ខេត្ដបន្ទាយមានជ័យ៖ រដ្ឋមន្ត្រីក្រសួងសុខាភិបាល បានលើកសរសើរយ៉ាងខ្ពង់ខ្ពស់ចំពោះការលះបង់ និងវីរភាពរបស់មន្ត្រី និងបុគ្គលិកសុខាភិបាល នៅមន្ទីរពេទ្យបង្អែកប៉ោយប៉ែត ដែលបានបន្តបម្រើសេវាសង្គ្រោះជីវិតប្រជាពលរដ្ឋ ជនភៀសសឹក និងកងកម្លាំងប្រដាប់អាវុធ អំឡុងពេលមានភាពតានតឹង និងការវាយប្រហារប្រដាប់អាវុធនៅតំបន់ព្រំដែន។
ក្នុងឱកាសចុះពិនិត្យ និងសួរសុខទុក្ខនៅរសៀលថ្ងៃអាទិត្យ ទី១ ខែកុម្ភៈ ឆ្នាំ២០២៦ លោក ឈាង រ៉ា បានថ្លែងថា៖ «គ្រប់សកម្មភាពវិជ្ជមានរបស់បងប្អូន គឺជាការការពារសង្គ្រោះជីវិត ដែលមើលឃើញដោយជាតិកម្ពុជា»។
ក្នុងឱកាសដូចគ្នានេះ រដ្ឋមន្ត្រី និងថ្នាក់ដឹកនាំក្រសួងសុខាភិបាល បាននាំយកកញ្ចប់សម្ភារបរិក្ខារពេទ្យ ជាអំណោយរបស់អង្គការសុខភាពពិភពលោក (WHO) និងមូលនិធិសហប្រជាជាតិសម្រាប់ប្រជាជន (UNFPA) ប្រចាំកម្ពុជា តាមរយៈក្រសួងសុខាភិបាល ប្រគល់ជូនមន្ទីរសុខាភិបាលខេត្តបន្ទាយមានជ័យ ដើម្បីគាំទ្រការសង្គ្រោះប្រជាពលរដ្ឋនៅតាមខេត្តជាប់ព្រំដែន និងជួយដល់ស្ត្រីរងគ្រោះ មាតា និងទារកទើបនឹងកើត។
រដ្ឋមន្ត្រីបានថ្លែងអំណរគុណដល់ថ្នាក់ដឹកនាំ និងមន្ត្រីសុខាភិបាលគ្រប់លំដាប់ថ្នាក់ ដែលបានបម្រើសេវាសុខភាពជូនប្រជាពលរដ្ឋ ជនភៀសសឹក និងវីរកងទ័ព ប្រកបដោយស្មារតីទទួលខុសត្រូវខ្ពស់ និងក្រមសីលធម៌វិជ្ជាជីវៈ ក្នុងអំឡុងពេលមានជម្លោះព្រំដែនកម្ពុជា–ថៃ។
លោករដ្ឋមន្ដ្រីសុខាភិបាលបានចាត់ទុកការងាររបស់បុគ្គលិកសុខាភិបាលថាជា «វីរភាពកងទ័ពអាវស» មិនខុសពីកងកម្លាំងនៅមុខសមរភូមិ។
រដ្ឋមន្ត្រីក្រសួងសុខាភិបាល បានលើកសរសើរយ៉ាងខ្ពង់ខ្ពស់ចំពោះការលះបង់ និងវីរភាពរបស់មន្ត្រី និងបុគ្គលិកសុខាភិបាល នៅមន្ទីរពេទ្យបង្អែកប៉ោយប៉ែត ដែលបានបន្តបម្រើសេវាសង្គ្រោះជីវិតប្រជាពលរដ្ឋ ជនភៀសសឹក និងកងកម្លាំងប្រដាប់អាវុធ។ រូបថត សហការី
លោក ឈាង រ៉ា បានសង្កត់ធ្ងន់ថា បុគ្គលិកសុខាភិបាលនៅប៉ោយប៉ែត បានបំពេញភារកិច្ចក្រោមស្ថានភាពគ្រោះថ្នាក់ ដោយមិនរើសអើង និងមិនឱ្យប្រជាពលរដ្ឋណាម្នាក់ខកខានការថែទាំព្យាបាល ទោះបីជាកំពុងប្រឈមនឹងការវាយប្រហារប្រដាប់អាវុធពីកងទ័ពថៃក៏ដោយ។
លោកបានថ្លែងថា៖ «នេះគឺជាវីរភាពកងទ័ពអាវសពិតប្រាកដ ដែលបានលះបង់សុវត្ថិភាពផ្ទាល់ខ្លួន ដើម្បីជាតិ និងប្រជាជន»។
ក្រៅពីការកោតសរសើរ លោករដ្ឋមន្ត្រីក៏បានណែនាំឱ្យមន្ត្រីសុខាភិបាលបន្តពង្រឹងសមត្ថភាព តាមរយៈការបណ្តុះបណ្តាលបន្តលើជំនាញបច្ចេកទេស និងភាពជាអ្នកដឹកនាំ ដើម្បីធ្វើឲ្យមន្ទីរពេទ្យបង្អែកប៉ោយប៉ែត ក្លាយជាគ្រឹះស្ថានសុខាភិបាលគំរូ សម្រាប់ការឆ្លើយតបនឹងវិបត្តិ និងស្ថានភាពអាសន្ននាពេលអនាគត។
លោកបានបញ្ជាក់ថា ក្រសួងសុខាភិបាល និងសហភាតរសុខាភិបាលទូទាំងប្រទេស នឹងនៅជាមួយបុគ្គលិកនៅតំបន់ព្រំដែនជានិច្ច ទាំងក្នុងពេលធម្មតា និងពេលប្រឈមវិបត្តិជាតិ។
ក្នុងដំណើរបេសកកម្មរយៈពេលពីរថ្ងៃ នៅថ្ងៃទី៣១ ខែមករា និងថ្ងៃទី១ ខែកុម្ភៈ ប្រតិភូក្រសួងសុខាភិបាល បានចុះពិនិត្យ និងតាមដានការបើកដំណើរការឡើងវិញនៃមូលដ្ឋានសុខាភិបាល ដែលធ្លាប់ផ្អាកអំឡុងពេលមានបញ្ហាព្រំដែន នៅខេត្តព្រះវិហារ ឧត្តរមានជ័យ និងបន្ទាយមានជ័យ ព្រមទាំងពិនិត្យការស្តារហេដ្ឋារចនាសម្ព័ន្ធ និងការពង្រឹងប្រព័ន្ធសុខាភិបាល ដោយមិនទុកឱ្យប្រជាពលរដ្ឋណាម្នាក់ មិនទទួលបានការថែទាំព្យាបាលនោះទេ៕
