បន្ទាយមានជ័យ៖ កិច្ចប្រជុំក្រុមលេខាធិការដ្ឋាននៃគណៈកម្មាធិការព្រំដែនថ្នាក់យោធភូមិភាគកម្ពុជា–ថៃ (RBC) បានចាប់ផ្តើមជាផ្លូវការ នៅរសៀលថ្ងៃទី២៧ ខែមករា ឆ្នាំ២០២៦ នៅច្រកអន្តរជាតិប៉ោយប៉ែត ខេត្តបន្ទាយមានជ័យ ទល់នឹងខេត្តស្រះកែវ ប្រទេសថៃ។
យោងតាមលោកស្រី ម៉ាលី សុជាតា អ្នកនាំពាក្យក្រសួងការពារជាតិ បានឱ្យដឹងក្នុងសេចក្តីប្រកាសព័ត៌មានថា កិច្ចប្រជុំនេះធ្វើឡើងរវាងយោធភូមិភាគទី៥ ភាគីកម្ពុជា និងកងទ័ពភូមិភាគទី១ ភាគីថៃ។
លោកស្រីបានថ្លែងថា៖ «គណៈប្រតិភូកម្ពុជា ដឹកនាំដោយ ឧត្តមសេនីយ៍ទោ សរ គឹមប៉ាក់ ប្រធានក្រុមលេខាធិការដ្ឋាន RBC កម្ពុជា ខណៈគណៈប្រតិភូថៃ ដឹកនាំដោយ ឧត្តមសេនីយ៍ទោ ភិថាយ៉ាគូល ពោធិ៍សុវណ្ណ ប្រធានក្រុមលេខាធិការដ្ឋាន RBC ថៃ»។
ក្នុងកិច្ចប្រជុំ ភាគីទាំងពីរបានពិភាក្សាលើខ្លឹមសារសំខាន់ៗ និងផ្លាស់ប្តូរឯកសារពាក់ព័ន្ធ ដើម្បីត្រៀមរៀបចំសម្រាប់កិច្ចប្រជុំពិសេសនៃគណៈកម្មាធិការព្រំដែនថ្នាក់យោធភូមិភាគកម្ពុជា–ថៃ (RBC) ដែលគ្រោងនឹងប្រព្រឹត្តទៅនៅថ្ងៃទី២៩ ខែមករា ឆ្នាំ២០២៦ ខាងមុខ។
ក្រសួងការពារជាតិបានបញ្ជាក់ថា កិច្ចប្រជុំនេះធ្វើឡើងដោយផ្អែកលើស្មារតីនៃសេចក្តីប្រកាសរួម នៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) រវាងកម្ពុជា និងថៃ កាលពីថ្ងៃទី២៧ ខែធ្នូ ឆ្នាំ២០២៥ ដើម្បីជំរុញការអនុវត្តសេចក្តីប្រកាសរួមឱ្យបានពេញលេញ និងប្រកបដោយប្រសិទ្ធភាព ព្រមទាំងកសាងទំនុកចិត្តគ្នាទៅវិញទៅមក សំដៅលើការថែរក្សាសន្តិភាព និងស្ថិរភាពតាមបណ្តោយព្រំដែន និងការវិលត្រឡប់ទៅរកប្រក្រតីភាពឡើងវិញ។
សេចក្តីប្រកាសព័ត៌មានបានបន្ថែមថា កិច្ចប្រជុំក្រុមលេខាធិការដ្ឋាន RBC នេះ នឹងប្រព្រឹត្តទៅរយៈពេលពីរថ្ងៃ គឺចាប់ពីថ្ងៃទី២៧ ដល់ថ្ងៃទី២៨ ខែមករា ឆ្នាំ២០២៦ ក្រោមការសង្កេតការណ៍របស់ក្រុមអ្នកសង្កេតការណ៍អាស៊ាន (AOT) ពីភាគីកម្ពុជា និងថៃផងដែរ៕
