រដ្ឋមន្រ្តីក្រសួងទេសចរណ៍ថ្លែងនៅក្នុងកម្មវិធី K-WAVE Peace Concert 2026 ថា កម្ពុជានៅតែជាគោលដៅទេសចរណ៍សុវត្ថិភាព និងស្វាគមន៍ភ្ញៀវទេសចរពីគ្រប់ទិសទីប្រកបដោយបដិសណ្ឋារកិច្ចដ៏កក់ក្តៅ។
ព្រឹត្តិការណ៍ K-WAVE Peace Concert 2026 ត្រូវបានរៀបចំឡើងនៅថ្ងៃទី១៤ មីនា នៅរាជធានីភ្នំពេញដើម្បីពង្រឹងទំនាក់ទំនងកម្ពុជា-កូរ៉េ។ កម្មវិធីផ្សព្វផ្សាយវប្បធម៌នេះ ត្រូវបានវាយតម្លៃថាមានសារៈសំខាន់សម្រាប់ប្រទេសទាំងពីរក្នុងការលើកគុណតម្លៃនៃសន្តិភាព ការរួបរួមគ្នា ព្រមទាំងបញ្ជាក់ពីការប្តេជ្ញាពង្រឹង និងពង្រីកទំនាក់ទំនងការទូត «ភាពជាដៃគូយុទ្ធសាស្រ្ត» រវាងកម្ពុជា និងសាធារណរដ្ឋកូរ៉េលើគ្រប់វិស័យ។ នេះបើតាមក្រសួងទេសចរណ៍។
ព្រឹត្តិការណ៍នេះក៏រួមចំណែកដល់ «កិច្ចសហប្រតិបត្តិការជំរុញទេសចរណ៍ ការផ្លាស់ប្តូរប្រជាជន និងវប្បធម៌រវាងប្រទេសទាំងពីរ ការរួមគ្នាប្រយុទ្ធប្រឆាំង និងបោសសំអាតឱ្យអស់ឧក្រិដ្ឋកម្មឆបោកអនឡាញអន្តរជាតិដែលបានជះឥទ្ធិពលជាអវិជ្ជមានលើការធ្វើដំណើរ ប្រកបអាជីវកម្ម និងទេសចរណ៍»។
យោងតាមក្រសួងទេសចរណ៍ ព្រឹត្តិការណ៍ K-WAVE Peace Concert 2026 ដែលរៀបចំឡើងដោយ The Cambodia Branch of the Peaceful Unification Advisory Council (PUAC) មានការចូលរួមជាសារវីដេអូរបស់ប្រធានាធិបតីកូរ៉េ Lee Jae-myung ដែលប្រធានក្រុមប្រឹក្សាអង្គការ Peaceful Unification Advisory Council (PUAC) និងវត្តមានផ្ទាល់ Kim Chang-yong ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋកូរ៉េប្រចាំកម្ពុជា និងអ្នកពាក់ព័ន្ធសំខាន់ៗជាច្រើនទៀត។
រដ្ឋមន្ត្រីក្រសួងទេសចរណ៍ លោក ហួត ហាក់ បានលើកឡើងពីសារៈសំខាន់នៃការរៀបចំព្រឹត្តិការណ៍នេះ និងបានបញ្ជាក់ពីគោលដៅទេសចរណ៍កម្ពុជាដែលនៅតែមានសុវត្ថិភាព ទោះបីជាកាលពីកន្លងទៅ កេរ្តិ៍ឈ្មោះកម្ពុជាត្រូវបានរងការប៉ះពាល់ដោយការឆបោកតាមអនឡាញ។
លោករដ្ឋមន្ត្រីបានគូសបញ្ជាក់ជូនភ្ញៀវជាតិ និងអន្តរជាតិថាកម្ពុជា ជាគោលដៅទេសចរណ៍សុវត្ថិភាព បដិសណ្ឋារកិច្ចដ៏កក់ក្តៅ និងរាក់ទាក់ សម្រាប់ភ្ញៀវទេសចរពីទូទាំងពិភពលោក។
លោកថ្លែងថា៖ «រាជរដ្ឋាភិបាលកម្ពុជា បាននិងកំពុងចាត់វិធានការយ៉ាងម៉ឺងម៉ាត់ក្នុងការបង្ក្រាប និងលុបបំបាត់ដល់ឬសគល់នៃឧក្រិដ្ឋកម្មឆបោកតាមប្រព័ន្ធបច្ចេកវិទ្យា ដើម្បីធានានូវបរិយាកាសសុវត្ថិភាព និងទំនុកចិត្តសម្រាប់ភ្ញៀវទេសចរ ប្រជាពលរដ្ឋ និងវិនិយោគិន»។
យោងតាមក្រសួងទេសចរណ៍ ក្នុងរយៈពេល ២ ខែដំបូងនៃឆ្នាំ២០២៦ នេះ កម្ពុជាទទួលបានភ្ញៀវទេសចរអន្តរជាតិប្រមាណជិត៦៩០,០០០ នាក់ ដែលក្នុងនោះមានភ្ញៀវទេសចរកូរ៉េជិត១៥.១០០ នាក់៕
