កម្ពុជាស្នើឱ្យរដ្ឋាភិបាលជប៉ុនបន្តជួយស្ថាបនាស្ថានីយប្រព្រឹត្តកម្មទឹកកខ្វក់(ចម្រោះ)នៅក្នុងរាជធានីភ្នំពេញបន្ថែមទៀតដើម្បីជួយលើកកម្ពស់គុណភាពទឹកដែលប្រើប្រាស់រួច មុននឹងបង្ហូរចូលទៅក្នុងប្រភពទឹកផ្សេងៗ ពិសេសដងទន្លេ ខណៈក្នុងរាជធានីភ្នំពេញនាពេលនេះមានស្ថានីយប្រព្រឹត្តកម្មទឹកកខ្វក់ តែ ១ប៉ុណ្ណោះដែលជាជំនួយរបស់រដ្ឋាភិបាលជប៉ុន។
ការសិក្សាបានបង្ហាញថា ការរីកចម្រើននៃវិស័យសំណង់ និងកំណើនប្រជាជន បានធ្វើឱ្យបរិមាណទឹកប្រើប្រាស់ និងទឹកកខ្វក់ក្នុងរាជធានីកើនឡើងជាបន្តបន្ទាប់។ ជាក់ស្តែងគ្រាន់តែតំបន់នៅភាគខាងត្បូងរាជធានីភ្នំពេញ(ចាប់ពីមហាវិថីសហព័ន្ធរុស្ស៊ីសំដៅមកភាគខាងត្បូង) ដែលបច្ចុប្បន្នមានមនុស្សរស់នៅជាង ១ លាននាក់ គឺក្នុងរយៈពេល ២៤ម៉ោងមានទឹកកខ្វក់ជាមធ្យមប្រហែល ២៨ ម៉ឺនម៉ែត្រគូប។ កំណើនទឹកកខ្វក់ កំពុងធ្វើឱ្យប៉ះពាល់យ៉ាងខ្លាំងទៅដល់បរិស្ថាន និងសុខុមាលភាពជីវិតមនុស្ស-សត្វ។
អនុប្រធានមន្ទីរសាធារណការ និងដឹកជញ្ជូន រាជធានីភ្នំពេញ លោក ជូ គឹមទ្រី បានប្រាប់ក្រុមអ្នកយកព័ត៌មានកាលពីថ្ងៃទី២៤ ខែមីនា ថា នៅមុនពេលមានការជួយពីសំណាក់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ប្រចាំនៅកម្ពុជា គឺទឹកកខ្វក់ទាំងអស់ដែលចេញពីលំនៅឋាន អគារការិយាល័យ មជ្ឈមណ្ឌលពាណិជ្ជកម្ម កន្លែងលក់ដូរទំនិញ ... និងកន្លែងសាធារណៈផ្សេងៗក្នុងរាជធានីភ្នំពេញ ត្រូវបានបង្ហូរទៅតំបន់ដីសើម បឹង ឬទឹកទន្លេដោយផ្ទាល់តែម្តង គឺមិនមានការចម្រោះអ្វីទាំងអស់។
លោកបន្តថា ដោយឃើញពីផលអវិជ្ជមានទៅដល់បរិស្ថាន និងជីវិតមនុស្ស-សត្វ ទើបនៅឆ្នាំ២០១៤-២០១៦ ក្រុមការងារជំនាញរបស់ JICA បានចាប់ផ្តើមធ្វើការសិក្សាពីលទ្ធភាពក្នុងការកែលម្អ និងលើកកម្ពស់ប្រព័ន្ធទឹកកខ្វក់ក្នុងរាជធានីភ្នំពេញ។ គម្រោងនេះបានបង្កើតនូវផែនការមេសម្រាប់គ្រប់គ្រងប្រព័ន្ធទឹកកខ្វក់ ក្នុងរាជធានីភ្នំពេញរហូតដល់ឆ្នាំ២០៣៥ តាមរយៈការកាត់បន្តការបំពុលបរិស្ថាន និងលើកកម្ពស់លក្ខខណ្ឌរស់នៅរបស់ប្រជាជន។
