ទោះបីវិស័យអាកាសចរណ៍ស៊ីវិលនៅកម្ពុជាក្នុងឆ្នាំ២០២៥ បានជួបនឹងបញ្ហាប្រឈមជាច្រើនក៏ដោយ ក៏ការប្រមូលចំណូលចូលរដ្ឋមិនបានធ្លាក់ចុះឡើយ ដោយសម្រេចបានក្នុងទឹកប្រាក់ជាង ៥០ លានដុល្លារ កើនឡើងតិចតួចបើធៀបនឹងឆ្នាំ២០២៤។
របាយការណ៍បូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋលេខាធិការដ្ឋានអាកាសចរណ៍ស៊ីវិល នាថ្ងៃទី២៧ ខែកុម្ភៈ បានបង្ហាញថា ក្នុងឆ្នាំ២០២៥ រដ្ឋលេខាធិការដ្ឋានអាកាសចរណ៍ស៊ីវិល ប្រមូលចំណូលចូលរដ្ឋបានសរុប ៥១,២៦ លានដុល្លារ ឬស្មើនឹង ១០១,៣២% បើធៀបនឹងច្បាប់ហិរញ្ញវត្ថុឆ្នាំ២០២៤។ កំណើននេះបញ្ជាក់ពីប្រសិទ្ធភាពនៃការកៀងគរចំណូលថវិការដ្ឋ ក៏ដូចជាការដាក់វិធានការដ៏មានប្រសិទ្ធភាពផងដែរ។
របាយការណ៍បានឱ្យដឹងទៀតថា ក្នុងឆ្នាំ២០២៥ វិស័យអាកាសចរណ៍ស៊ីវិលកម្ពុជាបានចូលរួមចំណែកផ្តល់ការងារដោយផ្ទាល់ចំនួន ៤ ៤៧១ នាក់, ការងារជំនាញផ្នែកបច្ចេកទេសអាកាសចរណ៍ស៊ីវិល ១ ៨៨០នាក់, ការងារជាអ្នកបើកអាកាសយាន(Pilots) ១៣៥ នាក់ និងបាននាំមកប្រាក់ចំណូលប្រតិបត្តិការអាជីវកម្មដោយផ្ទាល់ជិត ៦០០លានដុល្លារ។ ក្នុងឆ្នាំ២០២៥ រដ្ឋលេខាធិការដ្ឋានអាកាសចរណ៍ស៊ីវិលបានចុះបញ្ជីអាកាសយាននៅកម្ពុជាចំនួន ៣២គ្រឿង។
ក្នុងឆ្នាំ២០២៥ ភ្ញៀវធ្វើដំណើរតាមផ្លូវអាកាសមានចំនួន ៦,៩៩ លាននាក់ កើនឡើង ១២% និងទំនិញដឹកជញ្ជូនតាមផ្លូវអាកាស ៩៣ ៨៨៩តោន កើន ២១%។ គិតមកដល់ពេលនេះកម្ពុជាមានក្រុមហ៊ុនអាកាសចរណ៍ចំនួន ៣៦ កំពុងធ្វើប្រតិបត្តិការ ដោយក្រុមហ៊ុនជាតិចំនួន ៤ និងក្រុមហ៊ុនអន្តរជាតិ ៣២។ ការហោះហើររបស់កម្ពុជាត្រូវបានតភ្ជាប់ទៅកាន់ ១៨ ប្រទេស និង ៤៦ទីក្រុង។ នេះបើយោងតាម SSCA។
រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល លោក ម៉ៅ ហាវណ្ណាល់ បាននិយាយថា វិស័យអាកាសចរណ៍ស៊ីវិល នៅតែបន្តទទួលផលប្រយោជន៍នៃកេរ្តិ៍ដំណែល និងទស្សនវិស័យវែងឆ្ងាយរបស់អតីតលោកនាយករដ្ឋមន្ត្រី ហ៊ុន សែន ដែលបានដាក់ឱ្យអនុវត្តនូវគោលនយោបាយបើកចំហជើងមេឃនៅក្នុងឆ្នាំ១៩៩៩។ លោកបន្តថា វិស័យអាកាសចរណ៍ស៊ីវិលកម្ពុជាកំពុងដើរតួនាទីយ៉ាងសំខាន់លើការងារដឹកជញ្ជូនអ្នកដំណើរ និងទំនិញតាមផ្លូវអាកាសជាតិ និងអន្តរជាតិក្នុងការចូលរួមចំណែកដល់វិស័យទេសចរណ៍ ពាណិជ្ជកម្ម វិនិយោគ ការតភ្ជាប់ធ្វើដំណើររបស់ប្រជាជន និងការផ្លាស់ប្តូរវប្បធម៌។
លោកបន្ថែមថា ក្នុងឆ្នាំ២០២៥ រដ្ឋលេខាធិការដ្ឋានអាកាសចរណ៍ស៊ីវិល បានជួយគាំទ្រ និងសម្រួលនីតិវិធីដោយជោគជ័យលើការអនុញ្ញាតការហោះហើរជូនក្រុមហ៊ុនអាកាសចរណ៍ Turkish Airlines ពីទីក្រុងអ៊ីស្តង់ប៊ុលមកកាន់រាជធានីភ្នំពេញ, ក្រុមហ៊ុនអាកាសចរណ៍ Etihad Airways ពីទីក្រុងអាប៊ូដាប៊ី មកកាន់រាជធានីភ្នំពេញ, ក្រុមហ៊ុនអាកាសចរណ៍ Emirates Airlines ពីទីក្រុងឌូបៃ មកកាន់ខេត្តសៀមរាប, ក្រុមហ៊ុនអាកាសចរណ៍ Firefly ពីទីក្រុងគូឡាឡំាពួ ប្រទេសម៉ាឡេស៊ី មកកាន់ខេត្តសៀមរាប, និងក្រុមហ៊ុនអាកាសចរណ៍ IndiGo របស់ប្រទេសឥណ្ឌា ពីទីក្រុងកាល់គូតា មកកាន់ខេត្តសៀមរាប។
លោកបានថ្លែងថា៖«ដើម្បីជំរុញការតភ្ជាប់ការហោះហើរមកកាន់ប្រទេសកម្ពុជាឱ្យកាន់តែច្រើនឡើងថែមទៀតទាំងចំនួនជើងហោះហើរ និងបើកផ្លូវហោះហើរថ្មី ការចរចាកិច្ចព្រមព្រៀងសេវាកម្មដឹកជញ្ជូនតាមផ្លូវអាកាសទ្វេភាគីជាមួយ ៦ ប្រទេស រួមមាន ចក្រភពអង់គ្លេស អារ៉ាប៊ីសាអូឌីត សហរដ្ឋអាមេរិក ប៉ាគីស្ថាន បង់ក្លាដេស និងអាហ្សង់ទីន បាននិងកំពុងអនុវត្ត ដែលនឹងអាចឈានទៅកាន់ការចុះហត្ថលេខាកិច្ចព្រមព្រៀងនាពេលខាងមុខ»។
លោកបានបន្ថែមថា៖«សម្រាប់ឆ្នាំ២០២៦ នេះវិស័យអាកាសចរណ៍ស៊ីវិលកម្ពុជា រំពឹងនឹងទទួលបានអ្នកដំណើរតាមផ្លូវអាកាសចំនួន ៨ លាននាក់ ទំនិញដឹកជញ្ជូនតាមផ្លូវអាកាស ១១២ ពាន់តោន និងជើងហោះហើរចេញ-ចូលជាង ៧២ ពាន់ជើង ដោយសារមានតម្រូវការផ្នែកពាណិជ្ជកម្ម ទេសចរណ៍ និងការដោះដូរវប្បធម៌»៕
