លោកនាយករដ្ឋមន្ត្រី ហ៊ុន ម៉ាណែត ថ្លែងប្រាប់លោកស្រី Vladanka Andreeva អ្នកសម្របសម្រួលអង្គការសហប្រជាជាតិប្រចាំកម្ពុជា អំពីការវិវត្តថ្មីៗនៃស្ថានការណ៍តាមបណ្ដោយព្រំដែន កម្ពុជា-ថៃ ខណៈ UN ចង់ឃើញថៃ និងកម្ពុជា ដោះស្រាយជម្លោះដោយសន្តិវិធី។
ក្នុងជំនួបនៅថ្ងៃទី២ មីនានេះ លោក ហ៊ុន ម៉ាណែត ថ្លែងថា កម្ពុជាមានជំហរដោះស្រាយបញ្ហាព្រំដែនដោយសន្តិវិធី ផ្អែកលើច្បាប់អន្តរជាតិ អនុសញ្ញា សន្ធិសញ្ញា និងកិច្ចព្រមព្រៀងទ្វេភាគីដែលមានស្រាប់រវាងប្រទេសទាំងពីរ។
លោក ហ៊ុន ម៉ាណែត ទើបត្រឡប់ពីទស្សនកិច្ចនៅសហរដ្ឋអាមេរិកដើម្បីចូលរួមក្រុមប្រឹក្សាសន្តិភាព និងបានជួបជាមួយថ្នាក់ដឹកនាំនៃអង្គការសហប្រជាជាតិ រួមមានលោក António Guterres អគ្គលេខាធិការអង្គការសហប្រជាជាតិ, លោកស្រី Annalena Baerbock ប្រធានសម័យប្រជុំលើកទី៨០ នៃមហាសន្និបាតអង្គការសហប្រជាជាតិ និងលោក Volker Türk ឧត្តមស្នងការសហប្រជាជាតិទទួលបន្ទុកសិទ្ធិមនុស្ស។
ក្នុងជំនួបនេះ លោកស្រី Andreeva ក៏បានថ្លែងថា អង្គការសហប្រជាជាតិចង់ឃើញប្រទេសកម្ពុជា និង ថៃ ដោះស្រាយភាពខ្វែងគ្នាដោយសន្តិវិធី ដោយគោរពតាមធម្មនុញ្ញនៃអង្គការសហប្រជាជាតិ និងច្បាប់អន្តរជាតិ។
លោកស្រី Andreeva ទើបតែត្រូវបានតែងតាំងជាអ្នកសម្របសម្រួលអង្គការសហប្រជាជាតិប្រចាំព្រះរាជាណាចក្រកម្ពុជា កាលពីពេលថ្មីៗនេះ ប៉ុន្តែ លោកស្រីធ្លាប់បម្រើការនៅទីភ្នាក់ងាររបស់ UN ជាច្រើនឆ្នាំមកហើយ នៅកម្ពុជា។
លោកស្រី ថ្លែងអំណរគុណ ដល់កម្ពុជា សម្រាប់បេសកកម្ម ២០ ឆ្នាំរបស់កម្ពុជា នៅក្នុងបេសកកម្មរក្សាសន្តិភាពពិភពលោក តាមរយៈការបន្តបញ្ជូនកងទ័ពមួកខៀវទៅបំពេញបេសកកម្មថែរក្សាសន្តិភាពនៅឆ័ត្រក្រោមអង្គការសហប្រជាជាតិ។
លោកស្រីថ្លែងប្រាប់ភ្នំពេញប៉ុស្តិ៍ នៅក្រោយជំនួបនេះថា៖ «ខ្ញុំបានសម្តែងនូវការកោតសរសើរដោយស្មោះចំពោះការប្តេជ្ញាចិត្តដ៏មុតមាំរបស់កម្ពុជា ក្នុងការលើកកម្ពស់សន្តិភាព និងសន្តិសុខសកល។ កម្ពុជាបានវិវត្តខ្លួនពីប្រទេសដែលធ្លាប់ទទួលកងកម្លាំងរក្សាសន្តិភាពអង្គការសហប្រជាជាតិ មកជាសសរស្តម្ភនៃសន្តិសុខសកលវិញ។ ឆ្នាំនេះគឺជាខួបលើកទី ២០ នៃការចូលរួមរបស់កម្ពុជាក្នុងបេសកកម្មរក្សាសន្តិភាពរបស់អង្គការសហប្រជាជាតិ។ ចាប់តាំងពីឆ្នាំ ២០០៦ មក កម្ពុជាបានបញ្ជូនកងកម្លាំងរក្សាសន្តិភាពជាង ១០,០០០ នាក់ ក្នុងនោះមានស្ត្រីជាង ៩០០ នាក់ ទៅកាន់បេសកកម្មតាមបណ្តាប្រទេសនានា»។
លោកស្រីថា បានលើកឡើងពីកិច្ចសហការល្អរវាងស្ថាប័ននានារបស់កម្ពុជា ជាមួយទីភ្នាក់ងារអង្គការសហប្រជាជាតិប្រចាំនៅកម្ពុជា ហើយអង្គការសហប្រជាជាតិនឹងបន្តជួយដល់កម្ពុជាបន្តទៀត ដូចជាការបង្កើតការងារ, ការបង្កើនជំនាញបន្ថែម (Upskilling), ការកសាងមូលធនមនុស្ស ជាដើម។
លោកស្រីថ្លែងថា៖ «អង្គការសហប្រជាជាតិប្ដេជ្ញាចិត្តយ៉ាងពេញទំហឹងចំពោះជំពូកថ្មីរបស់កម្ពុជា។ ខណៈពេលដែលប្រទេសជាតិកំពុងត្រៀមខ្លួនចាកចេញពីស្ថានភាពប្រទេសដែលមានការអភិវឌ្ឍតិចតួច (LDC) ខ្ញុំបានបញ្ជាក់ជាថ្មីនូវការប្តេជ្ញាចិត្តរបស់គ្រួសារអង្គការសហប្រជាជាតិ ក្នុងការផ្តល់ជំនួយបច្ចេកទេសដែលចាំបាច់ដើម្បីសម្រេចបាននូវសមិទ្ធផលនេះ ដោយធានាថាគ្មានសហគមន៍ណាមួយ ពិសេសគឺសហគមន៍ដែលរងផលប៉ះពាល់ដោយជម្លោះព្រំដែននាពេលថ្មីៗនេះ ត្រូវបានបោះបង់ចោលនោះឡើយ»៕
