សិស្សានុសិស្ស បានមកហាត់សមលើការសម្តែងក្បាច់រាំយុវជនប្រចាំវិទ្យាល័យ និងការសាកល្បងលេងល្បែងប្រជាប្រិយខ្មែរ នៅទីតាំងមុខវត្តឧណ្ណាលោម កាលពីថ្ងៃទី ២៤ ខែមីនា ដើម្បីត្រៀមលេង និងរាំច្រៀង នៅអំឡុងពេលបុណ្យចូលឆ្នាំប្រពៃណីជាតិខ្មែរ ខាងមុខនេះ។ រូបថត ក្រសួងអប់រំ
នៅគ្រប់មន្ទីរអប់រំ យុវជន និងកីឡារាជធានី-ខេត្ត រដ្ឋបាលក្រុង ស្រុក ខណ្ឌ និងគណៈគ្រប់គ្រងគ្រឹះស្ថានសិក្សាសាធារណៈ និងឯកជន នៅទូទាំងប្រទេស ត្រូវបានណែនាំឱ្យបង្កលក្ខណៈដល់សិស្សានុសិស្ស និងយុវជន ឱ្យចូលរួមលេងល្បែង និងរាំរបាំប្រជាប្រិយខ្មែរ នៅក្នុងឱកាសត្រៀមអបអរសាទរ និងថ្ងៃប្រារព្ធពិធីបុណ្យចូលឆ្នាំប្រពៃណីជាតិខាងមុខនេះ តែមិនអនុញ្ញាតឱ្យលេងបាញ់ទឹក គប់ទឹក ប៉ាតម្សៅ ប៉ាតធ្យូង លេងភក់ និងការរាំច្រៀងណា ដែលមានកាយវិការមិនសមរម្យនោះទេ។
ក្រសួងអប់រំ យុវជន និងកីឡា ទើបតែបានសេចក្ដីណែនាំស្តីពី «ការរៀបចំកម្មវិធីកម្សាន្តលេងល្បែង និងរាំរបាំប្រជាប្រិយខ្មែរ ក្នុងឱកាសត្រៀមអបអរសាទរ និងថ្ងៃប្រារព្ធពិធីបុណ្យចូលឆ្នាំប្រពៃណីជាតិ នៅតាមគ្រឹះស្ថានសិក្សាសាធារណៈនិងឯកជន» កាលពីថ្ងៃទី ២៤ ខែមីនា ដើម្បីចូលរួមអភិរក្ស និងលើកកម្ពស់វប្បធម៌ ទំនៀមទម្លាប់ ប្រពៃណីជាតិខ្មែរដ៏ល្អផូរផង់ឱ្យបានគង់វង្ស និងរីកចម្រើន ព្រមទាំងបញ្ចៀសពីគ្រោះថ្នាក់ផ្សេងៗ ដែលអាចកើតមាន។
ក្រសួងអប់រំ បានណែនាំដល់មន្ទីរអប់រំ យុវជន និងកីឡារាជធានី-ខេត្ត រដ្ឋបាលក្រុង ស្រុក ខណ្ឌ និងគណៈគ្រប់គ្រងគ្រឹះស្ថានសិក្សាសាធារណៈនិងឯកជន បង្កលក្ខណៈគ្រប់បែបយ៉ាង ឱ្យសិស្សានុសិស្ស និងយុវជន ចូលរួមលេងល្បែងប្រជាប្រិយខ្មែរ ដូចជាល្បែងស្ដេចចង់ ឈូង ចាប់កូនខ្លែង លោតអន្ទាក់ បោះអង្គញ់ លាក់កន្សែង ទាញព្រ័ត្រ វាយក្អម ដណ្ដើមស្លឹកឈើ ឆក់កូនខ្លែង លោតបាវ ជាដើម។
ជាមួយគ្នានេះ ក្រសួងអប់រំ ក៏បានណែនាំឱ្យសិស្សានុសិស្ស និងយុវជនកម្ពុជា រាំរបាំប្រជាប្រិយខ្មែរ ដូចជារបាំត្រុដិ គោះត្រឡោក គោះអង្រែ នារីជាជួរ រាំវង់ រាំក្បាច់ សារ៉ាវ៉ាន់ ឡាំលាវ តាលុង ចូកកំពិស កខ្ទឹម។ល។ នៅមុនពេល និងអំឡុងពេលនៃការប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ។
