ភ្នំពេញ៖ ក្រសួងបរិស្ថានបានព្រមានអំពីហានិភ័យធ្ងន់ធ្ងរពីសារធាតុគីមីដែលត្រូវបានប្រើប្រាស់ក្នុងការផលិតផលិតផលប្លាស្ទិក ខណៈការសិក្សាសកលមួយ បានបង្ហាញថា សារធាតុគីមីជាងមួយភាគបួន ក្នុងចំណោមសារធាតុជាង ១៦,០០០ ប្រភេទ បង្កគ្រោះថ្នាក់ដល់សុខភាពមនុស្ស និងប្រព័ន្ធអេកូឡូស៊ី។
ក្រសួងបរិស្ថាន បានដកស្រង់ទិន្នន័យសកល PlastChem ដែលទើបតែចេញផ្សាយថ្មីៗនេះ និងត្រូវបានដកស្រង់ផ្សាយដោយអគ្គនាយកដ្ឋានទទួលបន្ទុកបរិស្ថាននៃសហភាពអឺរ៉ុប បានបង្ហាញថា មានសារធាតុគីមីចំនួន ១៦,២៣៥ ប្រភេទ ត្រូវបានប្រើប្រាស់ក្នុងការផលិតប្លាស្ទិក។
ប៉ុន្តែអ្នកស្រាវជ្រាវអាចកំណត់អត្តសញ្ញាណ និងប្រមូលព័ត៌មានលម្អិតបានត្រឹមតែ ១២,៦៥៨ ប្រភេទប៉ុណ្ណោះ ខណៈសារធាតុដែលនៅសល់មិនទាន់មានព័ត៌មានគ្រប់គ្រាន់អំពីលក្ខណៈសម្បត្តិ និងផលប៉ះពាល់របស់វា។
ក្នុងចំណោមសារធាតុគីមីដែលអាចកំណត់អត្តសញ្ញាណបាន អ្នកវិទ្យាសាស្ត្របានរកឃើញថា ប្រហែលមួយភាគបួន គឺជាសារធាតុគីមីគ្រោះថ្នាក់ ដែលកំពុងត្រូវបានប្រើប្រាស់យ៉ាងទូលំទូលាយ និងបោះចោលចូលទៅក្នុងបរិស្ថាន ដោយបង្កគ្រោះថ្នាក់យ៉ាងខ្លាំងដល់សុខភាពមនុស្ស និងប្រព័ន្ធអេកូឡូស៊ី។
ក្រសួងបរិស្ថានបានឱ្យដឹងថា៖ «សារធាតុគីមីគួរឲ្យព្រួយបារម្ភជាច្រើន នៅមិនទាន់ត្រូវបានគ្រប់គ្រងនៅកម្រិតសកលនៅឡើយទេ ហើយវាអាចមានវត្តមានក្នុងសម្ភារប្លាស្ទិកប្រើប្រាស់ប្រចាំថ្ងៃ ដែលអាចចូលទៅក្នុងខ្លួនមនុស្ស មានភាពស៊ាំ រឹងមាំ និងស្ថិតនៅក្នុងរាងកាយរយៈពេលយូរ»។
ប្រភពដដែលបានបញ្ជាក់ថា ប្លាស្ទិកបញ្ចេញសារធាតុពុល និងបង្កគ្រោះថ្នាក់នៅគ្រប់ដំណាក់កាលនៃវដ្តជីវិតរបស់វា ចាប់ពីដំណាក់កាលផលិត ការប្រើប្រាស់ ការកែច្នៃឡើងវិញ រហូតដល់ការគ្រប់គ្រងសំណល់។
សារធាតុគីមីចម្រុះ រួមទាំងលម្អងប្លាស្ទិក នៅពេលចូលទៅក្នុងខ្លួនមនុស្ស អាចបណ្តាលឱ្យកើតជំងឺជាច្រើន ដូចជា ជំងឺបន្តពូជ ការរំខានដល់ការអភិវឌ្ឍប្រព័ន្ធប្រសាទ បញ្ហាភាពស៊ាំ និងជំងឺមេតាប៉ូលីស។
ជាមួយគ្នានេះ ការប្រើប្រាស់ប្លាស្ទិកចាស់ៗឡើងវិញ ក៏ត្រូវបានចាត់ទុកថាជាបញ្ហាសំខាន់ផងដែរ ដោយសារវត្ថុធាតុដើមនៅពេលរលួយ អាចបង្កើនហានិភ័យនៃការបញ្ចេញសារធាតុគីមីគ្រោះថ្នាក់។
ការសិក្សានេះបានជំរុញឱ្យមានការអំពាវនាវដើម្បីពង្រឹងការគ្រប់គ្រងសារធាតុគីមី បង្កើនតម្លាភាពក្នុងការផលិត និងលើកកម្ពស់ការជ្រើសរើសសម្ភារជំនួសដែលមានសុវត្ថិភាព ដើម្បីកាត់បន្ថយការប្រើប្រាស់សារធាតុគ្រោះថ្នាក់ និងឆ្ពោះទៅរកសេដ្ឋកិច្ចប្លាស្ទិកចក្រា និងមានចីរភាព៕
