ពលរដ្ឋជិត ៣០០០គ្រួសារ នៅខេត្តបន្ទាយមានជ័យ និងពោធិ៍សាត់ មិនអាចត្រលប់ទៅផ្ទះសម្បែងរបស់ខ្លួនវិញបាន ខណៈជនភៀសសឹកជាច្រើនបានត្រឡប់ទៅផ្ទះសម្បែងដែលខូចខាត ហើយបន្តស្នាក់នៅកន្លែងភៀសសឹកថ្មី។ នេះបើតាមតួលេខរបស់ក្រសួងមហាផ្ទៃ គិតត្រឹមម៉ោង៦ ព្រឹកថ្ងៃទី១៦ ខែមករា។
យោងតាមក្រសួងមហាផ្ទៃ ពលរដ្ឋសរុបយ៉ាងហោចណាស់ ២៨២២គ្រួសារ ក្នុងនោះ២៧៣៥គ្រួសារនៅខេត្តបន្ទាយមានជ័យ និង ៨៧គ្រួសារនៅខេត្តពោធិ៍សាត់ មិនអាចវិលត្រឡប់ទៅភូមិឋានផ្ទះសម្បែងរបស់ពួកគ។ ទោះបីជាក្រសួងមិនបានបញ្ជាក់ពីមូលហេតុ វាទំនងជាបណ្ដាលមកពីការដាក់ទូរកុងតឺន័រ និងការព័ទ្ធបន្លាលួសរារាំងដោយយោធាថៃ។
ស្របពេលជាមួយគ្នានេះ នៅខេត្តឧត្តរមានជ័យ មានភូមិចំនួន៨៤ពុំទាន់អាចឱ្យពលរដ្ឋចូលទៅរស់នៅបាន ដោយអាជ្ញាធរដែនដី និងមន្ត្រីពាក់ព័ន្ធកំពុងរៀបចំផ្ទះ និងភូមិកររបស់ពួកគេ។
គិតត្រឹមព្រឹកថ្ងៃទី១៦ ខែមករានេះ ពលរដ្ឋភៀសសឹកដែលបន្តស្នាក់នៅជំរំមានចំនួន១៤០.៦៩៣នាក់ ក្នុងនោះស្ត្រីមាន៧៣.៦១៦នាក់ និងកុមារ ៤៦.១៨០នាក់។
ក្រសួងបញ្ជាក់ថា៖ «ពលរដ្ឋភៀសសឹកខ្លះវិលដល់ភូមិករមែន ប៉ុន្តែត្រូវបង្ខំចិត្តស្នាក់នៅជំរំបណ្តោះអាសន្នជាថ្មីទៀត ដោយសារផ្ទះសំបែងបានខូចខាតខ្ទេចរាបដល់ដី និងពោរពេញដោយសំណល់យុទ្ធភណ្ឌមិនទាន់ផ្ទុះរបស់យោធាថៃ»។
អាជ្ញាធរក៏កំពុងប្រឹងប្រែអធ្វើកិច្ចអន្តរាគមន៍រៀបចំផ្ទះសំបែង និងភូមិករពលរដ្ឋភៀសសឹក ដើម្បីឲ្យពួកគេអាចត្រឡប់ទៅផ្ទះស្បែងវិញ ព្រមទាំងបន្តចុះស្រង់ផលប៉ះពាល់ និងការខូចខាត និងបន្តដឹកជញ្ជូនស្បៀង និងត្រៀមមធ្យោបាយដឹកជញ្ជូនពលរដ្ឋត្រឡប់ មកកាន់លំនៅឋានវិញ៕