លោក ហ៊ុន ម៉ាណែត នាយករដ្ឋមន្ត្រីកម្ពុជាបានលើកឡើងពីការរំលោភបំពានអធិបតេយ្យភាពនិងការគ្រប់គ្រងទឹកដីកម្ពុជាដោយយោធាថៃ នៅក្នុងដំណើរទៅចូលរួមកិច្ចប្រជុំក្រុមប្រឹក្សាសន្តិភាព ទោះបីជាមន្ត្រីជាន់ខ្ពស់ថៃអះអាងថា ពួកគេកំពុងឃ្លាំមើលសកម្មភាពរបស់លោកនៅក្រៅប្រទេស។
ក្នុងបទសម្ភាសជាមួយសារព័ត៌មានអន្តរជាតិនៅរដ្ឋធានីវ៉ាស៊ីនតោន សហរដ្ឋអាមេរិក លោក ហ៊ុន ម៉ាណែត ត្រូវបានស្រង់សម្ដីដែលលោកថ្លែងថា យោធាថៃកំពុងគ្រប់គ្រងផ្នែកនៃទឹកដីកម្ពុជា ក្រោយបទឈប់បាញ់ដែលលោក ត្រាំ បានសម្របសម្រួល ហើយលោកអំពាវនាវឲ្យភាគីថៃឲ្យងាកមកប្រើយន្តការវាស់វែងបោះបង្គោលព្រំដែនឡើងវិញតាមរយៈ JBC។
យោងរតាមទីភ្នាក់ងារព័ត៌មានរ៉យទ័រ ក្រុមប្រឹក្សាសន្តិភាពត្រូវបានបង្កើតឡើងដើម្បីត្រួតពិនិត្យផែនការសន្តិភាពហ្គាហ្សា ប៉ុន្តែលោក ត្រាំ បាននិយាយថា លោកក្រុមប្រឹក្សានេះក៏នឹងដើរតួនាទីកាន់តែទូលំទូលាយជាងនេះផងដែរ។
លោក ហ៊ុន ម៉ាណែត បានរ៉យទ័រថា កងកម្លាំងថៃបានចូលកាន់កាប់ជ្រៅចូលទៅក្នុងទឹកដីកម្ពុជានៅក្នុងតំបន់ជាច្រើន ដែលនេះគឺហួសពីការទាមទារជាឯកតោភាគីរបស់ថៃផ្ទាល់ គឺហួសខ្សែបន្ទាត់ព្រំដែន។ លោកបន្ថែមថា កងទ័ពថៃបានដាក់កុងតឺន័រ និងលួសបន្លានៅក្នុងទីតាំងដែលថៃបានទទួលស្គាល់ជាយូរមកហើយថាជាទឹកដីកម្ពុជា ហើយប្រជាជនកម្ពុជាមិនអាចវិលត្រឡប់ទៅផ្ទះវិញបានទេ។
លោកថា ការពិតនៅលើដីបែបនេះ កម្ពុជាមិនអាចទទួលយកបានទេ ព្រោះវាជាការរំលោភបំពានអធិបតេយ្យភាព ឬបូរណភាពទឹកដីរបស់កម្ពុជា។
លោក ហ៊ុន ម៉ាណែត បានថ្លែងថា៖ «មធ្យោបាយតែមួយគត់ដើម្បីផ្ទៀងផ្ទាត់នោះគឺការប្រើប្រាស់យន្តការបច្ចេកទេសដែលយើងមាន ដោយផ្អែកលើសន្ធិសញ្ញា ដោយផ្អែកលើកិច្ចព្រមព្រៀងទាំងអស់ដែលយើងមាន។ ដូច្នេះយើងសង្ឃឹមថា ថៃនឹងយល់ព្រម និងចាប់ផ្តើមអនុញ្ញាតឲ្យ JBC ធ្វើការឲ្យបានឆាប់តាមដែលអាចធ្វើទៅបាន»។
លោក ហ៊ុន ម៉ាណែត ក៏បានលើកឡើងផងដែរថា ភាគីថៃបានយកមូលហេតុបោះឆ្នោតដើម្បីពន្យារការធ្វើការជាមួយកម្ពុជាក្នុងការវាស់វែងសកំណត់ខណ្ឌសីមា។
លោកនាយករដ្ឋមន្ត្រីត្រូវបានស្រង់សម្ដីថា៖ «ឥឡូវនេះការបោះឆ្នោតបានចប់ហើយ យើងសង្ឃឹមថា ថៃអាចចាប់ផ្តើមយ៉ាងហោចណាស់នៅកម្រិតបច្ចេកទេស ដើម្បីចាប់ផ្តើមវាស់វែង ចាប់ផ្តើមកំណត់ព្រំដែននៅក្នុងតំបន់ក្តៅ ដើម្បីឲ្យយើងអាចត្រឡប់ទៅរកជីវិតធម្មតាវិញបាន»។
ដំណើរទស្សនកិច្ចរបស់លោក ហ៊ុន ម៉ាណែត ទៅសហរដ្ឋអាមេរិក និងបន្តទៅតំបន់អឺរ៉ុប កំពុងស្ថិតនៅក្រោមក្រសែភ្នែករបស់អាជ្ញាធរថៃ ដោយរដ្ឋមន្ត្រីការបរទេសសីហាសាក់ ភួងកេតកែវ បានថ្លែងកាលពីម្សិលមិញថា ថៃកំពុងតាមដានសកម្មភាពរបស់លោក ហ៊ុន ម៉ាណែត នៅបរទេស ជាពិសេសជំនួបជាមួយលោក ដូណាល់ ត្រាំ និងការស្នើសុំឯកសារប្រវត្តិសាស្ត្រពីបារាំង។ នេះបើតាមការចុះផ្សាយរបស់សារព័ត៌មាន The Nation Thailand៕
