កម្ពុជានឹងចូលរួម«ពិព័រណ៍ចិន-អាស៊ាន លើកទី២៣ (The 23rd China-ASEAN Expo)» ដែលរៀបចំដោយគណៈកម្មការរៀបចំពិព័រណ៍ចិន-អាស៊ាន នាខែកញ្ញា ខាងមុខ នៅទីក្រុងណាននឹង តំបន់ស្វយ័តក្វាងស៊ី ប្រទេសចិន។ កម្ពុជាមិនដែលខកខានឡើយក្នុងព្រឹត្តិការណ៍នេះនាពេលកន្លងមក។
សេចក្តីប្រកាសព័ត៌មានក្រសួងពាណិជ្ជកម្ម នាព្រឹកថ្ងៃទី៨ ខែកុម្ភៈ នេះឱ្យដឹងថា ក្នុងនាមគណៈកម្មការអន្តរក្រសួងដើម្បីរៀបចំ និងចូលរួមពិព័រណ៍ពិភពលោក និងពិព័រណ៍ពាណិជ្ជកម្មអន្តរជាតិ ក្រសួងពាណិជ្ជកម្មសូមជម្រាបថា ដោយទទួលបានជោគជ័យជាបន្តបន្ទាប់ក្នុងការរៀបចំ និងចូលរួមពិព័រណ៍ចិន-អាស៊ាន ចំនួន ២២លើកកន្លងមក ក្រសួងពាណិជ្ជកម្មនឹងបន្តចូលរួមរៀបចំ«ពិព័រណ៍ចិន-អាស៊ាន លើកទី២៣» ដែលរៀបចំដោយគណៈកម្មការរៀបចំពិព័រណ៍ចិន-អាស៊ាន ចន្លោះពីថ្ងៃទី១៧-២១ ខែកញ្ញា ឆ្នាំ២០២៦ នៅមជ្ឈមណ្ឌលសន្និបាតនិងពិព័រណ៍អន្តរជាតិទីក្រុងណាននឹង តំបន់ស្វយ័តក្វាងស៊ី ប្រទេសចិន។
ពិព័រណ៍ចិន-អាស៊ាន គឺជាវេទិកានៃការផ្លាស់ប្តូរពាណិជ្ជកម្ម និងវិនិយោគដ៏សំខាន់រវាងបណ្តាប្រទេសជាសមាជិកអាស៊ាន និងសាធារណរដ្ឋប្រជាមានិតចិន។ នេះបើតាមក្រសួងពាណិជ្ជកម្ម។
ក្រសួងបញ្ជាក់ថា៖«ដើម្បីបន្តជំរុញសកម្មភាពពាណិជ្ជកម្ម និងវិនិយោគរវាងកម្ពុជា និងចិនឱ្យដល់គោលដៅដែលរដ្ឋាភិបាលនៃប្រទេសទាំងពីរបានកំណត់ ក្រសួងពាណិជ្ជកម្មក្នុងនាមដៃគូសហការរៀបចំ សូមអញ្ជើញធុរជន សហគ្រិន វិនិយោគិន ផលិតករកម្ពុជា និងសាធារណជនទូទៅដែលមានបំណងចូលរួមតាំងបង្ហាញ/លក់ផលិតផល/សេវាកម្ម និងចាប់ដៃគូពាណិជ្ជកម្មជាមួយពាណិជ្ជករចិន និងអាស៊ាន សូមរៀបចំដាក់ពាក្យចូលរួមពិព័រណ៍ខាងលើ និងព្រឹត្តិការណ៍អមផ្សេងៗ»។
យោងតាមសេចក្តីជូនដំណឹង គឺម្ចាស់ក្រុមហ៊ុន/សហគ្រាស និងធុរជន ដែលមានបំណងចូលរួមត្រូវធ្វើទំនាក់ទំនងមកក្រសួងពាណិជ្ជកម្មឱ្យបានមុនដំណាច់ខែមិថុនា ឆ្នាំ២០២៦។
ភាពល្អប្រសើរនៃទំនាក់ទំនងការទូតរវាងរដ្ឋាភិបាលកម្ពុជា-ចិន បានធ្វើឱ្យទំហំពាណិជ្ជកម្ម ទេសចរណ៍ និងការវិនិយោគរវាងប្រទេសទាំង ២ កើនឡើងជាបន្តបន្ទាប់ ជាពិសេសរយៈពេលជាង ១ ទសវត្សចុងក្រោយនេះ។
ទិន្នន័យអគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងឆ្នាំ២០២៥ ការផ្លាស់ប្តូរទំនិញរវាងកម្ពុជា-ចិន មានទឹកប្រាក់សរុប ១៩,៧៣ ពាន់លានដុល្លារ កើន ២៩,៩% បើធៀបឆ្នាំ២០២៤។ ក្នុងចំនួននេះ គឺការនាំចេញរបស់កម្ពុជា មានចំនួន ១,៦៩ ពាន់លានដុល្លារ ធ្លាក់ចុះ ៣,៦% ចំណែកទំនិញចិននាំចូល ១៨,០៤ ពាន់លានដុល្លារ កើនឡើង ៣៤,៣%។។ ប្រទេសចិន គឺជាដៃគូពាណិជ្ជកម្មធំជាងគេទី១ របស់កម្ពុជា។
ក្រៅពីពាណិជ្ជកម្មទំនិញ វិនិយោគិនចិនក៏កំពុងបណ្តាក់ទុនច្រើនជាងគេផងដែរនៅកម្ពុជា ដោយក្នុងចំណោមទុនវិនិយោគសរុបទាំង ១០ ពាន់លានដុល្លារដែលក្រុមប្រឹក្សាអភិវឌ្ឍន៍កម្ពុជា(CDC) អនុម័តឱ្យវិនិយោគនៅកម្ពុជាកាលពីឆ្នាំ២០២៥ គឺមានប្រមាណ ៥៤,២៥% មកពីប្រទេសចិន។ សម្រាប់វិស័យទេសចរណ៍ គឺជនជាតិចិនដែលធ្វើដំណើរមកកម្ពុជាក្នុងឆ្នាំ២០២៥ មានប្រមាណ ១,២ លាននាក់ កើន ៤១,៥%៕
