ភ្នំពេញ៖ រដ្ឋាភិបាលកម្ពុជាកំពុងជំរុញកំណែទម្រង់វិស័យយុត្តិធម៌ ដើម្បីបង្កើនប្រសិទ្ធភាពការងារតុលាការ និងស្តារជំនឿទុកចិត្តរបស់សាធារណជន ខណៈបញ្ហាពន្យារពេលដោះស្រាយរឿងក្តី និងភាពមិនប្រក្រតីនៅតុលាការ ត្រូវបានទទួលស្គាល់ថាជាបញ្ហាប្រឈមសំខាន់ៗនៅតែបន្តមាន។
ក្នុងពិធីបើកសន្និបាតបូកសរុបលទ្ធផលការងារវិស័យយុត្តិធម៌ឆ្នាំ២០២៥ និងកំណត់ទិសដៅអាទិភាពសម្រាប់ឆ្នាំ២០២៦ ដែលប្រារព្ធធ្វើឡើងនៅថ្ងៃទី២៥ ខែមីនា ឆ្នាំ២០២៦ នៅរាជធានីភ្នំពេញ លោក កើត រិទ្ធ ឧបនាយករដ្ឋមន្ត្រី និងរដ្ឋមន្ត្រីក្រសួងយុត្តិធម៌ បានដឹកនាំកិច្ចពិភាក្សាដើម្បីវាយតម្លៃស្ថានភាពបច្ចុប្បន្ន និងដាក់ចេញវិធានការបន្តសម្រាប់ការកែលម្អវិស័យនេះ។
សន្និបាតរយៈពេលពីរថ្ងៃនេះ មានការចូលរួមពីមន្ត្រីជាន់ខ្ពស់ប្រមាណ៥០០នាក់ រួមទាំងថ្នាក់ដឹកនាំតុលាការ អយ្យការ និងស្ថាប័នអនុវត្តច្បាប់ពាក់ព័ន្ធ ដើម្បីពិនិត្យបញ្ហាប្រឈម និងស្វែងរកដំណោះស្រាយជាក់ស្តែង សំដៅលើការលើកកម្ពស់គុណភាពសេវាយុត្តិធម៌ និងការអនុវត្តច្បាប់ឱ្យកាន់តែមានប្រសិទ្ធភាព ។
តាមការបញ្ជាក់របស់ក្រសួងយុត្តិធម៌ សន្និបាតឆ្នាំនេះបានផ្តោតលើការវាយតម្លៃលទ្ធផលការងារឆ្នាំ២០២៥ ពិសេសលទ្ធផលនៃយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ ក៏ដូចជាយុទ្ធនាការត្រួតពិនិត្យ និងដោះស្រាយភាពមិនប្រក្រតី ដែលត្រូវបានដាក់អនុវត្តក្នុងរយៈពេលកន្លងមក។
យោងតាមក្រសួងយុត្ដិធម៌ បានឱ្យដឹងថា៖ «សន្និបាតនេះត្រូវបានរៀបចំឡើងក្នុងគោលបំណងពិនិត្យមើលអំពីស្ថានភាព និងបច្ចុប្បន្នភាពនៃវិស័យយុត្តិធម៌ ស្វែងរកឱ្យឃើញនូវបញ្ហាប្រឈមជាមូលដ្ឋាននៅក្នុងវិស័យនេះ និងដាក់ចេញនូវដំណោះស្រាយ និងទិសដៅការងារជាអាទិភាពបន្ត ដើម្បីបង្កើនប្រសិទ្ធភាពការងារក្នុងការបម្រើប្រជាជន»។
ក្រសួងបានបន្ដថា៖ «ជាមួយគ្នានេះ អង្គសន្និបាតក៏បានសំដៅលើកកម្ពស់ប្រសិទ្ធភាពនៃសេវាយុត្តិធម៌ និងគុណភាពនៃយុត្តិធម៌ និងរួមចំណែកដល់ការលើកកម្ពស់ជំនឿទុកចិត្តរបស់សាធារណជនមកលើការអនុវត្តច្បាប់របស់ស្ថាប័នអយ្យការ និងស្ថាប័នតុលាការ ក៏ដូចជា អាជ្ញាធរមានសមត្ថកិច្ចដែលមានការពាក់ព័ន្ធ»។
អង្គសន្និបាតក៏បានពិភាក្សាអំពីបញ្ហាប្រឈមសំខាន់ៗនៅក្នុងរដ្ឋបាលតុលាការ រួមទាំងការគ្រប់គ្រងថវិកា ការកែលម្អប្រព័ន្ធទិន្នន័យថ្កោលទោសជាតិ និងការគ្រប់គ្រងវត្ថុតាង ដើម្បីឆ្លើយតបទៅនឹងតម្រូវការសេវាសាធារណៈដែលកាន់តែខ្ពស់។
សម្រាប់ឆ្នាំ២០២៦ ក្រសួងយុត្តិធម៌បានដាក់ចេញទិសដៅអាទិភាពជាចម្បងលើការបន្តពន្លឿនការដោះស្រាយរឿងក្តី ការពង្រឹងវិន័យ និងគណនេយ្យភាពរបស់មន្ត្រីតុលាការ និងការធានាឱ្យមានសង្គតិភាពក្នុងការអនុវត្តច្បាប់នៅទូទាំងប្រទេស។
បន្ថែមពីនេះ កិច្ចពិភាក្សាបានផ្តោតលើប្រធានបទសំខាន់ៗ ដូចជា សុពលភាពនៃកិច្ចសន្យាទិញលក់អចលនវត្ថុ បញ្ហាក្នុងសំណុំរឿងអនុវត្តដោយបង្ខំ និងក្របខ័ណ្ឌវិន័យសម្រាប់អង្គចៅក្រម ដែលត្រូវបានរំពឹងថានឹងនាំទៅរកសេចក្តីសម្រេចរួម ដើម្បីកែលម្អការអនុវត្តច្បាប់ឲ្យមានភាពច្បាស់លាស់ និងស្មើភាព។
ក្រសួងយុត្តិធម៌បានបញ្ជាក់ថា ការជំរុញកំណែទម្រង់ទាំងនេះ មានគោលដៅចម្បងក្នុងការលើកកម្ពស់គុណភាពយុត្តិធម៌ និងស្តារជំនឿទុកចិត្តរបស់ប្រជាពលរដ្ឋលើស្ថាប័នតុលាការ និងអាជ្ញាធរពាក់ព័ន្ធ ខណៈដែលវិស័យនេះត្រូវបានចាត់ទុកថាមានតួនាទីសំខាន់ក្នុងការរក្សាស្ថិរភាពសង្គម និងការអភិវឌ្ឍប្រទេស។
