អង្គភាពប្រឆាំងអំពើពុករលួយ(ACU) បង្ហាញអ្នកពាក់ព័ន្ធនឹងសំណុំរឿងពុករលួយ និងសម្អាតប្រាក់ របស់មេឃុំព្រែកខ្សាច់ រៀម រុំ នៅស្រុកគិរីសាគរ ខេត្តកោះកុង។ មនុស្សចុងក្រោយដែល ACU បង្ហាញអត្តសញ្ញាណ មានឈ្មោះ ភេ ផាត់ផេង អនុសេនីយ៍ទោ នគរបាលអន្តោប្រវេសន៍។
យោងតាមសេចក្ដីប្រកាសព័ត៌មានរបស់ ACU នៅថ្ងៃទី២៥ កញ្ញានេះ ការពាក់ព័ន្ធរបស់ ភេ ផាត់ផេង ត្រូវបានរកឃើញតាមរយៈមេខ្លោងក្រុមឆបោកឈ្មោះ ឆៃ យ៉ូវយៀន ដែលដឹកនាំក្រុមឆបោក ៤២នាក់ នៅឃុំព្រែកខ្សាច់។ ឆៃ យ៉ូវយៀន ក៏ជាមេខ្លោង និងជាសមាជិកក្រុមអនឡាញស្គែមផ្សេងមួយចំនួនទៀតផងដែរ។
បើតាម ACU មេខ្លោង ឆៃ យ៉ូវយៀន បាននាំក្រុមឆបោកពីប្រទេសចិនចូលកម្ពុជាតាមច្រកព្រលានយន្តហោះអន្តរជាតិតេជោ ដោយមាន លោក ភេ ផាត់ផេង ជាអ្នកជួយសម្រួល និងរៀបចំឯកសារ សូម្បីតែអ្នកស្ថិតនៅក្នុងបញ្ជីខ្មៅ ក៏អាចចូលមកបានដែរ។
បើតាម ACU ភេ ផាត់ផេង កំណត់តម្លៃសេវាខុសច្បាប់របស់ខ្លួន រួមមានការរត់ការចូលប្រទេសកម្ពុជាសម្រាប់ទិដ្ឋាការពាណិជ្ជកម្ម Visa Business ក្នុងតម្លៃពី ៣៨០ ដល់ ៤២០ដុល្លារ, ការចូលកម្ពុជាតាមទិដ្ឋាការពាណិជ្ជកម្មអេឡិចត្រូនិក (E-Commerce Entry) តម្លៃ ៩០០ដុល្លារ, តាមរយៈទិដ្ឋាការទេសចរ (Visa Tourist) តម្លៃ ១២០ដុល្លារ និងសម្រួលការឆ្លងដែន VIP Fast Track តម្លៃ ៤៥០ដុល្លារ។
ក្នុងចន្លោះពីខែមករា ដល់ខែមិថុនា ឆ្នាំ២០២៦នេះ ភេ ផាត់ផេង រកប្រាក់ពីសកម្មភាពបានជាង ២០ម៉ឺនដុល្លារ ក្នុងករណី ៣០១ ករណី ហើយយកទៅទិញរថយន្ត និងផ្ទះ។ នេះបើតាម ACU។
ACU បញ្ជាក់ថា ភេ ផាត់ផេង ត្រូវបានអយ្យការអមសាលាដំបូងរាជធានីភ្នំពេញចោទប្រកាន់ពីបទ រំលោភអំណាច, សមគំនិតក្នុងការឆបោកតាមប្រព័ន្ធបច្ចេកវិទ្យាតាមបញ្ញត្តិ, និងសម្អាតប្រាក់។
ក្នុងសុំរឿងរបស់មេឃុំព្រែកខ្សាច់ មានការចោទប្រកាន់និងឃុំខ្លួនមនុស្ស ៤នាក់រួចហើយ រួមមានមេឃុំព្រែកខ្សាច់ រៀម រុំ ដែលរៀបចំឲ្យក្រុមឆបោកធ្វើសកម្មភាពលើដី ៥ហិកតារបស់ខ្លួន, ឈ្មោះ ជិន សុភាន់ អតីតអធិការរងនគរបាលស្រុកគិរីសាគរ ដែលបានសម្រួលសម្មភាព, និង ឈ្មោះ ជា សុទ្ធ និង ជា វាសនា ដែលពាក់ព័ន្ធនឹងសកម្មភាពលាក់បាំងជនជនល្មើស៕
