លោកនាយករដ្ឋមន្ត្រី ហ៊ុន ម៉ាណែត បានដកហូតមុខតំណែងឧត្តមសេនីយ៍ឯក សុខ លីហួត ពីអគ្គនាយករងនៃអគ្គនាយកដ្ឋានអន្តោប្រវេសន៍ ឱ្យមកនៅកម្រិតជាមន្ត្រីធម្មតា ដោយមិនបញ្ជាក់ពីមូលហេតុ។
ការដកហូតមុខតំណែងនេះ ធ្វើឡើងតាមរយៈអនុក្រឹត្យ ដែលបានសម្រេចនៅថ្ងៃទី៨ មករា ដែលទើបត្រូវបានផ្សព្វផ្សាយនៅថ្ងៃទី១៩ ខែមករានេះ។ យោងតាមអនុក្រឹត្យរបស់លោក ការដកមុខតំណែងនេះ ធ្វើឡើងតាមសំណើរបស់ក្រសួងមហាផ្ទៃ។
យ៉ាងណាក៏ដោយ លោក ទូច សុខៈ អ្នកនាំពាក្យក្រសួងមហាផ្ទៃ បានថ្លែងថា ការដកហូតមុខតំណែងនេះ មិនពាក់ព័ន្ធនឹងអំពើល្មើសណាមួយនោះទេ ស្របពេលដែលរដ្ឋាភិបាលកំពុងបង្កើនការបង្ក្រាបបទល្មើសឆបោកតាមអនឡាញ។
លោក ទូច សុខៈ ថ្លែងថា៖ «ករណីនេះផ្ដើមចេញពីបញ្ហាផ្ទាល់ខ្លួនរបស់គាត់ បញ្ហាក្រុមគ្រួសាររបស់គាត់ ដែលជាបន្តបន្ទាប់ជះទៅដល់ប្រសិទ្ធភាពនៃការងាររបស់អង្គភាព និងវិន័យរបស់នគរបាលជាតិជាបន្តបន្ទាប់។ ទាំងនេះនាំឲ្យក្រុមប្រឹក្សាវិន័យប្រជុំនិងសម្រេចស្នើសុំទៅកាន់សម្ដេចនាយករដ្ឋមន្ត្រី ហើយសម្ដេចលោកសម្រេចទៅតាមកសារស្នើសុំ បន្ទាប់ពីក្រុមប្រឹក្សាវិន័យបានធ្វើការម៉ត់ចត់»។
យ៉ាងណាក៏ដោយ លោក ទូច សុខៈ មិនបានបញ្ជាក់ថា បញ្ហាផ្ទាល់ខ្លួននោះយ៉ាងណានោះទេ៕
