លោកស្រី ឃួន សុដារី ប្រធានរដ្ឋសភាកម្ពុជា បានស្នើរដ្ឋសភាហុងគ្រី តាមរយៈលោក ជីយ៉ចជី ស៊ូច (György Such) អគ្គលេខាធិការ នៃរដ្ឋសភាហុងគ្រី ឱ្យបន្តពង្រឹងកិច្ចសហប្រតិបត្តិការរដ្ឋសភាប្រទេសទាំង២ និងជួយជំរុញវិស័យពាណិជ្ជកម្ម ទេសចរណ៍ អប់រំ បច្ចេកវិទ្យា និងកសិកម្មបន្ថែមទៀត។
សំណើនេះ បានធ្វើឡើង ក្នុងពេលលោកស្រី បានអនុញ្ញាតឱ្យលោក ជីយ៉ចជី ស៊ូច និងសហការី ចូលជួបសម្តែងការគួរសម និងពិភាក្សាការងារ កាលពីថ្ងៃទី ១០ ខែមីនានេះ គឺក្នុងឱកាសដែលលោក បានដឹកនាំគណៈប្រតិភូ មកបំពេញទស្សនកិច្ចការងារនៅកម្ពុជា។
ដំណើរទស្សនកិច្ចនេះ មិនត្រឹមតែឆ្លុះបញ្ចាំងពីការពង្រឹងកិច្ចសហប្រតិបត្តិការរវាងរដ្ឋសភាប្រទេសទាំង២ប៉ុណ្ណោះទេ ប៉ុន្តែជាឱកាសដែលកម្ពុជា និងហុងគ្រី ពិនិត្យលើសក្តានុពលផ្សេងៗទៀត ក្នុងការបង្កើត និងបង្កើនកិច្ចសហប្រតិបត្តិការជាមួយគ្នាបន្ថែមទៀត ដើម្បីនាំមកនូវផលប្រយោជន៍ជូនប្រជាពលរដ្ឋទាំងសងខាង ដូចជា វិស័យពាណិជ្ជកម្ម សេដ្ឋកិច្ច កសិកម្ម អប់រំ បច្ចេកវិទ្យា និងទេសចរណ៍ជាដើម។
លោកស្រី ឃួន សុដារី បានចាត់ទុកដំណើរទស្សនកិច្ចរបស់លោក ជីយ៉ចជី ស៊ូច ថា ជាជំហានថ្មីមួយទៀត ដែលបង្ហាញពីលទ្ធផលជាក់ស្តែង នៃការអនុវត្តដោយប្រសិទ្ធភាពនូវអនុស្សរណៈនៃការយោគយល់គ្នា (MoU) កាលពីឆ្នាំ២០២៥ ដែលនឹងរួមចំណែកបន្ថែមទៀត ដល់ការពង្រឹង និងពង្រីកទំនាក់ទំនងរវាងរដ្ឋសភានៃប្រទេសទាំង២ ជាពិសេស រវាងអគ្គលេខាធិការដ្ឋានទាំង២ ឱ្យកាន់តែជិតស្និទ្ធ និងស៊ីជម្រៅបន្ថែមទៀត។
ចំពោះដំណើរទស្សនកិច្ចផ្លូវការរបស់ថ្នាក់ដឹកនាំអគ្គលេខាធិការដ្ឋានរដ្ឋសភាហុងគ្រី មកកាន់កម្ពុជានេះ កើតចេញពីលទ្ធផលនៃដំណើរទស្សនកិច្ចរបស់ប្រធានរដ្ឋសភាកម្ពុជា ដែលបានទៅបំពេញទស្សនកិច្ចផ្លូវការ និងមិត្តភាព នៅប្រទេសហុងគ្រី កាលពីខែតុលា ឆ្នាំ២០២៥ ដោយក្នុងដំណើរទស្សនកិច្ចនោះ រដ្ឋសភាប្រទេសទាំង២ បានចុះ MoU រវាងរដ្ឋសភាកម្ពុជា និងរដ្ឋសភាហុងគ្រី ទាំងកម្រិតរដ្ឋសភា និងកម្រិតអគ្គលេខាធិការដ្ឋានរដ្ឋសភា។
លោកស្រី ឃួន សុដារី បានលើកឡើងថា ហុងគ្រី គឺជាមិត្តចាស់របស់កម្ពុជា ជាមិត្តដែលមានការយោគយល់ ជឿជាក់ គោរពគ្នា និងស្មោះត្រង់ ហើយទំនាក់ទំនងការទូតទ្វេភាគីរវាងប្រទេសកម្ពុជជា និងហុងគ្រី បានឈានដល់ខួបទី៧០ឆ្នាំ ដែលបានឆ្លុះបញ្ចាំងនូវស្មារតីនៃចំណងមិត្តភាពដ៏យូរអង្វែង ប្រកបដោយភាពស្អិតល្មួត និងកិច្ចសហប្រតិបត្តិការដ៏ល្អ។
