អនុរដ្ឋមន្ត្រីការពារជាតិឡាវថ្លែងថា ប្រទេសជិតខាងកម្ពុជាមួយនេះនឹងខិតខំប្រឹងប្រែងពូនជ្រុំទំនាក់ទំនងរវាងកងទ័ពប្រទេសទាំងពីរឱ្យកាន់តែរីកចម្រើន ហើយថាប្រទេសទាំងពីរនឹងសហការគ្នារក្សាព្រំដែនសន្តិភាពនិងសុវត្ថិភាព។
លោក សាយចៃ គុមម៉ាស៊ីត (Saichay Kommasith) អនុរដ្ឋមន្ដ្រីក្រសួងការពារប្រទេសនិងជាប្រធានអគ្គសេនាធិការកងទ័ពប្រជាជនឡាវ បានចូលជួបសម្ដែងការគួរសម និងពិភាក្សាជាមួយលោក ហ៊ុន សែន ប្រធានព្រឹទ្ធសភាកម្ពុជា នៅថ្ងៃទី១៧ ខែកុម្ភៈនេះ ដោយលោកបានលើកឡើងពីកិច្ចសហប្រតិបត្តិការល្អក្នុងរង្វង់កងទ័ពនៃប្រទេសទាំង។
លោក ជា ធីរិទ្ធ អ្នកនាំពាក្យព្រឹទ្ធសភា បានថ្លែងនៅក្រោយជំនួបនេះថា លោក ហ៊ុន សែន បានចាត់ទុកដំណើរទស្សនកិច្ចរបស់លោក សាយចៃ គុមម៉ាស៊ីត មកកាន់កម្ពុជាក្នុងឱកាសនេះថា «ជាចលករដ៏សំខាន់ក្នុងការជំរុញទំនាក់ទំនងទ្វេភាគីរវាងកម្ពុជានិងឡាវ ឱ្យកាន់តែរីកចម្រើនបន្ថែម ជាពិសេសធ្វើឲ្យទំនាក់ទំនងកិច្ចសហប្រតិបត្តិការរវាងកងទ័ពនៃប្រទេសទាំងពីរកាន់តែស៊ីជម្រៅ»។
លោក សាយចៃ គុមម៉ាស៊ីត បានថ្លែងថា ឡាវនិងកម្ពុជាមានទំនាក់ទំនងល្អជាមួយគ្នាង រួមមានទាំងទំនាក់ទំនងក្នុងវិស័យយោធា និងកងទ័ពផងដែរ ហើយលោកប្ដេជ្ញាថា នឹងខិតខំប្រឹងប្រែងពូនជ្រុំនៃទំនាក់ទំនងរវាងកងទ័ពប្រទេសទាំងពីរឱ្យកាន់តែរីកចម្រើនបន្តទៀត។
លោកបន្តថា កម្ពុជានិងឡាវ មានព្រំដែនសន្តិភាព និងសុវត្ថិភាព តាមរយៈការសហការរវាងប្រទេសទាំងពីរ ក៏ដូចជាកងទ័ព អាជ្ញាធរ នៃប្រទេសទាំងពីរផងដែរ។ នេះបើតាកលោក ជា ធីរិទ្ធ។
ក្នុងពេលបំពេញបេសកកម្មមកកម្ពុជានេះ លោក សាយចៃ គុមម៉ាស៊ីត បានជួបពិភាក្សាជាមួយនឹងអគ្គមេបញ្ជាការកងយោធពលខេមរភូមិន្ទកម្ពុជា រដ្ឋមន្ត្រីការពារជាតិកម្ពុជា ដើម្បីពិភាក្សាពីការដាក់ចេញនូវផែនការពង្រីកនូវទំនាក់ទំនងទ្វេភាគី ក្នុងក្របខ័ណ្ឌកងទ័ពកម្ពុជានិងកងទ័ពប្រជាជនឡាវ។
លោក ហ៊ុន សែន ជំរុញឲ្យពង្រឹងកិច្ចសហការក្នុងវិស័យការពារជាតិនិងកងទ័ព កម្ពុជានិងឡាវ ពង្រីកការចែករំលែកបទពិសោធន៍គ្នាក្នុងការបណ្ដុះបណ្ដាលធនធានមនុស្សរវាងគ្នាទៅវិញទៅមកឱ្យកាន់តែផុលផុស និងមានចំនួនច្រើនជាងមុន។
លោក ហ៊ុន សែន ជំរុញឲ្យអាជ្ញាធរ និងកងទ័ពនៃប្រទេសទាំងពីរធ្វើការជាមួយគ្នាបន្ថែមទៀតដើម្បីរក្សានូវសន្តិភាព និងសន្តិសុខតាមព្រំដែននេះឱ្យបានកាន់តែល្អប្រសើរ និងរួមគ្នាប្រយុទ្ធប្រឆាំងឧក្រិដ្ឋកម្មឆ្លងដែន គ្រប់គ្រងគ្រោះមហន្តរាយ ដូចជា ទឹកជំនន់ ភ្លើងឆេះ៕
