កម្លាំងស្នងការនគរបាលខេត្តស្វាយរៀង បានបើកប្រតិបត្តិការបង្ក្រាបលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) ចំនួន២ទីតាំង ដោយឃាត់ខ្លួនជនសង្ស័យចំនួន ១១០នាក់។ ចំណែកនៅឯខេត្តត្បូងឃ្មុំវិញ កម្លាំងចម្រុះបានឃាត់ខ្លួនជនបរទេស៤នាក់ ពាក់ព័ន្ធនឹងការរក្សាទុក និងប្រើប្រាស់គ្រឿងញៀន។
ប្រតិបត្តិការបង្ក្រាបលួចលាក់ប្រព្រឹត្តបទល្មើស Online Scams នេះ ត្រូវបានធ្វើឡើង កាលពីរសៀលថ្ងៃទី ២០ ខែសីហា ដោយលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង បានដឹកនាំកងកម្លាំងនគរបាលនៃស្នងការដ្ឋាននគរបាលខេត្ត សហការជាមួយកម្លាំងនាយកដ្ឋានព្រហ្មទណ្ឌ ដឹកនាំដោយឧត្ដមសេនីយ៍ទោ ប៉ុល រតនា អនុប្រធាននាយកដ្ឋានព្រហ្មទណ្ឌ បានចុះបង្រ្កាបទីតាំងចំនួន២ គឺផ្ទះជួល និងផ្ទះសំណាក់ នៅចំណុចភូមិចេក ឃុំសំរោង ស្រុកចន្ទ្រា។
ជាលទ្ធផលសមត្ថកិច្ច ឃាត់ខ្លួនមនុស្សក្នុងរង្វង់ប្រតិបត្តិការចំនួន ១១០នាក់ (ស្រី១៦នាក់) ក្នុងនោះមានជនជាតិវៀតណាម ៩១នាក់( ស្រី ១៥នាក់) ជនជាតិចិន ១៤នាក់ និងជនជាតិខ្មែរ ៥នាក់ (ស្រី១នាក់) ព្រមទាំងបានដកហូតសម្ភារពាក់ព័ន្ធនឹងបទល្មើសរួមមាន កុំព្យូទ័រយួរដៃ, ទូរសព្ទដៃ, ថេបប្លេត និងសម្ភារប្រើប្រាស់មួយចំនួនទៀត។
បច្ចុប្បន្ន ជនសង្ស័យរួមទាំងវត្ថុតាង ត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ រីឯទីតាំងប្រព្រឹត្តិបទល្មើស Online Scams ក្រុមការងារបានបិទស៊ីល ទីតាំងបណ្ដោះអាសន្ន។ដោយឡែកកម្លាំងចម្រុះខេត្តត្បូងឃ្មុំ កាលពីថ្ងៃទី ២០ ខែសីហានោះដែរ បានចុះត្រួតពិនិត្យរដ្ឋបាលចំហរ រកឃើញជនបរទេស ២០នាក់ និងឃាត់ខ្លួនជនបរទេស៤នាក់ ពាក់ព័ន្ធការរក្សាទុក និងប្រើប្រាស់គ្រឿងញឿន។
ប្រតិបត្តិការនេះ កម្លាំងចម្រុះខេត្តត្បូងឃ្មុំ បានចុះធ្វើរដ្ឋបាលចំហរ ត្រួតពិនិត្យនៅតាមផ្ទះវីឡា ផ្ទះសំណាក់ បន្ទប់ជួល និងឃ្លាំង ចំនួន៥ទីតាំង ដែលមានចំនួន ៦៧បន្ទប់ នៅក្នុងភូមិសាស្ត្រឃុំត្រពាំងផ្លុង ស្រុកពញាក្រែក។ ជាលទ្ធផល កម្លាំងចម្រុះបានធ្វើរដ្ឋបាលលើជនបរទេសចំនួន ២០នាក់ (ស្រី ៤នាក់) ហើយបានរកឃើញជនបរទេសម្នាក់គ្មានលិខិតឆ្លងដែន។
ជាមួយគ្នានេះ កម្លាំងចម្រុះបានឃាត់ខ្លួនជនបរទេសចំនួន៤នាក់ រួមមានជនជាតិចិន ២នាក់ និងជនជាតិវៀតណាម ២ នាក់ (ស្រី) ដែលពាក់ព័ន្ធនឹងការរក្សាទុក និងប្រើប្រាស់ដោយខុសច្បាប់នូវសារធាតុញៀន។ ជនសង្ស័យទាំង៤នាក់ ត្រូវបានបញ្ជូនមកស្នងការដ្ឋាននគរបាលខេត្ត ដើម្បីកសាងសំណុំរឿងតាមនីតិវិធីច្បាប់។
បច្ចុប្បន្ន កម្លាំងគណៈបញ្ជាការឯកភាពរដ្ឋបាលខេត្ត កំពុងបន្តចុះស្រាវជ្រាវ និងត្រួតពិនិត្យស្វែងរកទីតាំងដែលមានការសង្ស័យលួចលាក់ប្រព្រឹត្តបទល្មើស និងការរស់នៅប្រមូលផ្តុំខុសច្បាប់ នៅក្នុងភូមិសាស្ត្រទាំង ៧ក្រុង ស្រុក នៃខេត្តត្បូងឃ្មុំ ហើយក៏បានបន្តធ្វើការផ្សព្វផ្សាយអនុក្រឹត្យលេខ ០៣ របស់រាជរដ្ឋាភិបាល ដើម្បីបង្កើនការយល់ដឹង និងចូលរួមអនុវត្តច្បាប់។

ចំណែកកម្លាំងគណៈបញ្ជាការឯកភាពខណ្ឌចំការមន កាលពីថ្ងៃទី ២០ ខែសីហា បានបើកកិច្ចប្រតិបត្តិការបោសសម្អាតទីតាំង Online Scams ចំនួន២ទីតាំង គឺទីតាំងទី១ ស្ថិតនៅបុរីរីវើរ៉ា កោះពេជ្រ ផ្ទះលេខ I50 ដោយសមត្ថកិច្ចបានឃាត់ខ្លួនជនជាតិខ្មែរ៣នាក់ និងដកហូតវត្ថុតាងរួមមាន កុំព្យូទ័រ All-in-One ចំនួន ២០៤គ្រឿង, ទូរសព្ទដៃ ១,៥៥០គ្រឿង, ម៉ូនីទ័រចំនួន ៣គ្រឿង, ស៊ីភីយូ ៣គ្រឿង និងស៊ីមកាតបរទេសមួយចំនួនធំរាប់ម៉ឺនស៊ីម។
ចំណែកនៅទីតាំងទី២ ស្ថិតនៅបុរីដាយមិនវ័ន ផ្ទះលេខ S55 សមត្ថកិច្ចបានឃាត់ខ្លួនជនសង្ស័យចំនួន ៤នាក់ (ស្រី ១នាក់) និងដកហូតវត្ថុតាងរួមមាន កុំព្យូទ័រ All-in-One ចំនួន ៣១គ្រឿង, Laptop ចំនួន ២គ្រឿង, ម៉ូនីទ័រ ៣គ្រឿង និងទូរសព្ទដៃ ចំនួន ២១១គ្រឿង។ ជនសង្ស័យទាំង៧នាក់នេះ មានជនជាតិចិន ៤នាក់ (ស្រី ១នាក់) និងជនជាតិខ្មែរ៣នាក់ ហើយបច្ចុប្បន្ន ជនសង្ស័យ រួមជាមួយវត្ថុតាងទាំងអស់ ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីបន្តចាត់ការតាមនីតិវិធីច្បាប់៕



