ភ្នំពេញ៖ ភាគីចិនដែលតាំងពីឆ្នាំ២០១៨ បានផ្ដល់ជំនួយរំដោះដីពីគ្រាប់យុទ្ធភណ្ឌមិនទាន់ជិត២ម៉ឺនហិកតា បានបញ្ជាក់ជាថ្មីពីការបន្តផ្តល់ជំនួយទាំងថវិកា និងបច្ចេកទេសដល់វិស័យសកម្មភាពមីននៅកម្ពុជា ដើម្បីបង្កើនល្បឿនប្រតិបត្តិការបោសសម្អាត និងជួយឱ្យកម្ពុជាសម្រេចបានគោលដៅជាតិរបស់ខ្លួន។ នេះបើយោងតាមការបញ្ជាក់របស់អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់)។
ការបញ្ជាក់នេះធ្វើឡើងក្នុងជំនួបពិភាក្សាការងារនៅថ្ងៃទី១ ខែមេសា រវាងលោក ហេង រតនា អគ្គនាយក CMAC និងលោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា នៅស្ថានទូតចិនប្រចាំរាជធានីភ្នំពេញ។
បន្ទាប់ពីជំនួប លោក ហេង រតនា បានឱ្យដឹងថា ភាគីទាំងពីរបានពិភាក្សាលើការពង្រឹងកិច្ចសហប្រតិបត្តិការ និងភាពជាដៃគូយុទ្ធសាស្ត្រនៅក្នុងវិស័យសកម្មភាពមីន ជាពិសេសតាមរយៈគម្រោងជំនួយរបស់ចិនដែលកំពុងអនុវត្តជាមួយ ស៊ីម៉ាក់។
លោកបានបញ្ជាក់ពីវឌ្ឍនភាពសំខាន់ៗក្រោម «គម្រោងជំនួយចិនលុបបំបាត់គ្រាប់មីននៅកម្ពុជា» ដោយលើកឡើងថា ជំនួយរបស់ចិនបានចូលរួមយ៉ាងសំខាន់ក្នុងការពង្រីកវិសាលភាព បង្កើនប្រសិទ្ធភាព និងសុវត្ថិភាពនៃប្រតិបត្តិការបោសសម្អាតមីន។
លោកបានថ្លែងថា៖ «ជំនួយរបស់ចិន រួមមានទាំងសម្ភារបច្ចេកទេស និងថវិកា បានអនុញ្ញាតឱ្យ ស៊ីម៉ាក់ សម្រេចបានលទ្ធផលគួរឱ្យកត់សម្គាល់ក្នុងការបោសសម្អាតមីន និងសំណល់ជាតិផ្ទុះពីសង្គ្រាម»។
យោងតាមទិន្នន័យ ស៊ីម៉ាក់ ចាប់ពីឆ្នាំ២០១៨ ដល់ថ្ងៃទី២៨ ខែកុម្ភៈ ឆ្នាំ២០២៦ គម្រោងដែលមានការគាំទ្រពីចិននេះ បានជួយបោសសម្អាតផ្ទៃដីដែលមានមីន និងសំណល់ជាតិផ្ទុះបានជាង ១៩,០០០ ហិកតា ខណៈគ្រាប់មីន និងគ្រាប់មិនទាន់ផ្ទុះជាង ១០៥,០០០ គ្រាប់ ត្រូវបានរកឃើញ និងកម្ទេចចោល។
ជាមួយគ្នានេះ អង្គភាពស៊ីម៉ាក់ បានឆ្លើយតបសំណើអន្តរាគមន៍បន្ទាន់ជាង ៥,៩០០ ករណី និងផ្តល់ការអប់រំអំពីគ្រោះថ្នាក់មីនដល់ប្រជាពលរដ្ឋជាង ៤.៦ លាននាក់ នៅទូទាំងប្រទេស។
ប្រជាពលរដ្ឋជាង ៣៧៨,០០០ គ្រួសារ ស្មើនឹងប្រហែល ១.៤៥ លាននាក់ បានទទួលផលប្រយោជន៍ដោយផ្ទាល់ និងដោយប្រយោលពីគម្រោងនេះ។
ឯកអគ្គរដ្ឋទូតចិនបានបញ្ជាក់ថា កម្ពុជាបានសម្រេចលទ្ធផល “គួរឱ្យកត់សម្គាល់” ក្នុងការធានាសុវត្ថិភាពសាធារណៈ និងការអភិវឌ្ឍសេដ្ឋកិច្ចសង្គម។
លោកក៏បានបញ្ជាក់ជំហររឹងមាំរបស់ភាគីចិន ក្នុងការបន្តផ្តល់ជំនួយឥតសំណង និងការគាំទ្រដល់ប្រតិបត្តិការបោសសម្អាតមីនមនុស្សធម៌ ដើម្បីបង្កើនល្បឿនការងារឱ្យសម្រេចបានតាមគោលដៅដែលបានកំណត់។
លោក វិនធៀន ត្រូវបានស្រង់សម្ដៅដោយបានថ្លែងថា៖ «ចិនត្រៀមខ្លួនជាស្រេចក្នុងការបន្តគាំទ្រកម្ពុជា ក្នុងការដោះស្រាយបញ្ហាសំណល់ជាតិផ្ទុះពីសង្គ្រាម ដើម្បីសុវត្ថិភាពរបស់ប្រជាពលរដ្ឋ និងការអភិវឌ្ឍប្រកបដោយចីរភាព»។
កម្ពុជានៅតែជាប្រទេសមួយដែលរងផលប៉ះពាល់ខ្លាំងពីមីន និងសំណល់ជាតិផ្ទុះពីសង្គ្រាម ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ ការគាំទ្រពីអន្តរជាតិ និងការខិតខំប្រឹងប្រែងក្នុងស្រុក បានជួយកាត់បន្ថយការប៉ះពាល់ និងគ្រោះថ្នាក់យ៉ាងច្រើន។
ការបន្តគាំទ្រពីភាគីចិន ត្រូវបានរំពឹងថានឹងជួយពង្រឹងសមត្ថភាពរបស់កម្ពុជា ក្នុងការបោសសម្អាតតំបន់នៅសេសសល់ បង្កើតសុវត្ថិភាពសម្រាប់សហគមន៍ និងបើកឱកាសអភិវឌ្ឍដីធ្លីសម្រាប់កសិកម្ម និងសេដ្ឋកិច្ច។
លោក ហេង រតនា បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនចិន សម្រាប់ការគាំទ្រដែលបានផ្តល់ជាបន្តបន្ទាប់ ដោយបានបញ្ជាក់ថា នេះជាកត្តាសំខាន់ក្នុងការអនុញ្ញាតឱ្យ ស៊ីម៉ាក់ ពង្រីកប្រតិបត្តិការបានកាន់តែទូលំទូលាយ និងមានប្រសិទ្ធភាព។
លោកបានបន្ថែមថា កិច្ចសហប្រតិបត្តិការនេះ មិនត្រឹមតែជួយលើកកម្ពស់ការងារបោសសម្អាតមីនក្នុងប្រទេសប៉ុណ្ណោះទេ ប៉ុន្តែថែមទាំងរួមចំណែកដល់គោលដៅអភិវឌ្ឍជាតិ និងតួនាទីកម្ពុជាក្នុងការចែករំលែកបទពិសោធន៍លើឆាកអន្តរជាតិផងដែរ។
