ក្រសួងពីរសម្រួលដល់ប្រជាពលរដ្ឋក្នុងការប្រើប្រាស់ឯកសារអត្តសញ្ញាណបុគ្គលដើម្បីទទួលសេវានានាក្នុងវិស័យសាធារណការ និងដឹកជញ្ជូន ដោយពលរដ្ឋមិនចាំបាច់ត្រូវតែមានឯកសារចម្លងអត្តសញ្ញាណប័ណ្ណសញ្ជាតិខ្មែរដែលមានការបញ្ជាក់ពីស្ថាប័នមានសមត្ថកិច្ច ដូចមុនទៀតទេ។
កាលពីកន្លងទៅ ការស្នើសុំសេវាណាមួយ ដូចជាការផ្ទេរកម្មសិទ្ធិរថយន្តជាដើម តម្រូវឲ្យអ្នកស្នើសុំមានអត្តសញ្ញាណប័ណ្ណសញ្ជាតិខ្មែរថតចម្លងហើយត្រូវបានបញ្ជាក់ពីការិយាល័យច្រកចេញចូលតែមួយស្រុកឬខណ្ឌ ថាជាឯកសារត្រឹមត្រូវ។ ជាទូទៅ ការបញ្ជាក់អត្តសញ្ញាណប័ណ្ណសញ្ជាតិខ្មែរ តម្រូវឲ្យពលរដ្ឋថតចម្លងអត្តសញ្ញាណប័ណ្ណយ៉ាងហោចណាស់ ៥សន្លឹក យកទៅស្នើសុំការបញ្ជាក់ពីច្រកចេញចូលតែមួយ ហើយត្រូវរង់ចាំ ៣ថ្ងៃនៃថ្ងៃធ្វើការ។
ប៉ុន្តែ បើយោងតាមសារាចរចេញដោយក្រសួងមហាផ្ទៃ និងក្រសួងសាធារណការនិងដឹកជញ្ជូន នៅថ្ងៃទី៩ ខែមីនា ឯកសារតម្រូវបែបនេះគ្រាន់តែជាជម្រើសមួយប៉ុណ្ណោះ ក្នុងចំណោមជម្រើសឯកសារតម្រូវចំនួន ៤ ដែលពលរដ្ឋអាចប្រើប្រាស់បាន។
ជម្រើសដែលងាយស្រួលសម្រាប់ប្រជាពលរដ្ឋគឺ ការប្រើប្រាស់អត្តសញ្ញាណប័ណ្ណសញ្ជាតិខ្មែរថតចម្លងដោយអ្នកស្នើសុំសេវាគ្រាន់តែត្រូវផ្តិតស្នាមខ្ចៅដៃសាមីខ្លួនដោយផ្ទាល់នៅចំពោះមុខមន្ត្រីទទួលបន្ទុកផ្តល់សេវា និងត្រូវភ្ជាប់មកជាមួយនូវអត្តសញ្ញាណប័ណ្ណសញ្ជាតិខ្មែរ ច្បាប់ដើមសម្រាប់មន្ត្រីទទួលបន្ទុកធ្វើការពិនិត្យ និងផ្ទៀងផ្ទាត់ ជាការស្រេច។
បន្ថែមពីលើនេះ ជម្រើស២ទៀត គឺអ្នកស្នើសុំសេវាអាចប្រើប្រាស់លិខិតបញ្ជាក់អត្តសញ្ញាណបុគ្គលច្បាប់ដើមដែលចេញដោយអគ្គនាយកដ្ឋានអត្តសញ្ញាណកម្ម ឬ លិខិតបញ្ជាក់ភាពត្រឹមត្រូវនៃទិន្នន័យអត្តសញ្ញាណបុគ្គលដែលចេញដោយអគ្គនាយកដ្ឋាន អត្តសញ្ញាណកម្ម។
ចំពោះឯកសារផ្សេងទៀតដែលតម្រូវសម្រាប់ស្នើសុំតាមប្រភេទសេវាសាធារណៈនីមួយៗ ត្រូវអនុវត្តតាមនីតិវិធីដែលចែងក្នុងច្បាប់ និងលិខិតបទដ្ឋានគតិយុត្ត។ នេះបើតាមសារាចរអន្តរក្រសួង៕
