លោក Michael George DeSombre ឧបការីរដ្ឋមន្ត្រីក្រសួងការបរទេសសហរដ្ឋអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក គ្រោងនឹងមកបំពេញទស្សនកិច្ចនៅរាជធានីភ្នំពេញ នៅថ្ងៃទី១០ ខែមករា ខណៈដែលសហរដ្ឋអាមេរិកបានសន្យាផ្តល់ជំនួយចំនួន ៤៥លានដុល្លារ ដើម្បីចូលរួមចំណែកដោះស្រាយវិវាទរវាងកម្ពុជា និងថៃ។
នៅក្នុងសន្និសីទសារព័ត៌មានតាមប្រព័ន្ធ Zoom នៅរសៀលថ្ងៃទី៩ ខែមករានេះ លោក DeSombre បានថ្លែងថា លោកបានជួបជាមួយមន្ត្រីថៃនៅទីក្រុងបាងកកនៅថ្ងៃនេះ ដើម្បីពិភាក្សាអំពីការអនុវត្តកិច្ចព្រមព្រៀងសន្តិភាពទីក្រុងគូឡាឡាំពួ និងកិច្ចខិតខំប្រឹងប្រែងទូលំទូលាយក្នុងការលើកកម្ពស់ផលប្រយោជន៍រួម នៅក្នុងតំបន់ឥណ្ឌូ-ប៉ាស៊ីហ្វិក ដែលកាន់តែមានសុវត្ថិភាព រឹងមាំ និងសម្បូររុងរឿងជាងមុន។
លោកបានបញ្ជាក់ថា សហរដ្ឋអាមេរិកនឹងបន្តគាំទ្ររដ្ឋាភិបាលកម្ពុជា និងថៃ ដើម្បីអនុវត្តកិច្ចព្រមព្រៀងសន្តិភាពទីក្រុងគូឡាឡាំពួ និងត្រួសត្រាយផ្លូវសម្រាប់ការវិលត្រឡប់ទៅរកសន្តិភាព វិបុលភាព និងស្ថិរភាពសម្រាប់ប្រជាជនរបស់ពួកគេ និងតំបន់ទាំងមូល។
លោកថ្លែងដូច្នេះថា៖ «ដើម្បីជួយសម្រេចកិច្ចការនេះ ខ្ញុំមានមោទកភាពក្នុងការប្រកាសថា យើងនឹងផ្តល់ថវិកា ១៥លានដុល្លារ សម្រាប់ធ្វើឱ្យមានស្ថិរភាពព្រំដែន ដើម្បីជួយសហគមន៍ឱ្យងើបឡើងវិញ និងជួយដល់ជនភៀសសឹក, ១០លានដុល្លារ សម្រាប់ប្រតិបត្តិការដោះមីន និងគ្រាប់យុទ្ធភណ្ឌមិនទាន់ផ្ទុះ និង ២០លានដុល្លារ សម្រាប់គំនិតផ្តួចផ្តើមនានាដែលនឹងជួយប្រទេសទាំងពីរក្នុងការប្រយុទ្ធប្រឆាំងនឹងប្រតិបត្តិការឆបោក និងការជួញដូរគ្រឿងញៀន រួមទាំងកម្មវិធីជាច្រើនទៀតផងដែរ»។
បើតាមលោក DeSombre ការស្ដារសន្តិភាពនៅព្រំដែនថៃ-កម្ពុជា នឹងបើកឱកាសថ្មីសម្រាប់សហរដ្ឋអាមេរិកក្នុងការពង្រឹងកិច្ចសហការជាមួយប្រទេសទាំងពីរ ដើម្បីលើកកម្ពស់ស្ថិរភាពក្នុងតំបន់ និងជំរុញផលប្រយោជន៍របស់រួមនៅក្នុងតំបន់ឥណ្ឌូ-ប៉ាស៊ីហ្វិកឱ្យកាន់តែមានសុវត្ថិភាព រឹងមាំ និងសម្បូររុងរឿង។
លោកក៏បានស្វាគមន៍ចំពោះបទឈប់បាញ់ចុងក្រោយនេះ ដោយបានលើកឡើងពីការចេញសារគាំទ្រដោយផ្ទាល់ពីសំណាក់ ប្រធានាធិបតី ដូណាល់ ត្រាំ និងរដ្ឋមន្ត្រីការបរទេស ម៉ាកូ រូប៊ីយ៉ូ (Marco Rubio) ផងដែរ។ លើសពីនេះ លោកក៏បានស្វាគមន៍ចំពោះការដោះលែងទាហានកម្ពុជាចំនួន ១៨នាក់ កាលពីថ្ងៃទី៣១ ខែធ្នូ។
លោកបានថ្លែងថា៖ «ការដោះលែងទាហានកម្ពុជា ១៨នាក់ ពីសំណាក់ភាគីថៃ គឺជាជំហានដ៏សំខាន់មួយឆ្ពោះទៅរកសន្តិភាពយូរអង្វែង»៕
