ភ្នំពេញ៖ ក្រសួង ស្ថាប័ន រដ្ឋបាលរាជធានី-ខេត្ត និងកងកម្លាំងសន្តិសុខទូទាំងប្រទេស ត្រូវបានណែនាំឱ្យពង្រឹងការរៀបចំ និងត្រៀមលក្ខណៈនានា ដើម្បីធានាឱ្យពិធីបុណ្យចូលឆ្នាំថ្មីប្រពៃណីជាតិខ្មែរ (សង្ក្រាន្ត) ខាងមុខ ប្រព្រឹត្តទៅដោយបរិយាកាសសប្បាយរីករាយ សុវត្ថិភាព និងវប្បធម៌សម្បូរបែប ខណៈបន្តលើកស្ទួយប្រពៃណីជាតិ និងរក្សាសណ្តាប់ធ្នាប់សង្គម។
យោងតាមសេចក្ដីណែនាំរបស់គណៈកម្មាធិការជាតិរៀបចំបុណ្យជាតិ-អន្តរជាតិ អាជ្ញាធរទូទាំងប្រទេសត្រូវសហការរៀបចំសកម្មភាពនានា ពង្រឹងវិធានការសន្តិសុខ និងលើកកម្ពស់ទំនៀមទម្លាប់ប្រពៃណីជាតិ ក្នុងអំឡុងពេលពិធីបុណ្យរយៈពេលបីថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦។
ក្នុងផែនការណែនាំបានបញ្ជាក់ថា ពិធីបុណ្យប្រពៃណីនេះគឺជាពេលវេលាសម្គាល់ការចូលមកដល់នៃឆ្នាំថ្មី ឆ្នាំមមី អដ្ឋស័ក តាមប្រព័ន្ធប្រតិទិនខ្មែរ។
សេចក្ដីណែនាំបានបញ្ជាក់ថា៖ «ថ្ងៃអង្គារ ១២រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០២៦ វេលាម៉ោង ១០:៤៨ នាទីព្រឹក គឺជាថ្ងៃចូលឆ្នាំថ្មី ខណៈថ្ងៃទី១៥ ខែមេសា ជាថ្ងៃវ័នបត និងថ្ងៃទី១៦ ខែមេសា ជាថ្ងៃឡើងស័ក»។
ការណែនាំនេះបានអំពាវនាវឱ្យក្រសួង ស្ថាប័ន និងរដ្ឋបាលរាជធានី-ខេត្ត រៀបចំតុបតែងអគារសាធារណៈ និងទីសាធារណៈដោយលើកទង់ជាតិ ទង់សាសនា ទង់ព្រះមហាក្សត្រ បដាពាក្យស្លោក និងបំភ្លឺភ្លើងពណ៌ ដើម្បីបង្កើតបរិយាកាសអបអរសាទរពិធីបុណ្យ។
ជាមួយគ្នានេះ អាជ្ញាធរមូលដ្ឋានក៏ត្រូវបានណែនាំឱ្យលើកទឹកចិត្តម្ចាស់រោងចក្រ សហគ្រាស សាលារៀនឯកជន មណ្ឌលកម្សាន្ត និងរមណីយដ្ឋាននានា តុបតែងលម្អទីតាំងរបស់ខ្លួន ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិ។
សកម្មភាពប្រពៃណីនានានឹងក្លាយជាចំណុចសំខាន់ក្នុងការអបអរសាទរឆ្នាំនេះ។ រដ្ឋបាលរាជធានី-ខេត្តត្រូវបានណែនាំឱ្យរៀបចំលេងល្បែងប្រជាប្រិយខ្មែរ ដូចជា ចោលឈូង បោះអង្គញ់ ទាញព្រ័ត្រ ទាត់សី លាក់កន្សែង និងរាំកម្សាន្ត តាមទីសាធារណៈ និងតាមរមណីយដ្ឋានទេសចរណ៍ ដើម្បីលើកស្ទួយវប្បធម៌ខ្មែរ។
