ក្រសួងការបរទេសកម្ពុជា បានឆ្លើយតបទៅកាន់សមភាគីថៃ បន្ទាប់ពីភាគីថៃបានលើកយកករណីផ្ទុះគ្រាប់បែកប្រភេទ ៤០មីលីម៉ែត្រ កាលពី១០ថ្ងៃមុនមកនិយាយជាថ្មី និងបានលើករណីមួយចំនួនជាលេសសម្រាប់ការពន្យារពេលកិច្ចប្រជុំគណៈកម្មការព្រំដែនចម្រុះដីគោគ ស្របពេលដែលមានភាពជាប់គាំងបញ្ហាព្រំដែន។
សេចក្តីថ្លែងការណ៍របស់ក្រសួងដែលបានចេញផ្សាយនៅលើបណ្ដាញសង្គមនៅថ្ងៃនេះ ទី១៣ ខែមីនា បានឆ្លើយតបទៅនឹងសេចក្តីប្រកាសព័ត៌មានរបស់ក្រសួងការបរទេសថៃ កាលពីថ្ងៃទី១១ ខែមីនា ដែលបានលើកយកបញ្ហាផ្ទុះគ្រាប់បែកកាលពីថ្ងៃទី២៤ ខែកុម្ភៈ មកជជែកវែកញែកឡើងវិញ។
នៅក្នុងសេចក្តីប្រកាសព័ត៌មាន មានចំណងជើងថា «ប្រទេសថៃគូសបញ្ជាក់ពីភាពចាំបាច់សម្រាប់កិច្ចសហប្រតិបត្តិការប្រកបដោយសុឆន្ទៈ និងភាពស្មោះត្រង់របស់កម្ពុជា ក្នុងការជំរុញការវាស់វែង និងបោះបង្គោលព្រំដែនគោក រវាងប្រទេសទាំងពីរ» ដែលផ្សព្វផ្សាយនៅថ្ងៃទី១១មីនា ភាគីថៃបានអះអាងថា ការផ្ទុះនោះ គឺជាការរំលោភលើបទឈប់បាញ់ថ្ងៃទី២៧ ខែធ្នូ។
ប៉ុន្តែសមភាគីកម្ពុជាបានបញ្ជាក់ថា ការចោទប្រកាន់ពីការបាញ់នេះគឺមិនត្រឹមត្រូវទេ ហើយករណីនេះត្រូវបានបកស្រាយបំភ្លឺរួចហើយតាមរយៈកំណត់ទូតចុះថ្ងៃទី២៤ ខែកុម្ភៈ ឆ្នាំ២០២៦។ ក្រសួងបញ្ជាក់ថា ហេតុការណ៍ដែលថៃអះអាងថាកម្ពុជាជាអ្នកបាញ់នោះមិនត្រឹមត្រូវ។ លើសពីនេះករណីនេះត្រូវបានផ្ទៀងផ្ទាត់រួមគ្នាយ៉ាងឆាប់រហ័សដោយក្រុមការងារទំនាក់ទំនងយោធាតំបន់នៃភាគីទាំងពីរ។
ក្រសួងការបរទេសកម្ពុជាបានលើកឡើងដោយយោងតាមសេចក្តីថ្លែងការណ៍រួមថ្ងៃទី២៧ ខែធ្នូ ថា៖ «ការរាយការណ៍មិនត្រឹមត្រូវបែបនេះ មិនគួរត្រូវបានយកទៅចែកចាយបន្តទៀតទេ»។
ភាគីថៃក៏បានអះអាងផងដែរថា កម្ពុជាបានសាងសង់ផ្សារសហគមន៍ និងរូបសំណាក តា អុំ នៅអានសេះ ដោយថៃអះអាងថា ជាដីរបស់គេ ថែមទាំងបានអះអាងថា កម្ពុជាបានសាងសង់អគាររដ្ឋបាលរបស់ខ្លួននៅក្នុងដែនអធិបតេយ្យភាពរបស់ប្រទេសថៃ ក្នុងស្រុកតាប្រាយ៉ា ខេត្តស្រះកែវ ទៀតផង។
ប៉ុន្តែ ភាគីកម្ពុជាបានឆ្លើយតបថា រូបសំណាកនេះស្ថិតនៅក្នុងទឹកដីកម្ពុជាទាំងស្រុង ដូចដែលបានកំណត់ និងគូសវាសដោយផែនទីខ្នាត ១លើ២០០.០០០ ដែលផលិតដោយគណៈកម្មការចម្រុះបារាំង-សៀម ដោយអនុលោមតាមអនុសញ្ញាឆ្នាំ១៩០៤ និងសន្ធិសញ្ញាឆ្នាំ១៩០៧។
ក្រសួងការបរទេសកម្ពុជាបានបញ្ជាក់ថា៖ «រាល់ការទាមទារដោយផ្អែកលើផែនទី L70l7 ដែលគូសជាឯកតោភាគីដោយប្រទេសថៃ គឺមិនអាចយកជាការបានឡើយតាមផ្លូវច្បាប់។ ក្នុងន័យនេះ ក៏គួរយោងទៅលើលទ្ធផលនៃការចុះវាស់វែងលម្អិតរួមគ្នាដែលអនុវត្តដោយក្រុមការងារវាស់វែងចម្រុះ (JST) នៃប្រទេសទាំងពីរ កាលពីថ្ងៃទី១៧ ខែកញ្ញា ឆ្នាំ២០១៥ ផងដែរ»។
ភាគីថៃក៏បានលើកឡើងផងដែរថា ពួកគេ «កត់សម្គាល់» នូវសំណើរបស់កម្ពុជាក្នុងការកោះប្រជុំគណៈកម្មការព្រំដែនចម្រុះ (JBC) ហើយ «នឹងឆ្លើយតបនៅពេលវេលាសមស្របណាមួយ បន្ទាប់ពីការបង្កើតគណៈរដ្ឋមន្ត្រីថ្មីរួចរាល់» ដោយបន្ថែមថា គ្រោះថ្នាក់នៅតែមានសម្រាប់ក្រុមការងារវាស់វែងចម្រុះ។
ក្រសួងការបរទេសកម្ពុជាបានបញ្ជាក់ថា គណៈកម្មការព្រំដែនចម្រុះកម្ពុជា (JBC-កម្ពុជា) បានផ្ញើលិខិតអញ្ជើញជាបន្តបន្ទាប់ចំនួន ៥ដង រួចមកហើយទៅកាន់សមភាគីថៃ ដើម្បីបន្តការងារបច្ចេកទេសរបស់ក្រុមការងារវាស់វែងចម្រុះឡើងវិញក្នុងឱកាសដ៏ខ្លីខាងមុខ។
ក្រសួងបានបន្តថា៖ «នេះគឺក្នុងគោលបំណងពង្រឹងកិច្ចខិតខំប្រឹងប្រែងប្រកបដោយសុច្ឆន្ទៈ ដើម្បីពន្លឿនការងារបោះបង្គោលព្រំដែន ជាពិសេសនៅក្នុងតំបន់អាទិភាព ឬតំបន់រសើប»។
ភាគីសង្កត់ធ្ងន់លើការប្តេជ្ញាចិត្តចំពោះដំណោះស្រាយដោយសន្តិវិធីចំពោះបញ្ហាព្រំដែន និងបានលើកឡើងផងដែរថា «កម្ពុជាសង្ឃឹមថានឹងឃើញកិច្ចសហប្រតិបត្តិការប្រកបដោយភាពស្មោះត្រង់ ដែលឆ្លុះបញ្ចាំងតាមរយៈសកម្មភាពជាក់ស្តែងនៅ»៕
