ជនបរទេសដែលចំណាយទុនផ្ទាល់ខ្លួនសម្រាប់គម្រោងវិនិយោគត្រឹមត្រូវ ក្នុងទឹកប្រាក់ ៤ ប៊ីលានរៀល ឬ១ លានដុល្លារ និង ជនបរទេសដែលធ្វើអំណោយជាសាច់ប្រាក់ដល់ថវិកាជាតិឬវិស័យមនុស្សធម៌ ១២ ប៊ីលានរៀល ឬ ៣ លានដុល្លារ អាចស្នើសុំសញ្ជាតិខ្មែរបានស្របតាមនីតិវិធី។ នេះបើតាមអនុក្រឹត្យស្ដីពីការអនុវត្តច្បាប់ស្តីពីសញ្ជាតិ។
យោងតាមមាត្រា ២៩ នៃអនុក្រឹត្យស្ដីពីការអនុវត្តច្បាប់ស្តីពីសញ្ជាតិ ចេញផ្សាយនៅថ្ងៃទី១ ខែធ្នូ ឆ្នាំ២០២៥ ជនបរទេសណាដែលបានទទួលការអនុញ្ញាតឱ្យវិនិយោគត្រឹមត្រូវតាមច្បាប់ពីស្ថាប័នមានសមត្ថកិច្ច ស្របតាមគោលនយោបាយអាទិភាពរបស់រាជរដ្ឋាភិបាល អាចដាក់ពាក្យស្នើសុំចូលសញ្ជាតិខ្មែរដោយសញ្ជាតូបនីយកម្មបាន ស្របតាមមាត្រា២១ នៃច្បាប់ស្តីពីសញ្ជាតិ។
លក្ខខណ្ឌនេះ តម្រូវឲ្យជនបរទេសនោះចំណាយទុនផ្ទាល់ខ្លួនអនុវត្តគម្រោងវិនិយោគជាក់ស្តែងនៅក្នុងព្រះរាជាណាចក្រកម្ពុជា ចាប់ពី ៤ ប៊ីលានរៀល ឬចាប់ពី ១ លានដុល្លារឡើងទៅ។ គម្រោងវិនិយោគនេះត្រូវស្ថិតនៅក្នុងវិស័យអាទិភាពដែលរដ្ឋាភិបាលបានកំណត់។
អនុក្រឹត្យបានចែងថា៖ «សម្រាប់ជនបរទេសជាអ្នកវិនិយោគដែលស្នើសុំចូលសញ្ជាតិខ្មែរដោយសញ្ជាតូបនីយកម្ម ត្រូវពិនិត្យវាយតម្លៃដោយក្រសួងមហាផ្ទៃ។ ក្នុងករណីចាំបាច់ ក្រសួងមហាផ្ទៃអាចពិគ្រោះយោបល់ជាមួយក្រសួង ស្ថាប័នពាក់ព័ន្ធ ដើម្បីពិនិត្យនិងសម្រេច។ ទុនវិនិយោគផ្ទាល់ខ្លួន ត្រូវមានប្រភពច្បាស់លាស់និងស្របច្បាប់»។
សម្រាប់ការទទួលបានសញ្ជាតិតាមរយៈការបរិច្ចាគ តម្រូវឲ្យជនបរទេសរូបនោះធ្វើអំណោយសាច់ប្រាក់ដល់ថវិកាជាតិឬវិស័យមនុស្សធម៌ ១២ប៊ីលានរៀល ឬ ៣ លានដុល្លារឡើងទៅ។
មាត្រា៣១ នៃអនុក្រឹត្យនេះចែងថា៖ «ជនបរទេសណាដែលបានធ្វើអំណោយជាសាច់ប្រាក់ផ្ទាល់ខ្លួនដល់ថវិកាជាតិ សម្រាប់ជាផលប្រយោជន៍ដល់ការអភិវឌ្ឍសេដ្ឋកិច្ចសង្គមឬវិស័យមនុស្សធម៌នៅព្រះរាជាណាចក្រកម្ពុជា ជនបរទេសនោះអាចដាក់ពាក្យស្នើសុំចូលសញ្ជាតិខ្មែរដោយសញ្ជាតូបនីយកម្មបានតាមមាត្រា២២ នៃច្បាប់ស្តីពីសញ្ជាតិ ក្នុងករណីដែលជននោះ បានធ្វើអំណោយជាសាច់ប្រាក់ចំនួនចាប់ពី ១២ ប៊ីលានរៀល (៣ លានដុល្លារ) ឡើងទៅ»។
អនុក្រឹត្យដដែលក៏បានបញ្ជាក់ដែរថា៖ «អំណោយជាសាច់ប្រាក់ផ្ទាល់ខ្លួន ត្រូវមានប្រភពច្បាស់លាស់និងស្របច្បាប់។ អំណោយនោះត្រូវបង់ចូលថវិកាជាតិ តាមរយៈក្រសួងសេដ្ឋកិច្ចនិងហិរញ្ញវត្ថុ»។
កាលពីកន្លងទៅ ការស្នើសុំសញ្ជាតិខ្មែររបស់វិនិយោគិនបរទេស តម្រូវឲ្យមានគម្រោងទឹកប្រាក់វិនិយោគត្រឹមតែជាង ៣០ម៉ឺនដុល្លារ ចំណែកការស្នើសុំសញ្ជាតិតាមរយៈការធ្វើអំណោយ គឺមានទឹកប្រាក់២៤ម៉ឺនដុល្លារ៕