ការធ្វើពាណិជ្ជកម្មទំនិញទ្វេភាគីរវាងប្រទេសកម្ពុជា-កាណាដា ក្នុងឆ្នាំ២០២៥ មានទឹកប្រាក់ប្រមាណជាង ១,៣ ពាន់លានដុល្លារ កើនឡើង ១៤% បើធៀបនឹងឆ្នាំ២០២៤ ខណៈមន្ត្រីជាន់ខ្ពស់នៃរដ្ឋាភិបាលប្រទេសទាំង ២ បានប្ដេជ្ញានឹងខិតខំជំរុញទំហំពាណិជ្ជកម្មទ្វេភាគី និងកិច្ចសហប្រតិបត្តិការក្នុងវិស័យអាទិភាពជាច្រើនទៀត។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងឆ្នាំ២០២៥ ការនាំចេញនាំចូលទំនិញរវាងប្រទេសកម្ពុជា-កាណាដា មានទឹកប្រាក់សរុប ១,៣៣ ពាន់លានដុល្លារ កើនឡើង ១៤% បើធៀបនឹងឆ្នាំ២០២៤ ដែលមាន ១,១៧ ពាន់លានដុល្លារ។ ក្នុងចំនួននេះ គឺកម្ពុជានាំទៅកាណាដា ១,២៧ ពាន់លានដុល្លារ កើន ១៤,៦% និងទំនិញកាណាដានាំចូលមកកម្ពុជា ៦៣,៤១ លានដុល្លារ កើនឡើង ៣,១%។
ប្រទេសកាណាដា គឺជាដៃគូពាណិជ្ជកម្មអន្តរជាតិធំជាងគេទី ៧ របស់កម្ពុជា បន្ទាប់ពីប្រទេសចិន អាមេរិក វៀតណាម ថៃ ជប៉ុន និងសិង្ហបុរី។
ការធ្វើពាណិជ្ជកម្មរវាងប្រទេសទាំង ២ ត្រូវរំពឹងថានឹងហក់ឡើងបន្ថែមទៀតចាប់ពីឆ្នាំ២០២៦ តទៅបន្ទាប់ពីរដ្ឋាភិបាលកាណាដាកាលពីពេលថ្មីៗនេះ បានសម្រេចវិលត្រឡប់មកបើកនិវេសនដ្ឋានស្ថានទូតកាណាដា ប្រចាំនៅកម្ពុជា(ស្ថិតក្នុងទីក្រុងភ្នំពេញ) ឡើងវិញ។
នៅទីស្តីការក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១៥ ខែមករា ក្នុងជំនួបជាមួយលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ លោក Christian DesRoches ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសកាណាដាប្រចាំកម្ពុជា បានលើកឡើងថា ក្នុងនាមរដ្ឋាភិបាលកាណាដា លោកមានសុទិដ្ឋិនិយមយ៉ាងខ្លាំងចំពោះការអភិវឌ្ឍសេដ្ឋកិច្ច និងសង្គមនៅកម្ពុជានាពេលនេះ ហើយសង្ឃឹមថាទំនាក់ទំនងទ្វេភាគីកម្ពុជា-កាណាដា នឹងកាន់តែមានភាពល្អប្រសើរថែមទៀតចាប់ពីពេលនេះតទៅ។
លោកថ្លែងថា៖«ទាំងក្នុងក្របខណ្ឌទ្វេភាគី អាស៊ាន និងអន្តរជាតិ ទំនាក់ទំនងរវាងប្រទេសកម្ពុជា-កាណាដា នឹងកាន់តែសកម្ម ជាពិសេសក្នុងវិស័យពាណិជ្ជកម្ម និងវិនិយោគ ដែលកំពុងដើរស្របទៅមុខជាមួយនឹងទំនាក់ទំនងកាន់តែជ្រាលជ្រៅខាងនយោបាយ និងការទូតនៃប្រទេសទាំង ២»។