ក្នុងពេលដូចគ្នា ពិធីបុណ្យសាសនាក៏នឹងត្រូវប្រារព្ធឡើងតាមវត្តអារាមទូទាំងប្រទេស រួមមាន ពិធីពូនភ្នំខ្សាច់ សម្អាតព្រះពុទ្ធរូប និងពិធីស្រោចទឹកសីលវន្ត សីលវតី មាតាបិតា និងចាស់ព្រឹទ្ធាចារ្យ។
ជាមួយគ្នានេះផងដែរ អាជ្ញាធរត្រូវបានណែនាំឱ្យយកចិត្តទុកដាក់អនុវត្តវិធានការសន្តិសុខ និងសុវត្ថិភាពឱ្យបានតឹងរឹង។
សេចក្ដីណែនាំ បានបញ្ជាក់ថា៖ «ក្រសួងមហាផ្ទៃ និងក្រសួងការពារជាតិ ត្រូវសហការជាមួយរដ្ឋបាលរាជធានី-ខេត្ត ក្នុងការការពាររក្សាសន្តិសុខ សណ្តាប់ធ្នាប់សង្គម និងសម្រួលចរាចរណ៍ ដើម្បីធានាសុវត្ថិភាពជូនប្រជាពលរដ្ឋ និងភ្ញៀវជាតិ-អន្តរជាតិ ដែលធ្វើដំណើរទៅកម្សាន្តតាមវត្តអារាម មណ្ឌលកម្សាន្ត និងរមណីយដ្ឋាននានា»។
យ៉ាងណាមិញ អាជ្ញាធរត្រូវទប់ស្កាត់សកម្មភាពណាដែលខុសច្បាប់ ឬប្រាសចាកនឹងប្រពៃណីជាតិ ដូចជាល្បែងស៊ីសង ការជះទឹក លាបធ្យូង និងការប្រើប្រាស់គ្រឿងផ្ទុះដែលបង្កគ្រោះថ្នាក់។
អាជ្ញាធរក៏បានអំពាវនាវឱ្យប្រជាពលរដ្ឋមានការប្រុងប្រយ័ត្នក្នុងការប្រើប្រាស់ទៀន ធូប និងគ្រឿងឆេះផ្សេងៗ ដើម្បីជៀសវាងគ្រោះអគ្គិភ័យក្នុងអំឡុងពេលពិធីបុណ្យ។
ស្ថាប័នសារព័ត៌មានក៏ត្រូវបានលើកទឹកចិត្តឱ្យផ្សព្វផ្សាយយ៉ាងទូលំទូលាយអំពីសកម្មភាព និងទិដ្ឋភាពនានាក្នុងឱកាសពិធីបុណ្យចូលឆ្នាំថ្មី ប្រពៃណីជាតិ រួមទាំងពិធីសាសនា និងសកម្មភាពប្រពៃណី ដើម្បីឱ្យប្រជាពលរដ្ឋ និងភ្ញៀវអន្តរជាតិ ទាំងក្នុង និងក្រៅប្រទេស បានទស្សនា និងយល់ជ្រួតជ្រាប។
ជាផ្នែកមួយនៃការអបអរសាទរទូលំទូលាយ រាជធានីភ្នំពេញក៏គ្រោងរៀបចំព្រឹត្តិការណ៍ធំមួយមានឈ្មោះថា «នគរសង្ក្រាន្ត» ដែលគ្រោងប្រព្រឹត្តទៅរយៈពេល៦ថ្ងៃ ចាប់ពីថ្ងៃទី១៤ ដល់ថ្ងៃទី១៩ ខែមេសា។
ព្រឹត្តិការណ៍នេះមានគោលបំណងអបអរសាទរមរតកវប្បធម៌ខ្មែរ ព្រមទាំងជំរុញវិស័យទេសចរណ៍ និងសកម្មភាពសេដ្ឋកិច្ចនៅក្នុងរាជធានី។
ថ្លែងក្នុងជំនួបពិភាក្សាជាមួយថ្នាក់ដឹកនាំក្រសួងព័ត៌មាន និងស្ថាប័នផ្សព្វផ្សាយ កាលពីថ្ងៃទី២ ខែមីនា ឆ្នាំ២០២៦ លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានថ្លែងថា ការប្រារព្ធពិធីបុណ្យចូលឆ្នាំថ្មី មិនមែនត្រឹមតែជាការអបអរសាទរទំនៀមទម្លាប់ប្រពៃណីប៉ុណ្ណោះទេ។
