្អណាស់។ ខ្ញុំធ្លាប់បានទះស្មា ប្រាប់គាត់ថា យើងប្រជាជនស្រឡាញ់ហើយ ខំធ្វើការងារទៀត»។
លោក រីដា បានឱ្យដឹងទៀតថា លោកធ្លាប់ជួប និងធ្វើការងារជាមួយលោកនាយប៉ុស្តិ៍ សោម រ៉ា ហើយធ្លាប់ណែនាំថា រាល់ការបង្រ្កាបបទល្មើសទាំងអស់ គឺត្រូវត្រៀមលក្ខណៈប្រយុទ្ធជាស្រេចឱ្យហើយ កុំធ្វើប្រហែស។ តែទោះបីជាយ៉ាងណា ហេតុការណ៍ដ៏ក្រៀមក្រំ នៅតែបានកើតមានឡើងចំពោះមន្រ្តីប៉ូលិសរូបនេះ និងអ្នកចូលរួមចំនួន៤នាក់ទៀត។
អភិបាលខេត្តពោធិ៍សាត់រូបនេះ បានបញ្ជាក់ថា៖ «ពេលចុះទៅបង្រ្កាប មេប៉ុស្តិ៍ហ្នឹង គាត់ពាក់អាវក្រោះដែរ តែគាត់ចូលទៅឱបផ្ទាល់ជាមួយជនល្មើស អ៊ីចឹងគ្រាប់បែកផ្ទុះមក វាការពារបានតែដើមទ្រូង តែផុតពីហ្នឹងទៀត វាត្រូវ ហើយគ្រាប់បែកនេះ ជាគ្រាប់បែកច្នៃ»៕