លើកពីនេះ ក្រសួងអប់រំ បានលើកទឹកចិត្តឱ្យលោកគ្រូ អ្នកគ្រូ ក្រុមប្រឹក្សាកុមារ ក្រុមប្រឹក្សាយុវជន យុវជនស្ម័គ្រចិត្ត ឱ្យចូលរួមសហការ និងសម្របសម្រួល រៀបចំតុបតែងតាមបែបប្រពៃណី ដើម្បីគាំទ្រដល់ដំណើរការលែងល្បែងប្រជាប្រិយ រាំរបាំប្រពៃណីជាតិ និងធានាបាននូវសុខសុវត្ថិភាព សណ្ដាប់ធ្នាប់ និងរបៀប រៀបរយ ហើយអ្នកទាំងនេះ ក៏ត្រូវបានលើកទឹកចិត្តឱ្យតុបតែងខ្លួន ស្លៀកសម្លៀកបំពាក់ ប្រពៃណីខ្មែរ ឬស្លៀកពាក់សមរម្យ ប្រកបដោយកាយវិការសុភាពរាបសា និងការទទួលខុសត្រូវខ្ពស់។
ប៉ុន្តែចំពោះសកម្មភាព «លេងបាញ់ទឹក គប់ទឹក ប៉ាតម្សៅ ប៉ាតធ្យូង លេងភក់ ការរាំច្រៀងដែលមានកាយវិការមិនសមរម្យ ការប្រព្រឹត្តអំពើបៀតបៀន ការស្លៀកពាក់មិនសមរម្យ ការទទួលទានគ្រឿងស្រវឹង ការប្រើប្រាស់បារីគ្រប់ប្រភេទ និងការលេងល្បែងស៊ីសងគ្រប់ប្រភេទជាដើម» គឺក្រសួង មិនអនុញ្ញាតឱ្យលេង ឬរាំច្រៀងនោះទេ។
ដើម្បីបង្កភាពមិនប្រក្រតីទាំងអស់នេះ ក្រសួងអប់រំ បានស្នើគ្រប់ភាគីពាក់ព័ន្ធ ត្រូវសហការជិតស្និទ្ធជាមួយអាជ្ញាធរដែនដី គណៈកម្មការគ្រប់គ្រងសាលារៀន មាតាបិតា អាណាព្យាបាល សហគមន៍ ដើម្បីផ្ដល់និងទទួលព័ត៌មានអំពីបាតុភាពមិនប្រក្រតី និងការប្រព្រឹត្តមិនសមរម្យ បង្កអំពើហិង្សា និងបាតុភាពអវិជ្ជមានផ្សេងទៀត ក្នុងគ្រឹះស្ថានសិក្សា ក្នុងន័យរួមចំណែកទប់ស្កាត់ និង ដើម្បីដោះស្រាយបញ្ហាបានទាន់ពេលវេលា។
ប៉ុន្តែក្រសួងបញ្ជាក់ថា ការណែនាំខាងលើនេះ ត្រូវបានអនុញ្ញាតឱ្យអនុវត្តចាប់ពីថ្ងៃចាប់ផ្តើមនៃវិស្សមកាលតូច និងថ្ងៃប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរតែប៉ុណ្ណោះ ហើយមន្ទីរអប់រំ យុវជន និងកីឡារាជធានី-ខេត្ត រដ្ឋបាលក្រុង ស្រុក ខណ្ឌ និងគណៈគ្រប់គ្រងគ្រឹះស្ថានសិក្សាសាធារណៈនិងឯកជន ត្រូវចូលរួមអនុវត្តសេចក្តីណែនាំនេះឱ្យមានប្រសិទ្ធភាព ប្រកបដោយស្មារតីទទួលខុសត្រូវខ្ពស់៕