ខេត្ដរតនគិរី៖ អភិបាលខេត្តរតនគិរី លោក ញឹម សំអឿន បានអះអាងថា ខេត្តរតនគិរីមិនមានសកម្មភាព Scam Online ឡើយ ខណៈអាជ្ញាធរកម្ពុជាកំពុងបន្តយុទ្ធនាការបង្ក្រាបបណ្ដាញឆបោកតាមអនឡាញទូទាំងប្រទេស។
ការអះអាងនេះធ្វើឡើង ខណៈមន្ត្រីជាន់ខ្ពស់រដ្ឋាភិបាលបានឱ្យដឹងថា អាជ្ញាធរបានបង្ក្រាបទីតាំងពាក់ព័ន្ធនឹងសកម្មភាពឆបោកតាមអនឡាញប្រហែល ២៥០ កន្លែង ចាប់តាំងពីខែកក្កដា ឆ្នាំ២០២៥មក។
ក្នុងចំណោមនោះ ទីតាំងជិត ២០០ កន្លែងត្រូវបានបិទ ខណៈជនសង្ស័យជាង ៣,៤០០ នាក់ ដែលភាគច្រើនជាជនបរទេស ត្រូវបានចាប់ខ្លួនក្នុងរយៈពេលប្រមាណ ៤ ខែ។
មន្ត្រីបានបញ្ជាក់ថា ករណីផ្លូវច្បាប់ចំនួន ៧៩ ករណី ត្រូវបានបើកស៊ើបអង្កេត ដែលពាក់ព័ន្ធនឹងមេខ្លោង និងបក្ខពួកសង្ស័យចំនួន ៦៩៧ នាក់ ខណៈជនបរទេសប្រមាណ ១១,០០០ នាក់ ដែលពាក់ព័ន្ធនឹងសកម្មភាព Scam ត្រូវបានបណ្តេញចេញពីប្រទេស។
ប្រតិបត្តិការបង្ក្រាបទាំងនេះត្រូវបានអនុវត្តនៅរាជធានីភ្នំពេញ និងខេត្តចំនួន ១៧ ផ្សេងទៀត រួមមានខេត្តព្រះសីហនុ កណ្តាល និងក្រុងប៉ោយប៉ែតជាដើម ដែលអាជ្ញាធរបានរកឃើញសកម្មភាពបណ្ដាញឆបោកតាមអនឡាញ។
ថ្លែងប្រាប់អ្នកសារព័ត៌មាន លោក ញឹម សំអឿន បានអះអាងយ៉ាងច្បាស់ថា ខេត្តរតនគិរីមិនមានសកម្មភាព Scam Online ឡើយ។
លោកបានបញ្ជាក់ថា៖ «Scam online នេះក្នុងខេត្តរតនគិរីមិនមានទេ។ ខ្ញុំមិនឱ្យមានជាដាច់ខាត។ ខេត្តរតនគិរីអត់អីពិបាកទេ មិនដូចភ្នំពេញ ដែលមានកន្លែងស្មុគស្មាញច្រើន។ នៅទីនេះ បើមានផ្ទះសំណាក់ណា មានជនបរទេស ៤-៥ នាក់ឡើងទៅ យើងដឹងពីពួកគេថា តើជាទេសចរ ឬក្រុម scam online គឺខុសគ្នាដាច់ស្រឡះ រួមទាំងអ្នកវិនិយោគ»។
អភិបាលខេត្តរតនគិរីក៏បានបញ្ជាក់ថា ខេត្តមិនអនុញ្ញាតឱ្យមានល្បែងស៊ីសងគ្រប់ប្រភេទផងដែរ រួមមានល្បែងជល់មាន់ បៀរ និងអាប៉ោងជាដើម។
លោកបានលើកឡើងថា ប្រជាពលរដ្ឋតែងនិយាយថា ល្បែងស៊ីសងនាំឱ្យមានអន្តរាយ បាត់បង់ប្រាក់កាក់ ខាតបង់ពេលវេលា និងអាចបង្កឱ្យមានអំពើហិង្សាផងដែរ ដូច្នេះអាជ្ញាធរមិនអនុញ្ញាតឱ្យមានសកម្មភាពទាំងនេះឡើយ។
យ៉ាងណាក៏ដោយ លោកបានបញ្ជាក់បន្ថែមថា ល្បែងអនឡាញ និង ឆបោកអនឡាញ Scam Online មានលក្ខណៈខុសគ្នា ខណៈល្បែងអនឡាញដែលអ្នកលេងអាចប្រតិបត្តិការតាមទូរស័ព្ទដៃផ្ទាល់ខ្លួន គឺពិបាកក្នុងការបង្ក្រាប៕
