ខេត្ដឧត្ដរមានជ័យ៖ ពលរដ្ឋភៀសសឹកជាង ៣,០០០ គ្រួសារ ដែលរងផលប៉ះពាល់ពីការប៉ះទង្គិចតាមព្រំដែនកម្ពុជា–ថៃ បានទទួលជំនួយជាសាច់ប្រាក់បន្ទាន់ ដែលបង្ហាញថា វិបត្តិមនុស្សធម៌នៅតំបន់ព្រំដែននៅតែបន្តអូសបន្លាយ ខណៈប្រជាពលរដ្ឋជាច្រើនមិនទាន់អាចវិលត្រឡប់ទៅលំនៅឋានរបស់ខ្លួនវិញបាន។
នៅថ្ងៃទី១៥ ខែមករា ឆ្នាំ២០២៦ ការចែកចាយជំនួយជាសាច់ប្រាក់បានចាប់ផ្តើមសម្រាប់ពលរដ្ឋភៀសខ្លួនចំនួន ៣,០៥០ គ្រួសារ នៅតាមជំរំក្នុងខេត្តព្រះវិហារ សៀមរាប ឧត្តរមានជ័យ និងបន្ទាយមានជ័យ។
យោងតាមស្ថានទូតអូស្ដ្រាលីប្រចាំកម្ពុជា បានឱ្យដឹងថា៖ «ជំនួយនេះមានគោលបំណងជួយបំពេញតម្រូវការបន្ទាន់ ដូចជា អាហារ ជម្រក និងសម្ភារៈចាំបាច់ ខណៈគ្រួសារជាច្រើននៅតែរស់នៅក្នុងស្ថានភាពមិនច្បាស់លាស់បន្ទាប់ពីការរត់ភៀសសឹកដោយសារជម្លោះ»។
នៅជំរំចុងកាល់ថ្មី ខេត្តឧត្តរមានជ័យ ការចែកចាយបានឈានដល់ពលរដ្ឋភៀសសឹកចំនួន ១,៥១៩ គ្រួសារ ដោយមានការចូលរួមពីលោក ឌឺរេក យីប ឯកអគ្គរដ្ឋទូតអូស្ត្រាលីប្រចាំកម្ពុជា លោកស្រី សុភាន់ ផាន នាយិកាជាតិអង្គការអុកស្វាមនៅកម្ពុជា លោក មាន ចាន់យ៉ាដា អភិបាលខេត្តឧត្តរមានជ័យ និងដៃគូមូលដ្ឋាន។
វត្តមានថ្នាក់ដឹកនាំទាំងនេះបង្ហាញពីកម្រិតនៃតម្រូវការមនុស្សធម៌ និងសារៈសំខាន់នៃការសហការរវាងដៃគូជាតិ និងអន្តរជាតិ។
លោក ចាន់យ៉ាដា អភិបាលខេត្តឧត្តរមានជ័យ បានថ្លែងថា ជំនួយនេះនឹងជួយបន្ថយបន្ទុកភ្លាមៗដល់គ្រួសារដែលបានអស់ធនធានក្រោយពេលភៀសខ្លួនអស់រយៈពេលជាច្រើនសប្តាហ៍។
លោកក៏បានអំពាវនាវដល់សហគមន៍អន្តរជាតិជួយជំរុញឱ្យបទឈប់បាញ់មានស្ថិរភាពជាអចិន្ត្រៃយ៍ ដើម្បីឱ្យប្រជាពលរដ្ឋអាចត្រឡប់ទៅផ្ទះវិញដោយសុវត្ថិភាព។
លោក ឌឺរេក យីប បានឱ្យដឹងថា អូស្ត្រាលីបានបង្កើនការគាំទ្រដល់កម្ពុជា ដើម្បីឆ្លើយតបទៅនឹងបញ្ហាប្រឈមធ្ងន់ធ្ងរដែលជនស៊ីវិលកំពុងជួបប្រទះ។
លោកបានថ្លែងថា «អូស្ត្រាលីជាដៃគូដ៏គួរឱ្យទុកចិត្តរបស់កម្ពុជា អស់រយៈពេលយូរ។ ការលំបាករបស់ប្រជាជនកម្ពុជាដែលត្រូវភៀសខ្លួនដោយសារជម្លោះគឺធ្ងន់ធ្ងរ ហើយអូស្ត្រាលីបានផ្តល់ជំនួយបន្ទាន់ រួមមាន ទឹកស្អាត អាហារ ជម្រក អនាម័យ និងជំនួយហិរញ្ញវត្ថុ ដើម្បីជួយបំពេញតម្រូវការបន្ទាន់របស់គ្រួសារ»។
លោកស្រី សុភាន់ ផាន នាយិកាជាតិអង្គការអុកស្វាមនៅកម្ពុជា បានថ្លែងថា ការចែកចាយជំនួយលើកនេះ គឺជាការឆ្លើយតបដំបូងក្រោមការគាំទ្ររបស់រដ្ឋាភិបាលអូស្ត្រាលី ប៉ុន្តែបានបញ្ជាក់ថា តម្រូវការមនុស្សធម៌នៅតែមានកម្រិតខ្ពស់។
លោកស្រីបានបញ្ជាក់ថា៖ «នេះជាអន្តរាគមន៍មនុស្សធម៌លើកទី៦ របស់អុកស្វាម ចាប់តាំងពីខែកក្កដា ឆ្នាំ២០២៥ មក។ ការលំបាករបស់គ្រួសារជនភៀសខ្លួននៅតែធ្ងន់ធ្ងរ ហើយត្រូវការការខិតខំរួមគ្នា ដើម្បីធានាថាសហគមន៍ងាយរងគ្រោះទទួលបានការគាំទ្របន្ត និងឱកាសក្នុងការកសាងជីវិតឡើងវិញដោយមានសេចក្តីថ្លៃថ្នូរ»។
ជំនួយជាសាច់ប្រាក់នេះ ជាផ្នែកមួយនៃកញ្ចប់ជំនួយមនុស្សធម៌របស់រដ្ឋាភិបាលអូស្ត្រាលី ចំនួន ២៥០,០០០ ដុល្លារអាមេរិក តាមរយៈអង្គការអុកស្វាម ដើម្បីជួយជនភៀសខ្លួននៅកម្ពុជា។ ជាមួយនឹងថវិកានេះ អុកស្វាមនឹងផ្តល់ការគាំទ្រផ្នែកទឹកស្អាត អនាម័យ អាហារ និងជម្រកបន្ទាន់។
ទោះបីជាមានជំនួយថ្មីនេះក៏ដោយ អង្គការមនុស្សធម៌បានព្រមានថា ការភៀសខ្លួនអាចបន្តអូសបន្លាយ ប្រសិនបើស្ថានការណ៍សន្តិសុខតាមព្រំដែនមិនប្រសើរឡើង។
សម្រាប់គ្រួសារដែលនៅតែរស់នៅក្នុងជំរំ ជំនួយជាសាច់ប្រាក់អាចជួយសម្រួលការលំបាកបណ្តោះអាសន្ន ប៉ុន្តែមិនទាន់អាចជាជំរើសចុងក្រោយ ខណៈអនាគតនៅតែពោរពេញដោយភាពមិនច្បាស់លាស់៕