ជាការឆ្លើយតប លោក អូន ព័ន្ធមុនីរ័ត្ន បានបង្ហាញការស្វាគមន៍យ៉ាងកក់ក្ដៅចំពោះ លោក Christian DesRoches និងបានថ្លែងអំណរគុណចំពោះរដ្ឋាភិបាលប្រទេសកាណាដា ដែលបានវិលត្រឡប់មកបើកនិវេសនដ្ឋាននៃស្ថានទូតរបស់ខ្លួនប្រចាំនៅកម្ពុជាឡើងវិញ។
លោកនិយាយថា៖«កិច្ចសហប្រតិបត្តិការទ្វេភាគីនេះ បានបង្ហាញយ៉ាងច្បាស់អំពីការយកចិត្តទុកដាក់របស់កាណាដាក្នុងការពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងហិរញ្ញវត្ថុ ជាមួយកម្ពុជាឱ្យកាន់តែប្រសើរបន្ថែមទៀត»។ លោកបន្តថា៖«រាជរដ្ឋាភិបាលកម្ពុជា ក៏កំពុងយកចិត្តទុកដាក់ និងជំរុញលើកទឹកចិត្តបន្ថែមទៀតដល់ការវិនិយោគ វិនិយោគិនកាណាដា មកដាក់ទុនវិនិយោគនៅកម្ពុជាឱ្យកាន់តែច្រើនផងដែរ»។
នៅមុនបញ្ចប់ជំនួបនេះ ភាគីកម្ពុជា និងកាណាដា សុទ្ធតែបានអះអាងពីការប្ដេជ្ញាចិត្តក្នុងការពង្រឹងកិច្ចសហប្រតិបត្តិការសេដ្ឋកិច្ច និងហិរញ្ញវត្ថុ តាមរយៈការជំរុញការវិនិយោគក្នុងវិស័យសក្ដានុពល ការបង្កើនទំហំពាណិជ្ជកម្មទ្វេភាគី និងការពង្រីកហិរញ្ញប្បទានសហប្រតិបត្តិការក្នុងវិស័យអាទិភាព។ បន្ថែមលើនេះ កម្ពុជា-កាណាដា ក៏នឹងពិនិត្យលទ្ធភាពក្នុងកិច្ចព្រមព្រៀងស្ដីពីការជំរុញ និងការការពារទៅវិញទៅមកនូវការវិនិយោគ និងកិច្ចព្រមព្រៀងស្ដីពីការចៀសវាងការយកពន្ធត្រួតគ្នា ជាដើម។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ថា ប្រទេសកាណាដា គឺជាទីផ្សារដ៏មានសក្តានុពលមួយសម្រាប់ទំនិញកម្ពុជា ដោយទឹកប្រាក់នាំចេញទំនិញរវាងប្រទេសទាំង ២ បានកើនឡើងស្ទើររាល់ឆ្នាំ។ លោកបន្តថា តាមរយៈបរិមាណនាំចេញដ៏ច្រើនពីកម្ពុជា កន្លងមកសភាពាណិជ្ជកម្មកម្ពុជា ក៏បានបើកការិយាល័យតំណាងសភាពាណិជ្ជកម្ម(CCC) នៅក្នុងប្រទេសកាណាដា ផងដែរ។ ការិយាល័យតំណាង CCC មានតួនាទីជួយផ្សព្វផ្សាយផលិតផលកម្ពុជាទៅដល់អតិថិជនកាណាដា និងផ្តល់ព័ត៌មានដើម្បីទាក់ទាញវិនិយោគិនកាណាដាឱ្យមកបណ្តាក់ទុនផ្ទាល់នៅកម្ពុជាកាន់តែច្រើន
លោកបាននិយាយថា៖ «យើងសង្ឃឹមថា តាមរយៈកិច្ចខិតខំរបស់រដ្ឋាភិបាល និងផ្នែកឯកជន ការនាំចេញទំនិញពីកម្ពុជាទៅប្រទេសកាណាដា នឹងបន្តកើនឡើងទៀត»។
បើតាមលោក លឹម ហេង ភាគច្រើននៃទំនិញកម្ពុជានាំទៅកាណាដា គឺជាផលិតផលសម្លៀកបំពាក់ ផលិតផលធ្វើដំណើរ ស្បែកជើង កង់ និងគ្រឿងបង្គុំអេឡិចត្រូនិក អគ្គិសនី ចំណែកទំនិញកាណាដា នាំមកកម្ពុជារួមមាន គ្រឿងអេឡិចត្រូនិក រថយន្ត ជាដើម៕
