លោកនាយករដ្ឋមន្ត្រី ហ៊ុន ម៉ាណែត ប្រកាសជាថ្មីថានឹង«វះកាត់ដោយគ្មានការលើកលែងចំពោះមន្ត្រីដែលជាប់ពាក់ព័ន្ធក្នុងបទល្មើសនានា ជាពិសេសបទល្មើសឆបោកតាមអនឡាញ ខណៈដែលលោកអំពាវនាវឲ្យពលរដ្ឋចូលរួម«បណ្ដេញរាល់អំពើ អាក្រក់ចេញពីប្រទេសឱ្យអស់»ពីកម្ពុជា។
លោក ហ៊ុន ម៉ាណែត ថ្លែងដូច្នេះក្នុងពិធីបូកសរុបការងារប្រចាំឆ្នាំ២០២៥ និងលើកទិសដៅឆ្នាំ២០២៦ របស់ក្រសួងមហាផ្ទៃ នៅថ្ងៃទី៥ ខែកុម្ភៈ កន្លងទៅ។ នេះបើយោងតាមក្រសួងមហាផ្ទៃ។
សេចក្ដីប្រកាសព័ត៌មានរបស់ក្រសួងមហាផ្ទៃ ថ្លែងថា លោក ហ៊ុន ម៉ាណែត បានសង្កត់ធ្ងន់ពីភាពចាំបាច់នៃការបង្ក្រាបឱ្យបានម៉ឺងម៉ាត់ រាល់បទល្មើសប្រឈមក្នុងសង្គម រួមមាន បទល្មើសឆបោកតាមប្រព័ន្ធបច្ចេកវិទ្យា បទល្មើសចរាចរណ៍ គ្រឿងញៀន ក្មេងទំនើង និងអំពើជួញដូរមនុស្សជាដើម។
ក្រសួងមហាផ្ទៃស្រង់សម្ដីលោក ហ៊ុន ម៉ាណែត ដែលថ្លែងថា៖ «យើងត្រូវតែរួមគ្នាប្តេជ្ញាចិត្តសម្អាតផ្ទះយើង ដោយបណ្ដេញរាល់អំពើ អាក្រក់ចេញពីប្រទេសឱ្យអស់ ដើម្បីនាំមកវិញនូវអ្វីដែលល្អៗសម្រាប់ជាតិ និងប្រជាជនយើង»។
ក្រសួងបន្តថា៖ «ក្នុងន័យនេះ សម្តេចប្រមុខរាជរដ្ឋាភិបាល បានអំពាវនាវប្រជាពលរដ្ឋគ្រប់មជ្ឈដ្ឋានចូលរួម និងគាំទ្របេសកកម្មនេះ និងបានព្រមានអនុវត្តមរតក អភិក្រមវះកាត់ ដោយគ្មានការលើកលែង ចំពោះមន្ត្រីដែលជាប់ពាក់ព័ន្ធបទល្មើសក្នុងសង្គម ជាពិសេសបទល្មើស ឆបោកតាមប្រព័ន្ធបច្ចេកវិទ្យា»។
បទល្មើសព្រហ្មទណ្ឌគ្រប់ប្រភេទនៅឆ្នាំ ២០២៥ បានថយចុះ ១៧ភាគរយ ធៀបឆ្នាំ២០២៤ ដោយការបង្ក្រាបទទួលលទ្ធផល ៩៦% ពិសេសបទល្មើសគ្រឿងញៀនខុសច្បាប់ អំពើជួញដូរមនុស្ស ជួញដូរពលកម្ម អាជីវកម្មផ្លូវភេទ អំពើឆបោកតាមប្រព័ន្ធបច្ចេកវិទ្យា ល្បែងស៊ីសងខុសច្បាប់គ្រប់ប្រភេទ និង ក្រុមក្មេងទំនើង។ នេះបើតាមក្រសួងមហាផ្ទៃ។
ក្រសួងបន្តថា ស្ថានប័ននេះក៏កំពុងស្រាវជ្រាវ ស៊ើបអង្កេត និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា ដោយចាប់ខ្លួនមេក្លោង និងបញ្ជូនជនបរទេសប្រព្រឹត្តបទល្មើសទៅប្រទេសកំណើតវិញ ដោយមានកិច្ចសហការ ជាមួយសមត្ថកិច្ច នៃប្រទេសពាក់ព័ន្ធយ៉ាងសកម្ម និងប្រកបដោយការទទួលខុសត្រូវខ្ពស់៕
