ទឹកប្រាក់ដែលកម្ពុជាប្រមូលបានពីការនាំចេញផលិតផលសម្លៀកបំពាក់ ស្បែកជើង និងផលិតផលធ្វើដំណើរ ទៅទីផ្សារអន្តរជាតិកាលពីឆ្នាំ២០២៥ មានតម្លៃជិត ១៦ ពាន់លានដុល្លារ កើនឡើងជិត ១៦% បើធៀបនឹងឆ្នាំ២០២៤។ ចំនួននេះគឺស្មើនឹងជាងពាក់កណ្តាលនៃចំនួនទឹកប្រាក់នាំទំនិញចេញសរុបរបស់កម្ពុជាក្នុងឆ្នាំ២០២៥។
ក្នុងពិធីសន្និបាតលើកទី ១៧ របស់សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) កាលពីថ្ងៃទី១៧ ខែមករា ឆ្នាំ២០២៥ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ក្នុងឆ្នាំ២០២៥ កម្ពុជារកចំណូលពីការនាំចេញផលិតផលវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរ បានប្រាក់ប្រមាណ ១៥,៧ ពាន់លានដុល្លារ កើនឡើង ១៥,៨% បើធៀបនឹងឆ្នាំ២០២៤ ដែលមាន ១៣,៥ ពាន់លានដុល្លារ។
យោងតាមអគ្គនាយកដ្ឋានគយ និងរដ្ឋាករកម្ពុជា(GDCE) ក្នុងឆ្នាំ២០២៥ កម្ពុជាបាននាំចេញទំនិញទៅទីផ្សារអន្តរជាតិក្នុងទឹកប្រាក់សរុប ៣០,១៥ ពាន់លានដុល្លារ កើន ១៤,៧% បើធៀបនឹងឆ្នាំ២០២៤។ ទឹកប្រាក់ដែលទទួលបានពីការនាំចេញផលិតផលវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរ មានចំណែកប្រមាណ ៥២% នៃចំនួនទឹកប្រាក់នាំសរុបរបស់កម្ពុជាក្នុងឆ្នាំ២០២៥។
រដ្ឋមន្ត្រីក្រសួងការងារ លោក ហេង សួរ បាននិយាយថា ការខិតខំរបស់រដ្ឋាភិបាល និងផ្នែកឯកជន ជាពិសេសសមាគម TAFTAC គឺបានចូលរួមចំណែកយ៉ាងច្រើនក្នុងការជួយលើកកម្ពស់វិស័យវាយនភណ្ឌនៅកម្ពុជា។ ភាពជោគជ័យរបស់ TAFTAC បាននាំមកនូវផលប្រយោជន៍ជាច្រើនដល់និយោជក និងកម្មករនិយោជិត តាមរយៈការបង្កើតការងារ និងប្រាក់ចំណូល ព្រមទាំងរួមចំណែកយ៉ាងសំខាន់ក្នុងការរក្សាស្ថិរភាពម៉ាក្រូសេដ្ឋកិច្ច និងពិពិធកម្មរចនាសម្ព័ន្ធឧស្សាហកម្មកម្ពុជាឱ្យស្របតាមចក្ខុវិស័យវែងឆ្ងាយរបស់រាជរដ្ឋាភិបាល។
លោកបានថ្លែងថា៖«ក្នុងរយៈពេល ២៩ឆ្នាំមកនេះ សមាគម TAFTAC បានដើរតួនាទីជាតំណាងសំឡេងរួមតែមួយរបស់វិនិយោគិន ការពារ និងលើកកម្ពស់សិទ្ធិ និងប្រយោជន៍ស្របច្បាប់របស់វិនិយោគិនទាំងអស់ និងបានបង្កើតនូវវេទិកាសម្រាប់ការប្រឹក្សាយោបល់ និងកិច្ចសន្ទនាសង្គមនានាជាមួយគ្រប់ភាគីពាក់ព័ន្ធ ដើម្បីបង្កើតនូវបរិយាកាសវិនិយោគដែលអំណោយផលដល់កំណើននៃការនាំចេញ និងការអភិវឌ្ឍប្រកបដោយចីរភាព»។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ថា ការនាំចេញផលិតផលវាយនភណ្ឌកម្ពុជា បានពឹងផ្អែកស្ទើរទាំងស្រុងទៅលើតម្រូវការពីប្រទេសសំខាន់ៗមួយចំនួនដូចជា អាមេរិក កាណាដា សហគមអឺរ៉ុប និងប្រទេសក្នុងតំបន់អាស៊ីមួយចំនួន។ លោកបន្តថា ការនាំចេញផលិតផលវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរ ត្រូវរំពឹងថានឹងកើនឡើងថែមទៀតក្នុងឆ្នាំ២០២៦ នេះ ខណៈកាលពីឆ្នាំ២០២៥ គេសង្កេតឃើញមានរោងចក្រ/សហគ្រាសក្នុងវិស័យវាយនភណ្ឌជាច្រើនបានបន្តចូលមកបើកដំណើរការនៅកម្ពុជា។
លោកថ្លែងថា៖«សមត្ថភាពផលិតកម្ម និងកំណើនតម្រូវការនៅទីផ្សារអន្តរជាតិបានធ្វើឱ្យទឹកប្រាក់នាំចេញផលិតផលវាយនភណ្ឌ ស្បែកជើង និងផលិតផលធ្វើដំណើរកើនឡើងគួរឱ្យកត់សម្គាល់កាលពីឆ្នាំ២០២៥។ ប្រសិនបើស្ថានភាពសេដ្ឋកិច្ច និងនយោបាយពិភពលោកកាន់តែល្អប្រសើរក្នុងឆ្នាំ២០២៦ នេះ គឺការនាំចេញរបស់កម្ពុជាប្រាកដជានឹងកើនឡើងថែមទៀត»៕