បន្ទាប់ពីចំណាយពេលយ៉ាងយូរក្នុងការរៀបចំប្រព័ន្ធបង្ហូរទឹកកខ្វក់ចូល-ចេញ ស្ថានីយប្រពឹត្តកម្មទឹកកខ្វក់ជើងឯក ត្រូវបានសម្ពោធដាក់ឱ្យដំណើរការជាផ្លូវការដោយលោកនាយករដ្ឋមន្ត្រី ហ៊ុន ម៉ាណែត និងឯកអគ្គរាជទូតជប៉ុនប្រចាំកម្ពុជា លោក Ueno Atsushi កាលពីថ្ងៃទី ២៧ ខែធ្នូ ឆ្នាំ២០២៣។
លោកបានថ្លែងថា៖«ស្ថានីយប្រពឹត្តកម្មទឹកកខ្វក់ជើងឯក ដែលជាជំនួយរបស់ JICA គឺជាចំណែកដ៏សំខាន់ក្នុងការជួយការពារបរិស្ថាន និងលើកកម្ពស់សុខមាលភាពនៃជីវិតរស់នៅរបស់មនុស្ស-សត្វ។ ទោះយ៉ាងណាកម្រិតសមត្ថភាពរបស់ស្ថានីយនេះ គឺស្ថិតក្នុងកម្រិតតិចតួចបំផុតពីអ្វីដែលជាតម្រូវការជាក់ស្តែងនាពេលបច្ចុប្បន្ន»។
ប្រធានស្ថានីយប្រពឹត្តកម្មទឹកកខ្វក់ជើងឯក លោក សូ វុទ្ធី បាននិយាយថា ក្នុង ១ថ្ងៃស្ថានីយប្រពឹត្តកម្មទឹកកខ្វក់ជើងឯក មានសមត្ថភាពអាចចម្រោះទឹកកខ្វក់បានប្រមាណ ៥ ០០០ម៉ែត្រគូប ដោយស្ថានីយដំណើរការ ២៤ម៉ោងជារៀងរាល់ថ្ងៃ។ សមត្ថភាពរបស់ស្ថានីយ គឺមានត្រឹមតែ ១,៨% ប៉ុណ្ណោះនៃបរិមាណទឹកកខ្វក់ដែលត្រូវបញ្ចេញចោលជារៀងរាល់ថ្ងៃនៅតំបន់ភាគខាងត្បូង ខណៈនៅតំបន់ភាគខាងជើង គឺមិនទាន់មានស្ថានីយប្រព្រឹត្តកម្មទឹកកខ្វក់ ឡើយ។
លោកនិយាយថា៖«យើងពិតជាចង់ឃើញ JICA ផ្តល់ជំនួយបច្ចេកទេស និងថវិកាគាំទ្រសម្រាប់គម្រោងសាងសង់ស្ថានីយប្រព្រឹត្តកម្មទឹកកខ្វក់នៅក្នុងរាជធានីភ្នំពេញ និងបណ្តាខេត្តបន្ថែមទៀត ព្រោះការបង្ហូរទឹកកខ្វក់ចូលទៅក្នុងប្រភពទឹកធម្មជាតិដោយមិនឆ្លងកាត់ការចម្រោះជាមុន គឺនឹងផ្តល់ផលអវិជ្ជមានច្រើនសម្រាប់បរិស្ថាន និងការរស់នៅរបស់ជីវចម្រុះផ្សេងៗ រួមទាំងមនុស្សផងដែរ។
បើតាមលោក សូ វុទ្ធី វិធីសាស្រ្តដែលបានកំណត់សម្រាប់ចម្រោះទឹកកខ្វក់នៅស្ថានីយប្រពឹត្តកម្មទឹកកខ្វក់ជើងឯក គឺបច្ចេកវិទ្យាប្រព្រឹត្តកម្ម Pre-Treated Trickling Filter System (PTF) ដែលមានដូចជា ការបង្ហូរទឹកកខ្វក់ចូលអាងស្តុក, ការប្រើអេប៉ុងបណ្តែតដើម្បីចម្រោះទឹក, ការញែកចេញធាតុរាវ និងរឹង ... ការដាក់សារធាតុគីមី ជាដើម៕
