លោករដ្ឋមន្ត្រីការបរទេស ប្រាក់ សុខុន បានប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិថា ការប្រយុទ្ធប្រឆាំងនឹងការឆបោកមិនគួរត្រូវបានគេយកមកប្រើប្រាស់ជាលេសដើម្បីធ្វើសកម្មភាពឈ្លានពាន និងការកាន់កាប់ទឹកដី នោះទេ ដែលការថ្លែងដូច្នេះសំដៅទៅលើលេសពីដំបូងរបស់ថៃ ក្នុងការ វាយប្រហារឈ្លានពានដោយយោធាមកលើកម្ពុជា ដែលពួកគេបានអះអាងថាជា «សង្គ្រាមប្រឆាំងនឹងកងទ័ពឆបោក»។
ថ្លែងទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ប្រទេសស្វីស កាលពីថ្ងៃទី២៤ ខែកុម្ភៈ លោក ប្រាក់ សុខុន បានលើកឡើងថា កម្ពុជាកំពុងបង្កើនសកម្មភាពដើម្បីប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេសការបោកប្រាស់តាមអនឡាញ និងការជួញដូរមនុស្ស។
លោកថា៖ «ការបោកប្រាស់តាមអនឡាញគឺជាបញ្ហាសកល ដែលប៉ះពាល់ដល់ប្រជាជនហួសពីព្រំដែននៃប្រទេសរបស់ពួកគេ។ ក្រុមការងារថ្នាក់ជាតិមួយដែលត្រូវបានបង្កើតឡើងដោយនាយករដ្ឋមន្ត្រីរបស់យើង និងអាជ្ញាធរពាក់ព័ន្ធ បានបង្ក្រាបបណ្តាញជាច្រើន សង្គ្រោះជនរងគ្រោះរាប់ពាន់នាក់ និងចាប់ខ្លួនឧក្រិដ្ឋជនរាប់មិនអស់»។
លោកក៏បានផ្តល់ព័ត៌មានបច្ចុប្បន្នភាពអំពីយន្តការផ្លូវច្បាប់ប្រឆាំងនឹងឧក្រិដ្ឋកម្មទាំងនេះផងដែរ ដោយកម្ពុជាកំពុងស្ថិតក្នុងដំណើរការបង្កើតច្បាប់ពិសេសមួយ ដើម្បីប្រយុទ្ធប្រឆាំងនឹងការបោកប្រាស់តាមអនឡាញ។ លោកចាត់ទុកថា នេះជាផ្នែកមួយនៃការប្តេជ្ញាចិត្តដ៏មុតមាំរបស់ព្រះរាជាណាចក្រកម្ពុជា ក្នុងការលុបបំបាត់ឧក្រិដ្ឋកម្មនេះ និងដោះស្រាយបញ្ហាប្រឈមបែបនេះ។
លោកបានបន្តថា៖ «កម្ពុជាបានអនុវត្តការប្តេជ្ញាចិត្តទាំងនៅកម្រិតជាតិ ទ្វេភាគី និងពហុភាគី។ នេះទាមទារឱ្យមានកិច្ចសហប្រតិបត្តិការ មិនមែនគ្រាន់តែជាសកម្មភាពប៉ូលិស និងយោធាប៉ុណ្ណោះទេ ដែលជួនកាលសកម្មភាពទាំងនោះអាចត្រូវបានគេប្រើប្រាស់ខុសដើម្បីបិទបាំងសកម្មភាពឈ្លានពាន និងការកាន់កាប់ទឹកដី»។
ក្នុងអំឡុងពេលនៃការប៉ះទង្គិចប្រដាប់អាវុធលើកទីពីរនៅក្នុងខែធ្នូ ថៃបានបើកការវាយប្រហារតាមអាកាសឈ្លានពានយ៉ាងធ្ងន់ធ្ងរមកលើកម្ពុជា ដែលចូលជ្រៅជាងមួយរយគីឡូម៉ែត្រក្នុងទឹកដីកម្ពុជា ដោយអះអាងរបស់ពួកគេបង្ក្រាបការឆបោក ដូចដែលពួកគេបាននិយាយថាជា «សង្គ្រាមប្រឆាំងនឹងកងទ័ពឆបោក»។ ប៉ុន្តែការវិភាគមួយដោយមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ (CSIS) បានមើលឃើញថា សកម្មភាពនោះគឺបម្រើដល់គោលដៅនយោបាយទៅវិញទេ។