លោកបានថ្លែងថា៖ «ការប្រារឰពិធីបុណ្យចូលឆ្នាំថ្មីមិនត្រឹមតែជាការអបអរសាទរទំនៀមទម្លាប់ប្រពៃណីប៉ុណ្ណោះទេ ប៉ុន្ដែវាជាការពង្រឹងអត្តសញ្ញាណជាតិ ជាពិសេសក្នុងពេលដែលមានបញ្ហាប្រឈមពីខាងក្រៅ។ វាក៏ជាឱកាសមួយក្នុងការផ្សារភ្ជាប់ និងពង្រឹងស្មារតីមហាគ្រួសារខ្មែរ ព្រមទាំងចូលរួមចំណែកដល់សេដ្ឋកិច្ច»។
លោកបានបញ្ជាក់ថា ការអបអរសាទរពិធីបុណ្យគួរតែបង្ហាញអត្តសញ្ញាណ និងស្មារតីរួបរួមជាតិ ខណៈដែលមិនត្រូវភ្លេចវីរៈកងទ័ពជួរមុខ និងប្រជាពលរដ្ឋដែលត្រូវផ្លាស់ទីលំនៅ។
លោកបានបន្ថែមថា៖ «ឆ្នាំនេះ លើសពីពេលណាៗទាំងអស់ យើងត្រូវរំលេចអត្តសញ្ញាណជាតិ។ វាមិនមែនគ្រាន់តែជាការសប្បាយប៉ុណ្ណោះទេ ប៉ុន្តែជាការពង្រឹងមោទនភាពជាតិ»។
លោក សុខ សប្បាយណា ប្រធានក្រុមការងារប្រតិបត្តិ និងជាសមាជិកអចិន្ត្រៃយ៍គណៈកម្មាធិការកណ្តាល សហភាពសហព័ន្ធយុវជនកម្ពុជា បានឱ្យដឹងថា ព្រឹត្តិការណ៍ «នគរសង្ក្រាន្ត» នៅតែស្ថិតក្នុងដំណាក់កាលគម្រោង ប៉ុន្តែគ្រោងនឹងរៀបចំនៅតាមទីតាំងសំខាន់ៗជាច្រើនក្នុងរាជធានីភ្នំពេញ។
ទីតាំងទាំងនោះរួមមាន បរិវេណវត្តភ្នំ តំបន់ផ្លូវថ្មើរជើងចតុមុខ សួនច្បារពី Vattanac Capital Lifestyle ដល់ផ្សាររាត្រី បរិវេណវត្តបទុមវតី តំបន់បាសាក់លែន និងផ្សារទួលទំពូង។
សកម្មភាពដែលគ្រោងរៀបចំមានដូចជា ភូមិវប្បធម៌ ល្បែងប្រជាប្រិយ របាំបុរាណ ក្បាច់គុនខ្មែរ ការប្រកួតអុកចត្រង្គ និងអុកយក្ស ពិធីដង្ហែព្រះពុទ្ធបដិមា និងការប្រកួតទាញព្រ័ត្រមិត្តភាពក្នុងសហគមន៍។
តំបន់ខ្លះក៏នឹងមានការប្រគុំតន្ត្រី តំបន់សម្រាកកម្សាន្ត និងស្តង់ពាណិជ្ជកម្មផងដែរ។
លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងថា ព្រឹត្តិការណ៍ «នគរសង្ក្រាន្ត» មិនមែនគ្រាន់តែជាកម្មវិធីកម្សាន្តធម្មតាទេ។
លោកបានថ្លែងថា៖ «វាជាវេទិកាមួយសម្រាប់បង្ហាញអត្តសញ្ញាណជាតិ ការរួបរួមរបស់យុវជន និងភាពរស់រវើករបស់រាជធានីភ្នំពេញ» ដោយបន្ថែមថា សារព័ត៌មានក៏មានតួនាទីសំខាន់ក្នុងការផ្សព្វផ្សាយស្ថានភាពរបស់កម្ពុជា ទៅកាន់សហគមន៍អន្តរជាតិផងដែរ៕
