ក្រសួងសន្តិសុខសាធារណៈចិន បានប្រកាសនៅថ្ងៃទី៨ ខែមករានេះថា ខ្លួនបានធ្វើបត្យាប័នឈ្មោះ Chen Zhi ដែលជាជនជាតិចិន ពីប្រទេសកម្ពុជាដោយជោគជ័យ កាលពីថ្ងៃទី៧ ខែមករា។
ទីភ្នាក់ងារសារព័ត៌មាន Xinhua បានរាយការណ៍នៅថ្ងៃនេះថា ប្រតិបត្តិការនេះធ្វើឡើងដោយមានការគាំទ្រ និងកិច្ចសហប្រតិបត្តិការពីសំណាក់ស្ថាប័នពាក់ព័ន្ធរបស់កម្ពុជា ខណៈដែលកងកម្លាំងនគរបាលចិនមួយក្រុម ត្រូវបានក្រសួងសន្តិសុខសាធារណៈចាត់បញ្ជូនមកកម្ពុជា កាលពីថ្ងៃទី៧ ខែមករា ដើម្បីនាំខ្លួន Chen Zhi។
ក្រសួងបានកំណត់អត្តសញ្ញាណឈ្មោះ Chen Zhi ថាជាមេក្លោងនៃបណ្ដាញល្បែងស៊ីសង និងការឆបោកឆ្លងដែនដ៏ធំមួយ។
Xinhua បានលើកឡើងការអះអាងរបស់ក្រសួងសន្តិសុខសាធារណៈចិនថា៖ «នេះគឺជាសមិទ្ធផលដ៏សំខាន់មួយទៀត នៅក្នុងកិច្ចសហប្រតិបត្តិការអនុវត្តច្បាប់រវាងប្រទេសចិន និងកម្ពុជា»។
ប្រភពដដែលបានបញ្ជាក់ថា ការស៊ើបអង្កេតបានរកឃើញថា ក្រុមឧក្រិដ្ឋជនរបស់ Chen Zhi ត្រូវបានសង្ស័យថាបានប្រព្រឹត្តបទល្មើសជាច្រើន រួមមាន ការបើកកាស៊ីណូលេងល្បែងស៊ីសង, ការឆបោក, ការធ្វើអាជីវកម្មខុសច្បាប់ និងការលាក់បាំងផលដែលបានមកពីបទឧក្រិដ្ឋ។
Chen Zhi ត្រូវបានដាក់ឲ្យស្ថិតក្រោមវិធានការឃុំខ្លួនស្របតាមច្បាប់ ហើយសំណុំរឿងនេះកំពុងស្ថិតក្រោមការស៊ើបអង្កេតបន្ត។
បើតាម Xinhua ដដែល ក្រសួងសន្តិសុខសាធារណៈបានថ្លែងថា នគរបាលនឹងចេញដីកាចាប់ខ្លួនសមាជិកស្នូលនៃក្រុមឧក្រិដ្ឋជនរបស់ Chen Zhi ក្នុងពេលឆាប់ៗនេះ ហើយនឹងប្ដេជ្ញានាំខ្លួនជនគេចខ្លួនទាំងអស់មកកាត់ទោសតាមច្បាប់។
បើតាម Xinhua ដដែល នគរបាលចិនព្រមានយ៉ាងម៉ឺងម៉ាត់ដល់ឧក្រិដ្ឋជន ឲ្យយល់ដឹងពីស្ថានការណ៍ ភ្ញាក់រលឹកពីកំហុស និងចូលមកសារភាពចំពោះមុខអាជ្ញាធរជាបន្ទាន់ ដើម្បីទទួលបានការអនុគ្រោះ៕