នៅក្នុងរបាយការណ៍ខែមករា CSIS បាននិយាយថា យុទ្ធនាការប្រឆាំងការឆបោករបស់ថៃ គឺដើម្បីបង្វែរការរិះគន់អំពីការសមគំនិតរបស់មន្ត្រីខ្លួន ដូចជាករណីនាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) ថតរូបជាមួយលោក បេន ស្មីត (Ben Smith) ដែលរងការចោទប្រកាន់ថាជាមេឆបោកឆ្លងដែន ឬបង្វែរភាពអសកម្មប្រឆាំងនឹងបណ្តាញឆបោកនៅក្នុងប្រទេស។ ទាំងនេះគឺក្នុងគោលដៅចំណេញនយោបាយក្នុងស្រុក និងដើម្បីធ្វើឱ្យសកម្មភាពរបស់ខ្លួននៅក្រៅប្រទេសក្លាយជាស្របច្បាប់។
លោក Scott Schelble ឧបការីរងនៃអង្គភាពប្រតិបត្តិការអន្តរជាតិរបស់ FBI បានប្រាប់សន្និសីទសារព័ត៌មានកាលពីពេលថ្មីៗនេះថា លោកបានមកបំពេញទស្សនកិច្ចនៅកម្ពុជានៅដើមខែកុម្ភៈ ជាទីដែលលោកបានពិភាក្សាអំពីផលប្រយោជន៍រួម ក្នុងការប្រយុទ្ធប្រឆាំងនឹងប្រតិបត្តិការឆបោក។
លោកថា នាពេលកន្លងមក FBI បានធ្វើជាដៃគូជាមួយអគ្គស្នងការដ្ឋាននគរបាលជាតិកម្ពុជា នៅក្នុងក្របខ័ណ្ឌក្រុមការងារពិសេសមួយ ហើយក្តីសង្ឃឹមរបស់លោកគឺដើម្បីទាញយកអត្ថប្រយោជន៍ពីភាពជោគជ័យនៃការស៊ើបអង្កេតទាំងនោះ ឆ្ពោះទៅរកការបង្ក្រាបទីតាំងឆបោកទាំងនេះ។
ឆ្លើយតបទៅនឹងសំណួររបស់អ្នកសារព័ត៌មាន លោក Schelble បាននិយាយថា ការប្រយុទ្ធប្រឆាំងនឹងការឆបោកមិនមែនគ្រាន់តែផ្តោតលើទីតាំងរបស់ពួកគេនោះទេ។
លោកលើកឡើងថា៖ «ខ្ញុំសូមគូសបញ្ជាក់ថា ជាអកុសល វាមិនសាមញ្ញត្រឹមតែជាទីតាំងណាមួយនោះទេ។ នេះគឺជាបញ្ហាកម្រិតតំបន់យ៉ាងពិតប្រាកដ ដែលគ្មានប្រទេសណាមួយអាចប្រយុទ្ធប្រឆាំងតែឯងបានឡើយ។ នៅពេលយើងក្រឡេកមើលអាស៊ីអាគ្នេយ៍ នេះមិនមែនជាបញ្ហារបស់កម្ពុជាទេ នេះមិនមែនជា បញ្ហារបស់វៀតណាម ឬបញ្ហារបស់ថៃនោះទេ។ នេះគឺជាបញ្ហាតំបន់ ហើយវានឹងទាមទារនូវទិដ្ឋភាពនៃភាពជាដៃគូ និងការសម្របសម្រួល ប្រសិនបើយើងចង់ដោះស្រាយវាឱ្យបានត្រឹមត្រូវ។ ហើយនោះហើយជាមូលហេតុដែលភាពជាដៃគូគឺជាគន្លឹះសំខាន់»។
យោងតាមលោក Schelble បានឱ្យដឹងថា នៅក្នុងឆ្នាំ២០២៥ មជ្ឈមណ្ឌលទទួលពាក្យបណ្តឹងបទល្មើសអ៊ីនធឺណិតរបស់ FBI បានទទួលពាក្យបណ្តឹងជាង ៨០.០០០ករណី ដោយជនរងគ្រោះបាត់បង់ថវិកាលើសពី ២,៩ពាន់លានដុល្លារអាមេរិក។
លោកបានបន្ថែមថា៖ «ទីតាំងឆបោកមិនមែនមានតែនៅប្រទេសថៃនោះទេ ពួកវាមិនមែនមានតែនៅកម្ពុជា មិនមែនមានតែនៅវៀតណាម ឬម៉ាឡេស៊ីនោះទេ។ ទាំងនេះគឺជាបញ្ហាកម្រិតតំបន់ ហើយក្រុមឧក្រិដ្ឋជនទាំងនេះមិនត្រូវបានចងភ្ជាប់ដោយច្បាប់ ឬព្រំដែនភូមិសាស្ត្រឡើយ ហើយពួកគេធ្វើប្រតិបត្តិការដោយមាននិទ្ទណ្ឌភាពក្នុងកម្រិតមួយ ពីព្រោះពួកគេទាញយកផលប្រយោជន៍ពីច្បាប់រៀងៗខ្លួនរបស់ប្រទេសនីមួយៗ»៕
