បាត់ដំបង៖ សមត្ថកិច្ចនគរបាលខេត្តបាត់ដំបងកំពុងបន្តស្វែងរកអ្នកបើកបររថយន្តប្រណីតមួយរូប បន្ទាប់ពីពាក់ព័ន្ធនឹងករណីគ្រោះថ្នាក់ចរាចរណ៍ដ៏ធ្ងន់ធ្ងរ បណ្តាលឱ្យមនុស្ស៦នាក់ស្លាប់ រួមទាំងទារកក្នុងផ្ទៃ និងម្នាក់ទៀតរងរបួសធ្ងន់ ខណៈអ្នកបើកបរបានគេចខ្លួនចេញពីកន្លែងកើតហេតុភ្លាមៗក្រោយហេតុការណ៍កើតឡើង។
យោងតាមសេចក្តីប្រកាសព័ត៌មានរបស់អ្នកនាំពាក្យស្នងការដ្ឋាននគរបាលខេត្ត បញ្ជាក់ថា ហេតុការណ៍នេះបានកើតឡើងនៅវេលាម៉ោងប្រហែល ២២ និង ៤០ នាទីយប់ ថ្ងៃទី២៧ ខែមីនា ឆ្នាំ២០២៦ លើផ្លូវជាតិលេខ៥ ចន្លោះគីឡូម៉ែត្រលេខ ២៤៦-២៤៧ ស្ថិតក្នុងភូមិកកោះ ឃុំកកោះ ស្រុកមោងឫស្សី។
ប្រភពដដែលបន្តថា គ្រោះថ្នាក់នេះជាការប៉ះទង្គិចរវាងរថយន្តម៉ាក Mercedes-Benz AMG GT53 ពណ៌ខ្មៅ ស៊េរីឆ្នាំ២០២០ ពាក់ផ្លាកលេខ កម្ពុជា C.S.6168 ជាមួយម៉ូតូពីរគ្រឿងម៉ាក Honda Dream ដែលកំពុងធ្វើដំណើរត្រឡប់ពីការប្រគុំតន្ត្រីមួយក្នុងទីរួមស្រុកមោងឫស្សី។
យោងតាមអ្នកនាំពាក្យនៃស្នងការដ្ឋាននគរបាលខេត្តបាត់ដំបង បានឱ្យដឹងថា៖ «បន្ទាប់ពីកើតហេតុរួចមកសមត្ថកិច្ចនគរបាលស្រុកមោងឫស្សី រួមសហការជាមួយសមត្ថកិច្ចនគរបាល ការិយាល័យនគរបាលចរាចរណ៍ផ្លូវគោកនៃស្នងការដ្ឋានបានចុះទៅដល់ទីតាំងកើតហេតុ អ្នកបើករថយន្ត បង្កគ្រោះថ្នាក់បានគេចខ្លួនពីកន្លែងកើតហេតុបាត់ដោយបន្សល់ទុករថយន្តបង្កនៅទីនោះហើយសមត្ថកិច្ច និងអ្នកជួយសង្គ្រោះនាំអ្នករងរបួសទៅកាន់មន្ទីរពេទ្យ និងអ្នកស្លាប់ប្រគល់ជូនក្រុមគ្រួសារសព កើតហេតុ និងប្រមូលភស្តុតាងនានានៅកន្លែងកើតហេតុ»។
តាមរយៈការស្រាវជ្រាវលើផ្លាកលេខរថយន្ត សមត្ថកិច្ចបានកំណត់អត្តសញ្ញាណម្ចាស់រថយន្តថា ជាយុវជនឈ្មោះ ស៊ីវ ជ័យសិដ្ឋ កើតឆ្នាំ២០០៦ មានទីលំនៅក្នុងរាជធានីភ្នំពេញ។
នគរបាលបានទំនាក់ទំនងទៅឪពុករបស់យុវជនរូបនេះ ដែលបានបញ្ជាក់ថា រថយន្តនោះជាកម្មសិទ្ធិរបស់កូនពិតប្រាកដ ហើយកូនបានបើកចេញពីភ្នំពេញទៅខេត្តបាត់ដំបងនៅថ្ងៃកើតហេតុ។
