កម្ពុជាបានធ្វើការតវ៉ាប្រឆាំងនឹងសកម្មភាពធ្វើផ្លូវ នៅក្បែរវត្តកែវសិក្ខាគិរីស្វារៈ នៅខេត្តព្រះវិហារ ដោយយោធាថៃ ដែលជាការបំពានទៅនឹងសាលដីការបស់តុលាការយុត្តិធម៌អន្តរជាតិ (ICJ) ដែលបានបញ្ជាក់យ៉ាងច្បាស់ថា ប្រាសាទព្រះវិហារ និងតំបន់ជុំវិញ គឺជាកម្មសិទ្ធិរបស់កម្ពុជា។
នៅក្នុងសេចក្តីប្រកាសព័ត៌មាននៅថ្ងៃទី១៣ ខែមីនា ក្រសួងការបរទេសបានបញ្ជាក់ថា កម្ពុជាប្រឆាំងតវ៉ានឹងសកម្មភាពខុសច្បាប់របស់យោធាថៃ ដែលរំលោភបំពានលើអធិបតេយ្យភាព និងបូរណភាពទឹកដីរបស់កម្ពុជា នៅតាមទីតាំងជាច្រើនតាមបណ្តោយព្រំដែន។
ក្រសួងបានលើកឡើងថា ចន្លោះពីថ្ងៃទី២៣ ដល់ ២៥ ខែកុម្ភៈ កងទ័ព និងជនស៊ីវិលថៃ បានធ្វើសកម្មភាពសាងសង់ និងជីកកកាយដោយខុសច្បាប់នៅលើតំបន់ទួលនៃប្រាសាទព្រះវិហារ ដែលត្រូវបានចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូ រួមទាំងការសាងសង់ប៉ុស្តិ៍យាម និងផ្លូវឆ្ពោះទៅកាន់វត្តកែវសិក្ខាគិរីស្វារៈ នៅក្បែរប្រាសាទផងដែរ។
ក្រសួងបានបញ្ជាក់ថា៖ «សកម្មភាពទាំងនេះត្រូវបានធ្វើឡើងដោយបំពានទៅនឹងសាលដីការបស់តុលាការយុត្តិធម៌អន្តរជាតិ (ICJ) ឆ្នាំ១៩៦២ និងឆ្នាំ២០១៣ ដែលបានអះអាងថា ប្រាសាទព្រះវិហារ និងតំបន់ដីទួលនៃប្រាសាទទាំងមូល គឺស្ថិតនៅក្នុងដែនដីអធិបតេយ្យរបស់កម្ពុជា»។
យោងតាមក្រសួងការបរទេស នៅតំបន់បុស្សស្បូវ-ជាំតែ ក្នុងស្រុកជាំក្សាន្តនៃខេត្តនេះ កងទ័ពថៃ និងព្រះសង្ឃ ក៏បាននិងកំពុងបន្តសាងសង់ព្រះពុទ្ធរូបខ្នាតធំមួយផងដែរ ចាប់ពីថ្ងៃទី៧ មីនា ទោះបីជាមានការប្រាប់ឲ្យឈប់ជាច្រើនដងពីភាគីកម្ពុជាក៏ដោយ។
ក្រសួងក៏បានឱ្យដឹងទៀតថា កងយោធពលថៃបានបន្តសាងសង់ហេដ្ឋារចនាសម្ព័ន្ធអចិន្ត្រៃយ៍នៅក្នុងតំបន់ប្រាសាទតាក្របី រួមមាន ផ្លូវបេតុង ជណ្តើរដែក និងការសាងសង់ព្រះពុទ្ធរូប ដែលមានបំណងបង្កើតជាតំបន់ទេសចរណ៍ និងទីតាំងយោធា។
សកម្មភាពខុសច្បាប់មួយចំនួនទៀត ក៏បានកើតឡើងនៅក្នុងតំបន់ខ្លះក្នុងខេត្តឧត្តរមានជ័យផងដែរ ដូចជាការសាងសង់ផ្លូវបេតុងដោយខុសច្បាប់ជាដើម។
ក្រសួងថ្លែងថា សកម្មភាពទាំងផ្ទុយនឹងខ្លឹមសានៃអនុស្សរណៈយោគយល់គ្នាឆ្នាំ២០០០ និងខ្លឹមសារបទឈប់បាញ់ថ្ងៃទី២៧ ខែធ្នូ ឆ្នាំ២០២៥។
កម្ពុជាប្រកាន់ខ្ជាប់យ៉ាងម៉ឺងម៉ាត់នូវគោលការណ៍ដែលថា ខ្សែបន្ទាត់ព្រំដែនមិនត្រូវធ្វើការផ្លាស់ប្តូរដោយការប្រើប្រាស់កម្លាំង ឬដោយការបង្កើតអង្គហេតុឯកតោភាគីណាមួយនៅលើទីតាំងផ្ទាល់នោះឡើយ៕
