អគ្គនាយកដ្ឋានអន្តោប្រវេសន៍បណ្ដេញចេញជនបរទេសចំនួន ១,០៨៩នាក់ចេញពីប្រទេសកម្ពុជា ពាក់ព័ន្ធករណីឆបោកនិងលេងល្បែងតាមអនឡាញ លួចឆ្លងដែន ស្នាក់នៅគ្មានលិខិតស្នាម និងធ្វើការងារខុសច្បាប់។
អគ្គនាយកដ្ឋានអន្តោប្រវេសន៍ថ្លែងនៅថ្ងៃទី១៧ ខែកុម្ភៈនេះថា រយៈពេល៣ថ្ងៃចាប់ពីថ្ងៃទី១៤ ដល់ថ្ងៃទី ១៦ ខែកុម្ភៈ ជនបរទេសសរុបចំនួន ១០៨៩នាក់ ក្នុងនោះមានស្រី ៥៧នាក់ ត្រូវបានបណ្តេញចេញពីប្រទេសកម្ពុជា តាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ និង តាមប៉ុស្តិ៍នគរបាលច្រកទ្វារអន្តរជាតិព្រែកចាក (សម្រាប់ជនជាតិវៀតណាម)។
ជនបរទេសដែលបានបណ្តេញចេញខាងលើនេះ មាន ចំនួន១៤សញ្ជាតិ រួមមាន ចិន អ៊ុយហ្គង់ដា ម៉ាឡេស៊ី ឥណ្ឌូនេស៊ី ប៉ាគីស្ថាន កូរ៉េ វៀតណាម ចិនតៃវ៉ាន់ ហ្វីលីពីន នីហ្សេរីយ៉ា ឥណ្ឌា បង់ក្លាដេស កេនយ៉ា និងនេប៉ាល់។
អគ្គនាយកដ្ឋានអន្តោប្រវេសន៍ថ្លែងថា ការបណ្ដេញចេញនេះ គឺជាការអនុវត្តតាមវិធានការច្បាប់យ៉ាងម៉ឺងម៉ាត់របស់រាជរដ្ឋាភិបាលកម្ពុជា ក្នុងកិច្ចខិតខំប្រឹងប្រែងបោសសំអាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ធានាការពារ សុវត្ថិភាពជូនប្រជាពលរដ្ឋទាំងក្នុងតំបន់ និងសកលលោក។
ការបង្ក្រាបបទល្មើសឆបោកនេះ ធ្វើឡើងដោយគ្មានការលើកលែងនោះឡើយ ចំពោះមេខ្លោងដែលនៅពីក្រោយ។ បន្ថែពីលើនេះ ការបង្ក្រាបនេះក៏ជួយសង្គ្រោះជនរងគ្រោះ ដែលត្រូវមេខ្លោងបោកបញ្ឆោត ឱ្យមកធ្វើការក្នុងសកម្មភាពឆបោកតា ប្រព័ន្ធបច្ចេកវិទ្យា ឲ្យមានសេរីភាព និងអាចវិលត្រឡប់ទៅប្រទេសរបស់ខ្លួនវិញ។ បើតាមអគ្គនាយកដ្ឋានអន្តោប្រវេសន៍៕