ទោះជាយ៉ាងណា គិតមកដល់ពេលនេះ ក្រុមគ្រួសារនៅមិនទាន់ដឹងទីតាំងស្ថិតនៅរបស់យុវជនរូបនោះនៅឡើយទេ ខណៈសមត្ថកិច្ចបានអំពាវនាវឱ្យមានការសហការនាំខ្លួនមកប្រគល់ជូនអាជ្ញាធរ ដើម្បីទទួលខុសត្រូវតាមផ្លូវច្បាប់។
ក្នុងករណីនេះ លោកនាយករដ្ឋមន្ត្រី ហ៊ុន ម៉ាណែត បានបញ្ជាឱ្យអាជ្ញាធរធ្វើការស៊ើបអង្កេតយ៉ាងម៉ឺងម៉ាត់ ដើម្បីស្វែងរកអ្នកបើកបរពិតប្រាកដ និងអនុវត្តច្បាប់ដោយគ្មានការលើកលែង។
លោកបានបញ្ជាក់ថា: «ត្រូវស្វែងរកឲ្យឃើញអ្នកដែលបើកបររថយន្តដែលបណ្ដាលឲ្យស្លាប់មនុស្សទាំង៦នាក់ ហើយអនុវត្តច្បាប់ដើម្បីផ្ដល់យុត្តិធម៌ដល់ជនរងគ្រោះ»។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានឱ្យដឹងថា ថ្នាក់ដឹកនាំក្រសួងបានចាត់តាំងមេធាវីស្ម័គ្រចិត្តម្នាក់ ដើម្បីផ្តល់ជំនួយផ្នែកច្បាប់ដោយឥតគិតថ្លៃជូនដល់គ្រួសារជនរងគ្រោះទាំង៦នាក់ ដែលបានស្លាប់ក្នុងគ្រោះថ្នាក់ចរាចរណ៍បុករត់ដ៏រន្ធត់នៅខេត្តបាត់ដំបង កាលពីយប់ថ្ងៃទី២៧ ខែមីនា ឆ្នាំ២០២៦។
លោក ម៉ាលីន បានសរសេរលើបណ្ដាញសង្គមថា៖ «ក្នុងនាមក្រុមការងារចុះមូលដ្ឋានស្រុកមោងឫស្សី ខេត្តបាត់ដំបង ខ្ញុំសូមចូលរួមមរណៈទុក្ខជាមួយក្រុមគ្រួសារសពនៃជនរងគ្រោះទាំង៦នាក់ និងសូមវិញ្ញាណក្ខន្ធអ្នកទាំងអស់បានទៅកាន់សុខគតិភព»។
អ្នកនាំពាក្យនគរបាលខេត្តបាត់ដំបងបញ្ជាក់ថា សមត្ថកិច្ចកំពុងបន្តប្រមូលភស្តុតាងបន្ថែម តាមរយៈកាមេរ៉ាសុវត្ថិភាពនៅតាមដងផ្លូវ ចាប់ពីរាជធានីភ្នំពេញទៅខេត្តបាត់ដំបង ព្រមទាំងប្រភពផ្សេងៗ ដើម្បីបញ្ជាក់និងវាយតម្លៃថា យុវជនឈ្មោះ ស៊ីវ ជ័យសិដ្ឋ ពិតជាជាអ្នកបើកបររថយន្តបង្កហេតុ ដែលបណ្តាលឱ្យមានការស្លាប់ និងរបួសដូចបានរាយការណ៍។
សមត្ថកិច្ចបានបញ្ជាក់ថា ការស្រាវជ្រាវកំពុងបន្តយ៉ាងសកម្ម ដើម្បីស្វែងរកជនសង្ស័យមកទទួលខុសត្រូវតាមច្បាប់ជាធរមាន។ អាជ្ញាធរបានអំពាវនាវដល់សាធារណជនឱ្យផ្តល់ព័ត៌មាន ប្រសិនបើមានតម្រុយពាក់ព័ន្ធនឹងទីតាំងរបស់ជនសង្ស័យ៕
