ខេត្តបន្ទាយមានជ័យ៖ សហភាពអឺរ៉ុប និងយូនីសេហ្វ បានផ្តល់ជូនសម្ភារមនុស្សធម៌សង្គ្រោះបន្ទាន់លើសពី ៣០ តោន ដល់គ្រួសារដែលភៀសខ្លួនដោយសារវិបត្តិនៅតាមព្រំដែន ដើម្បីគាំទ្រដល់ប្រជាជនប្រមាណ ១៥,០០០ នាក់ ដែលភាគច្រើនជាស្ត្រី និងកុមារ នៅតាមបណ្តាខេត្តឧត្តរមានជ័យ បន្ទាយមានជ័យ សៀមរាប និងព្រះវិហារ។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក អ៊ីហ្កូ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និង លោកវេជ្ជបណ្ឌិត Anirban Chatterjee នាយករងយូនីសេហ្វប្រចាំកម្ពុជា បានចូលរួមក្នុងពិធីប្រគល់សម្ភារនៅជំរំភៀសសឹក វត្តកណ្តោល ខេត្តបន្ទាយមានជ័យ។
សម្ភារដែលបានផ្តល់ជូន រួមមាន តង់ និងកៅស៊ូតង់សម្រាប់ប្រើប្រាស់ជាកន្លែងសិក្សាបណ្តោះអាសន្ន និងទីកន្លែងកុមារមេត្រី ដើម្បីធានាថាកុមារអាចបន្តការសិក្សារបស់ពួកគេក្នុងបរិយាកាសមានសុវត្ថិភាព។
ការផ្តល់ជូននេះក៏រួមបញ្ចូលកញ្ចប់អនាម័យ អំពូលសូឡា សម្ភារសុខភាព អនាម័យ និងទឹកស្អាតសំខាន់ៗ ដើម្បីជួយឱ្យគ្រួសាររក្សាបាននូវសុខភាព និងសេចក្តីថ្លៃថ្នូរ ខណៈពេលស្នាក់នៅតាមទីតាំងបណ្តោះអាសន្ន។
លោក អ៊ីហ្កូ ទ្រីសម៉ាន់ បានថ្លែងថា៖ «ការផ្តល់ជូននេះបង្ហាញពីការប្តេជ្ញារបស់សហភាពអឺរ៉ុបក្នុងការការពារប្រជាជនងាយរងគ្រោះដែលរងផលប៉ះពាល់ដោយជម្លោះ និងការភៀសខ្លួន»។
លោកបានបន្ថែមថា ក្រៅពីសម្ភារជាក់ស្តែង ក៏មានការគាំទ្រផ្នែកសុខភាពផ្លូវចិត្តតាមរយៈអង្គការចិត្តសង្គមអន្តរវប្បធម៌ (TPO) ដើម្បីជួយដោះស្រាយផលប៉ះពាល់ផ្លូវចិត្តដែលកើតចេញពីជម្លោះប្រដាប់អាវុធលើប្រជាជនភៀសសឹក។
លោកបន្ដថា៖ «ថ្ងៃនេះ យើងមានមោទកភាពក្នុងការផ្តល់ជូនសម្ភារចាំបាច់តាមរយៈភាពជាដៃគូជាមួយយូនីសេហ្វប្រចាំកម្ពុជា… សហភាពអឺរ៉ុបប្តេជ្ញាគាំទ្រកម្ពុជា និងដៃគូក្នុងការការពារសុខុមាលភាព និងសេចក្តីថ្លៃថ្នូររបស់កុមារ និងគ្រួសារភៀសសឹកគ្រប់រូប»។
លោកវេជ្ជបណ្ឌិត Anirban Chatterjee បានថ្លែងអំណរគុណចំពោះសហភាពអឺរ៉ុប ដែលបានគាំទ្រដល់កុមារ និងគ្រួសារជនភៀសសឹកក្នុងអំឡុងពេលមានវិបត្តិនេះ ដោយធានាឱ្យពួកគេទទួលបានសេវាចាំបាច់ និងឱកាសក្នុងការកសាងអនាគតឡើងវិញ។
លោកបានលើកឡើងថា៖ «ការគាំទ្រនេះនឹងជួយធានាថាកុមារតូចៗនៅតែអាចបន្តការរៀនសូត្រ គ្រួសារមានទឹកស្អាត និងអនាម័យប្រើប្រាស់ ហើយសហគមន៍អាចរក្សាបាននូវសុខភាព និងសេចក្តីថ្លៃថ្នូរ ខណៈពេលកំពុងឆ្លងកាត់ដំណាក់កាលដ៏លំបាកនេះ»។
តម្រូវការមនុស្សធម៌បានកើនឡើងក្នុងខែចុងក្រោយៗ ខណៈប្រជាពលរដ្ឋរាប់ពាន់នាក់បានភៀសខ្លួនចេញពីតំបន់ព្រំដែនដើម្បីស្វែងរកសុវត្ថិភាព បង្កើនសម្ពាធលើទីជំរំបណ្តោះអាសន្ន និងអាជ្ញាធរមូលដ្ឋាន។
អង្គការមនុស្សធម៌បានព្រមានថា បើគ្មានការគាំទ្របន្ត កុមារភៀសសឹកអាចប្រឈមនឹងហានិភ័យខ្ពស់ក្នុងការរំខានការសិក្សា បញ្ហាអនាម័យ និងផលប៉ះពាល់ផ្លូវចិត្តរយៈពេលវែង។
ជំនួយរបស់សហភាពអឺរ៉ុបត្រូវបានអនុវត្តតាមរយៈ ReliefEU Capacities ដែលជាផ្នែកមួយនៃប្រតិបត្តិការជំនួយមនុស្សធម៌របស់គណៈកម្មការអឺរ៉ុប ដើម្បីផ្តល់ការគាំទ្របន្ទាន់លើការដឹកជញ្ជូន ភស្តុភារ និងការផ្គត់ផ្គង់ នៅពេលប្រព័ន្ធមនុស្សធម៌ប្រឈមនឹងសម្ពាធខ្ពស់។
សហភាពអឺរ៉ុប និងយូនីសេហ្វ បានបញ្ជាក់ថា ពួកគេនឹងបន្តសហការជាមួយអាជ្ញាធរកម្ពុជា និងដៃគូពាក់ព័ន្ធ ដើម្បីធានាថាគ្រួសារភៀសសឹកទទួលបានការការពារ និងសេវាចាំបាច់ ព្រមទាំងគាំទ្រកិច្ចខិតខំប្រឹងប្រែងត្រៀមបង្ការ និងស្តារឡើងវិញសម្រាប់សហគមន៍ដែលរងផលប៉ះពាល់។
ការផ្តល់ជំនួយចុងក្រោយនេះ បង្ហាញពីទំហំតម្រូវការមនុស្សធម៌ដែលកើតឡើងពីវិបត្តិនៅតាមព្រំដែន និងការពឹងផ្អែកកាន់តែច្រើនលើការគាំទ្រអន្តរជាតិ ដើម្បីការពារប្រជាជនងាយរងគ្រោះ ជាពិសេសកុមារ ពីផលប៉ះពាល់យូរអង្វែងនៃវិបត្តិនេះ៕