ប្រធានរដ្ឋសភាកម្ពុជា បានបញ្ជាក់ថា៖ «រដ្ឋសភាប្រទេសទំាង២ បានឱ្យតម្លៃចំពោះសន្តិភាព ដោយសារសន្តិភាពជាតម្រូវការរបស់ពលរដ្ឋគ្រប់ជាតិសាសន៍ ហើយនៅក្នុងបរិបទស្មុគស្មាញរបស់ពិភពលោកនេះ យើងត្រូវនាំគ្នាបញ្ចប់សង្រ្គាម បើមិនដូច្នេះសង្រ្គាមនឹងបញ្ចប់យើងទាំងអស់គ្នា»។ លោកស្រីបន្ថែមថា សភាកម្ពុជា និងហុងគ្រី នឹងបន្តជំរុញគំនិតផ្តួចផ្តើមនេះឱ្យកាន់តែសកម្ម និងជាក់ស្តែង។
ទន្ទឹមនឹងនេះ លោកស្រី ឃួន សុដារី បានអរគុណដល់ប្រទេសហុងគ្រី ដែលបានផ្តួចផ្តើមគំនិតសហប្រតិបត្តិការ Danube–Mekong ដែលមានសារៈសំខាន់ដល់ប្រជាពលរដ្ឋនៅទ្វីបទាំង២ ក្នុងការទាញយកផលប្រយោជន៍ពីទន្លេដ៏ធំ និងមានសក្តានុពលទាំងផ្នែកសេដ្ឋកិច្ច កសិកម្ម និងវប្បធម៌ ហើយលោកស្រី បានស្នើរដ្ឋាភិបាលហុងគ្រី ជួយគាំទ្រកម្មវិធី Software និងជំនាញឯកទេស ដើម្បីលើកកម្ពស់ស្ថាប័នរដ្ឋសភាកម្ពុជា ទៅជាសភាឌីជីថល ដែលបច្ចុប្បន្ននេះកំពុងដំណើរការបានមួយជំហានធំរួចមកហើយ។
លោកស្រី ឃួន សុដារី និងលោក ជីយ៉ចជី ស៊ូច បានយល់ស្របគ្នាថា ទំនាក់ទំនងសភា ឬការទូតសភា ពិតជាមានសារៈសំខាន់ខ្លាំងណាស់ ព្រោះសភាតំណាងឱ្យសំឡេងរបស់ប្រជាពលរដ្ឋ ហើយការពង្រឹងទំនាក់ទំនងនេះ នឹងជួយលើកកម្ពស់ទំនាក់ទំនងរវាងប្រជាជន និងប្រជាជន ដែលជាមូលដ្ឋានគ្រឹះ ក្នុងការពង្រឹង និងពង្រីកទំនាក់ទំនងលើវិស័យសំខាន់ៗដទៃទៀត។
លោក ជីយ៉ចជី ស៊ូច បានគាំទ្រប្រសាសន៍ប្រធានរដ្ឋសភាកម្ពុជា និងបានបង្ហាញក្តីសង្ឃឹមថា តាមរយៈដំណើរទស្សនកិច្ចនេះ អគ្គលេខាធិការដ្ឋានរដ្ឋសភាប្រទេសទាំង២ នឹងសម្រេចបានលទ្ធផលជាច្រើន ក្នុងការលើកកម្ពស់កិច្ចសហប្រតិបត្តិការរដ្ឋសភាប្រទេសទាំង២ ក៏ដូចជាវិស័យជាច្រើនទៀត ដូចជាពាណិជ្ជកម្ម ទេសចរណ៍ កសិកម្ម និងអប់រំ។
លោកស្រី ឃួន សុដារី ក៏បានអរគុណដល់ប្រទេសហុងគ្រី ដែលបានផ្តល់អាហារូបករណ៍ដល់និស្សិតកម្ពុជា បានទៅសិក្សានៅប្រទេសហុងគ្រី ចាប់តាំងពីទសវត្សរ៍ឆ្នាំ១៩៨០មក ហើយលោកស្រី បានស្នើប្រទេសហុងគ្រី ជួយបន្ថែមចំនួនអាហារូបករណ៍ដល់និស្សិតកម្ពុជា បានទៅសិក្សានៅប្រទេសហុងគ្រីបន្ថែមទៀត និងបានអរគុណដល់រដ្ឋាភិបាលហុងគ្រី ដែលបានយកចិត្តទុកដាក់ចំពោះនិស្សិតកម្ពុជា ដូចជាប្រជាពលរដ្ឋហុងគ្រីផងដែរ៕
